Search form

NA TIKO MAI NA LEKUTU 6

A vunau e na vukudra sa tawase, 1-21. A vosa me ra vosavakalougatataki kina na tamata, 22-27.

1A sa kaya vei Mosese ko Jiova, 2Mo vosa vei ira na Isireli, ka kaya vei ira, Ke sa bubului e dua na tagane se dua na yalewa, me sa tawase kina, me tawasei koya me nei Jiova: 3me qai tabu waini kei na yaqona kece ko koya; me kakua ni gunuva na wai wiwi sa caka e na waini, se sa caka e na yaqona, me kua talega ni gunuva na wai ni vua-ni-vaini, me kua talega ni kania na vua-ni-vaini sa drokadroka, se sa sigani. 4E na veisiga kecega ni nona tawase tiko, me kakua ni kania ko koya e dua na ka sa caka e na vaini, mai na sorena ka yacova na kulina. 5E na veisiga kecega sa bubului kina me tawase, me kakua ni tara na uluna e dua nai tasi: ena tabu ga ko koya, ka me oti mada na veisiga kecega sa tawasei koya kina me nei Jiova; me laiva ko koya na drau ni uluna me tubu tiko me balavu. 6Me kakua ni torova e dua na yago sa mate ko koya, e na veisiga kecega sa tawasei koya kina me nei Jiova. 7Me kakua ni vakatawasavasavataki koya ko koya e na vuku i tamana se tinana, e na vuku ni tuakana se tacina, se na ganena, ni sa mate e dua vei ira: ni sa toka e na uluna na ka sa tawase kina ko koya me nona na Kalou. 8Sa tabu ko koya me nei Jiova e na veisiga kecega sa tawase kina ko koya. 9Ia kevaka sa lelekitaki e dua na tamata ni sa tiko voleka vua, ka sa vakatawasavasavataki na uluna sa tawase kina ko koya; me na qai tasia na uluna e na siga sa vakasavasavataki kina, io me tasia e nai kavitu ni siga: 10ia e nai kawalu ni siga me kauta e rua na soqe, se rua na luve ni ruve, vua na bete, ki na katuba ni vale ni veitavaki: 11ia me vakacabora e dua ko koya na bete mei soro ni valavala ca, kei nai karua mei soro kama, me sorovaki koya, ni sa cala e na vuku ni mate, ia me vakatabuya na uluna e na siga ko ya. 12Ia me vakatabuya ko koya me nei Jiova na veisiga ni nona tawase, ka kauta e dua na lami tagane sa yabaki dua mei soro ni caka cala: ia na veisiga eliu sa na sega ni wili ni sa vakatawasavasavataki na nona tawase.

13Ia oqo na lewa e na vukuna sa tawasei koya, ni sa oti na veisiga sa tawase kina ko koya: me mai kau ko koya ki na katuba ni vale ni veitavaki: 14ka vakacabora na nonai madrali vei Jiova, e dua na lami tagane sa yabaki dua sa sega na kena ca mei soro kama, ka dua na lami yalewa sa yabaki dua sa sega na kena ca mei soro ni valavala ca, ka dua na sipi tagane sa sega na kena ca mei madrali ni veivinakati, 15ka dua nai su madrai sa sega ni vakaleveni, ka so na keki ni madrai droka vinaka sa veiwaki vata kei na waiwai, kei na keki mamare sara eso sa sega ni vakaleveni sa boro e na waiwai, kei na kenai madrali laukana, kei na kenai madrali liviraki. 16Ia me kauta na veika oqo na bete ki na mata i Jiova, ka vakacabora na nonai soro ni valavala ca, kei na nonai soro kama: 17ia me vakacabora ko koya na sipi tagane mei madrali ni veivinakati vei Jiova, kei nai su madrai sa sega ni vakaleveni: me cabora talega na bete na kenai madrali laukana, kei na kenai madrali liviraki. 18Ia me qai tasia na uluna sa tawase kina ko koya sa tawasei koya, mai na katuba ni vale ni veitavaki, ka kauta na drau ni uluna sa tawase kina, ka biuta ki na bukawaqa e ruku ni madrali sa cabori me ka ni veivinakati. 19Me qai kauta na bete na taba ni sipi tagane sa saqa tu, ka dua na keki sa sega ni vakaleveni mai nai su, ka dua na keki mamare sara sa sega ni vakaleveni, ka solia ki na ligana sa tawasei koya ni sa tasia oti na uluna sa tawase kina: 20me qai yalovaka na bete mei soro e yalovaki e na mata i Jiova: oqo sa tabu me kena na bete, kei na serena sa yalovaki kei na tabana sa lavelaveti: ka oti, sa qai tara vua ka tawasei koya me gunu waini. 21Oqo na lewa e na vukuna sa tawasei koya ni sa bubului oti, io na nonai madrali vei Jiova e na vuku ni nona tawase, ka me sa kenai kuri talega na ka sa rawarawa vua: me vaka na nona bubului ko koya, me kitaka vakakina ko koya me vaka na lewa ni nona tawase.

22A sa vosa vei Mosese ko Jiova, ka kaya, 23Mo vosa vei Eroni kei rau na luvena, ka vaka, Me vaka oqo na nomudou vosavakalougatataki ira na Isireli, dou kaya vei ira:

24Me vakalougatataki kemuni ko Jiova, ka maroroi kemuni:

25Me cilavi kemuni na matai Jiova, ka me yalololoma vei Kemuni:

26Me vakanamata vei kemuni ko Jiova, ka solia vei kemuni na vakacegu.

27Ia era na cavuta na yacaqu vei ira na Isireli: ia ka'u na vakalougatataki ira.

Vakavakadewa Makawa

©1974 Bible Society of the South Pacific

More Info | Version Index