Search form

NA TIKO MAI NA LEKUTU 35

A nodra veikoro na Livai, 1-8. Na veikoro ni drodro, kei na kedra vanua, 9-29. Me kakua ni bula na tamata sa laba, 30-34.

1A sa vosa vei Mosese ko Jiova mai na vanua cecelevu ni Moapi, sa voleka ki na Joritani, ka donui Jeriko, ka kaya, 2Mo vakaroti ira na Isireli, me ra solia, mai na nodra i votavota, eso na koro vei ira na Livai me ra tiko kina; ia dou solia talega vei ira na Livai na vanua sa volita na veikoro. 3Ia na veikoro ena nodra me ra tiko kina; ia na vanua veico sa vakavolivolita ena vanua ni nodra pulumokau, kei na nodra i yau, kei na nodra manumanu kecega e yavai va. 4Ia na vanua sa vakavolivolita na veikoro, dou sa solia vei ira na Livai, me vakatekivu mai na bai ni koro ka lako yani, me katu rua na drau ka limasagavulu e na veiyasana. 5Ia dou na vakarautaka mai nai bili ni koro me katu lima na drau mai na yasana vaka ki na tu-i-cake, ka katu lima na drau na yasana ki na ceva, ka katu lima na drau mai na yasana ki ra, ka katu lima na drau mai na yasana vaka ki na tokalau; ia me tiko eloma na koro. Sa na vakaoqo na nodra vanua sa vakavolivolita na veikoro. 6Ia e na veikoro dou na solia vei ira na Livai dou lesia e ono me koro ni drodro, me dro kina ko koya sa vakamatea e dua: ia dou solia talega vei ira e vasagavulu ka rua na koro. 7A koro kecega dou na solia vei ira na Livai ena vasagavulu ka walu na koro, kei na vanua veico talega sa vakavolivolita. 8Ia na veikoro dou na solia mai na nodra i votavota na Isireli, me vakaoqo maivei ira sa vuqa na nodra, me vuqa; ia maivei ira sa lailai na nodra, me lailai: me solia ko ira yadua eso na nona koro vei ira na Livai, me vaka na nonai votavota sa taukena ko koya.

9A sa vosa vei Mosese ko Jiova, ka kaya, 10Mo kaya vei ira na Isireli, Ni dou sa yaco ki tai kadua ni Joritani, ki na vanua ko Kenani; 11dou qai lesia eso na koro me koro mo dou dro kina; me dro kina ko koya sa vakamatea e dua, ni sa sega ni nakita. 12Ia na koro oqo mo dou dro kina mai vua sa nonai tavi me sauma na mate: me kakua kina ni mate ko koya sa vakamatea e dua, ka me tu mada e matadra nai soqosoqo me lewai. 13Ia mo dou solia e ono na koro me nomudou koro ni drodro, mai na veikoro dou sa solia. 14E tolu na koro mo dou solia e na tai ni Joritani oqo, ka tolu na koro mo dou solia mai na vanua ko Kenani, me koro ni drodro. 15Sa kenai drodro na koro onoono oqo, vei ira na Isireli, vei ira na kai tani, vei koya talega sa tiko vulagi kei ira: me dro kina na tamata kecega sa vakamatea e dua ni sa sega ni nakita.

16Ia kevaka sa mokuti koya e na dua na ka kaukamea, a sa mate kina, sa laba ko koya: ena vakamatei vakaidina ko koya sa laba. 17Ia kevaka sa viriki koya e na vatu, e mate rawa kina, a sa mate kina, sa laba ko koya: ena vakamatei vakaidina ko koya sa laba. 18Se sa mokuti koya e nai wau, e mate rawa kina, a sa mate kina, sa laba ko koya: ena vakamatei vakaidina ko koya sa laba. 19Me vakamatei koya sa laba ko koya sa nonai tavi me sauma na dra: me vakamatei koya ni sa kunei koya. 20Ia kevaka sa tetebaraki koya ni sa cata, se virika ni sa lawakitaka a sa mate kina; 21se sa vaculaki koya e na ligana ni sa yalo ca vua, a sa mate kina: ena vakamatei vakaidina ko koya ka vaculaka; sa laba ko koya: me vakamatei koya sa laba ko koya sa nonai tavi me sauma na dra ni sa kunei koya.

22Ia kevaka sa tetebaraki koya vakasauri ni sa sega ni yalo ca vua, se sa viriki koya ni sa sega ni lawakitaka, 23se dua na vatu, e mate rawa kina, ka sa sega ni raica, ka sa biuta me lutuki koya, a sa mate kina, ia ka sa sega ni veimecaki kaya, ka sa sega ni nakita me ca kina ko koya: 24me ra qai lewa nai soqosoqo vei koya sa vakamatea kei koya sa nonai tavi me sauma na dra, me vaka na lewa oqo: 25ia ko ira nai soqosoqo, me ra vakabulai koya sa vakamatea na tamata mai vei koya sa nonai tavi me sauma na dra, ka vakasukai koya ko ira nai soqosoqo ki na koro sa nonai drodro ka dro kina ko koya: ia me tiko kina ko koya me yaco mada na nona mate na bete levu, o koya sa lumuti e na waiwai tabu.

26Ia kevaka sa lako ko koya sa vakamatea na tamata, ka yawasivita nai bili ni koro sa nonai drodro ka dro kina ko koya, 27a sa kunei koya ko koya sa nonai tavi me sauma na dra ni sa yawasivita nai bili ni koro sa nonai drodro, a sa vakamatei koya sa ia na veivakamatei ko koya sa nonai tavi me sauma na dra: ena sega ni cala kina ko koya: 28ni sa dodonu me tiko ga e na koro sa nonai drodro me yaco mada na nona mate na bete levu: ia ni sa mate na bete levu, me qai lesu ko koya sa ia na veivakamatei ki na vanua sai taukei kina.

29Ia na ka oqo ena kenai lesilesi vei kemudou mo dou lewa vakakina e na nomudou veitabatamata e na nomudou i tikotiko kecega.

30O koya yadua sa vakamatea na tamata, me vakamatei ko koya sa laba ni sa tukuni koya ko iratou sa raica: ia me kakua ga ni mate e dua na tamata, ni sa tukuni koya e le dua ga sa raica. 31Ia dou kakua ni vakadonuya e dua nai bulubulu me bula kina ko koya sa laba, ni sa dodonu me mate: ia ena vakamatei vakaidina ga. 32Ia dou kakua ni vakadonuya e dua nai bulubulu e na vukuna sa dro ki na koro sa nonai drodro, me lako tale ko koya me tiko e na vanua, ka me mate mada ga na bete. 33Ia mo dou kakua ni vakadukadukalitaka na vanua dou sa tiko kina: ni sa vakadukadukalitaka na vanua na laba: a sa sega ni sorovaki rawa na vanua e na vuku ni dra sa dave kina, sa sorovaki rawa ga e na nona dra ka vakadavea. 34Ia mo dou kakua ni vakadukadukalitaka na vanua dou sa tiko kina, ka'u sa tiko kina koi au: ni'u sa tiko koi au ko Jiova e na kedra maliwa na Isireli.

Vakavakadewa Makawa

©1974 Bible Society of the South Pacific

More Info | Version Index