Search form

NA TIKO MAI NA LEKUTU 9

Sa vakarota tale na kana vata ni lako-sivia, 1-14. Sa liutaki ira tiko na Isireli na o, 15-23.

1A sa vosa vei Mosese ko Jiova mai na lekutu loaloa mai Saineai, e nai matai ni vula e nai karua ni yabaki ni ra sa lako tani mai na vanua ko Ijipita, ka vaka, 2Me ra ia na kana vata ni lako-sivia na Isireli e na kena gauna sa lokuci. 3E nai katinikava ni siga ni vula oqo, e na yakavi, dou kitaka e na gauna sa lokuci: me vaka na kenai vakaro kecega, kei na kenai valavala kecega, mo dou kitaka. 4Ka sa kaya vei ira na Isireli ko Mosese, me ra ia na kana vata ni lako-sivia. 5Ia era sa ia na kana vata ni lako-sivia e nai katinikava ni siga ni kenai matai ni vula, e na yakavi, mai na lekutu loaloa mai Saineai: me vaka na ka kecega ka vakarota vei Mosese ko Jiova, era sa kitaka vakakina na Isireli.

6Ia sa so na tamata era sa sega ni savasava e na vuku ni yago ni mate, a ra sa tabu e na kana vata ni lako-sivia e na siga ko ya: a ra sa lako mai e na siga ko ya kivei Mosese kei Eroni: 7a ra sa kaya vua, Keitou sa sega ni savasava e na vuku ni yago ni tamata sa mate: a cava keitou sa tarovi kina, me keitou kakua ni cabora vata kei ira na Isireli, nai madrali vei Jiova e na kena gauna sa lokuci? 8A sa kaya vei ira ko Mosese, Dou wawa mada, me'u rogoca se cava na ka ena vakarota ko Jiova e na vukumudou.

9A sa kaya vei Mosese ko Jiova, 10Mo tukuna vei ira na Isireli, ka vaka, Kevaka e dua vei kemudou, se dua vei ira na nomudou veitabatamata, sa sega ni savasava e na vuku ni yago ni mate, se sa lako tu vakayawa, me ia ga ko koya na kana vata ni lako-sivia vei Jiova: 11e nai karua ni vula, e na kenai katinikava ni siga, e na yakavi, me ra ia kina: me ra kania vata kei na madrai sa sega ni vakaleveni, kei na co gaga: 12me ra kakua ni vakavoca ki na mataka se musuka e dua na suina: me ra muria ga nai vakaro kecega sa bale ki na kana vata ni lako-sivia. 13Ia na tamata sa savasava, ka sa sega ni lako tu vakayawa, ka sa bese ni ia na kana vata ni lako-sivia, na tamata ko ya ena tawase tani vei ira na kai nona; ni sa sega ni kauta mai nai madrali vei Jiova e na kena gauna sa lokuci; ena cudruvi na tamata ko ya e na nonai valavala ca. 14Ia kevaka sa tiko vulagi kei kemudou e dua na kai tani, a sa ia na kana vata ni lako-sivia vei Jiova; me ia ga ko koya, me vaka nai vakaro kei na kenai valavala ni kana vata ni lako-sivia: me dua ga na kenai vakaro vei kemudou, vei koya sa vulagi, kei koya sai taukei.

15Ia e na siga sa vakaduri cake kina na vale ni Kalou, sa qai ubia na vale ni Kalou na o, io, na vale ni vunau: ia sa tiko e na vale ni Kalou e na yakavi ka sigavaka, ka sa vaka na bukawaqa na kenai rairai. 16Sa vaka tikoga kina: na o sa ubia e na siga; ka sa vaka nai rairai ni bukawaqa e na bogi. 17Ia ni sa kau cake na o mai na dela ni Vale tabu, era sa qai cavu tu na Isireli: ia e na vanua na tu vakadua kina na o, era sa tiko kina na Isireli. 18Na vosa i Jiova era sa lako kina na Isireli; na vosa talega i Jiova era sa tiko kina: na veisiga kecega sa tiko kina na o e na dela ni vale ni Kalou, era sa tiko ga. 19Ia ni sa tiko bogi vuqa na o e na dela ni vale ni Kalou, era sa qai vakabauta na ka sa lesia ko Jiova ko ira na Isireli, ka ra sega ni lako. 20Ia ni sa tiko bogi vica na o e na dela ni vale ni Kalou; era sa qai tiko ga me vaka na vosa i Jiova; ka ra sa lako me vaka na vosa i Jiova. 21Ka so na gauna sa toka na o mai na yakavi ka yacova na mataka, ia ni sa kau cake na o e na mataka, era sa qai lako: ni sa kau cake na o, e na siga se na bogi, era sa qai lako. 22Se ra bogi rua, se vula dua, se yabaki dua, sa tiko na o e na dela ni vale ni Kalou, era sa tiko ga na Isireli, ka sega ni lako: ia ni sa kau cake, era sa qai lako. 23Na vosa i Jiova era sa tiko ga kina, na vosa i Jiova era sa lako talega kina: era sa vakabauta na ka sa lesia ko Jiova, me vaka sa vakarota ko Jiova e na gusu i Mosese.

Vakavakadewa Makawa

©1974 Bible Society of the South Pacific

More Info | Version Index