Search form

NA TIKO MAI NA LEKUTU 34

Sa tukuni na kenai yalayala ni vanua, 1-15. A yacadra na tamata sa lesi me vota na vanua, 16-29.

1A sa vosa vei Mosese ko Jiova, ka kaya, 2Mo vakaroti ira na Isireli, ka kaya vei ira, Ni dou sa yaco ki na vanua ko Kenani: (oqori na vanua sa lutu vei kemudou mo dou taukena, io na vanua ko Kenani me vaka na kenai yalayala:)

3Ena qai vakatekivu mai na vanua liwa ko Sini na nomudou i yalayala vaka ki na ceva, ka muria nai yalayala kei Itomi, ia na nomudou i yalayala mai na ceva sa na kenai yalayala sara ni Wasa Tuituina mai na tu-i-cake: 4ia ena lesu na nomudou i yalayala mai na ceva ka lako ki nai cabecabe ki Akirapimi, ka lako yani ki Sini: ia ena lako tiko yani ki na ceva ki Ketesa-parinea, ka lako yani ki na koro ko Atari, ka lako yani ki Asimoni: 5ia na kenai yalayala ena gole yani mai Asimoni ki na uciwai ni Ijipita, ia na kenai otioti na wasawasa.

6Ia nai yalayala mai ra, ena nomudou i yalayala na wasa levu: oqori na nomudou i yalayala ki ra.

7Ia oqo sa na nomudou i yalayala ki na tokalau: mai na wasa levu dou na vakatakilakilataka vaka ki na ulu-ni-vanua ko Ori: 8ia mai na ulu-ni-vanua ko Ori dou na vakatakilakilataka vaka ki nai curucuru ki Emaci; ia ena lako yani nai yalayala ka yacovi Sitati: 9ia me lako yani nai yalayala ki Sifironi, ia ena lako yani ka yala ki na koro ko Enani: Ia oqo sa na nomudou i yalayala ki na tokalau.

10Ia dou na vakatakilakilataka na nomudou i yalayala mai na tu-i-cake mai na koro ko Enani ki Sifami: 11ia me na lako sobu nai yalayala mai Sifami ki Ripila, mai na yasana ki na tu-i-cake mai Eini; me qai lako sobu nai yalayala, ka yaco ki na baravi ni wasawasa ko Kinereci vaka ki na tu-i-cake: 12ia me lako sobu nai yalayala ki na Joritani, ia na kenai otioti na Wasa Tuituina. Sa na nomudou vanua oqo kei na kenai yalayala sa vakavolivolita.

13A sa vakaroti ira na Isireli ko Mosese, ka kaya, Oqo na vanua dou na taukena e na vakawiri madigi, ko ya ka vakarota ko Jiova me soli ki na mataqali e ciwa ka dua na wase ni mataqali e dua: 14ni sa votai oti na nodra mataqali na luve i Rupeni, e na mataqali ni nodra qase, kei na nodra mataqali na luve i Kata, e na mataqali ni nodra qase; ka dua na wase ni mataqali i Manasa, era sa rawata na nodra i votavota: 15na mataqali e rua ka dua na wase ni mataqali e dua, era sa rawata na nodra i votavota e na tai ni Joritani oqo, sa donui Jeriko sa vaka ki na tu-i-cake, vaka ki nai cadracadra ni mata-ni-siga.

16A sa vosa vei Mosese ko Jiova, ka kaya, 17Oqo na yacadra na tamata era na vota na vanua vei kemudou: ko Eliesa na bete, kei Josua na luve i Nuni: 18Ia dou kauta e dua na turaga mai na mataqali yadua, me vota na vanua: 19ia oqo na yacadra na tamata: Mai na mataqali i Juta, ko Kelepi na luve i Jifune. 20Ia mai na nodra mataqali na luve i Simioni, ko Simueli na luve i Amiute. 21Mai na mataqali i Penijamini, ko Ilitati na luve i Kisiloni. 22Ia na turaga ni nodra mataqali na luve i Tani, ko Puki, na luve i Jokili. 23A nodra turaga na luve i Josefa, mai na nodra mataqali na luve i Manasa, ko Anieli na luve i Efoti. 24Ia na turaga ni nodra mataqali na luve i Ifireimi, ko Kemueli na luve i Sifitani. 25Ia na turaga ni nodra mataqali na luve i Sepuloni, ko Elisafani na luve i Parinaki. 26Ia na turaga ni nodra mataqali na luve i Isakari, ko Palitieli na luve i Asana. 27Ia na turaga ni nodra mataqali na luve i Aseri, ko Eiiute na luve i Silomi. 28Ia na turaga ni nodra mataqali na luve i Nafitalai, ko Pitaeli na luve i Amiute.

29O ira oqo ka vakarota ko Jiova me ra vota na vanua ko Kenani vei ira na Isireli.

Vakavakadewa Makawa

©1974 Bible Society of the South Pacific

More Info | Version Index