Search form

Rom int

Outna kam

Pola gan timbiŋ rapara tirrinanna, ma toŋgorinanna, ma taŋga auŋ aniac Romna rɨtɨpacna laiplacara an ndeacrenanna watna. Na ma toŋgorinanna, ma minapmo kɨdrɨk emtemma minap eacna. Na iŋmbaia ma Spenna pitrikca taŋca kam wembaŋ laŋmo anna wiwitina. Na gan timbiŋ rapar mbuŋa Pola Karaisna kam wembaŋ laŋna kambmo mataua mbopca larurinanapa, titocna eteacna watna tɨpemb kirarira Iesusa raŋgairena meikramtaɨra morena.

Na out ŋgoinna Pola Romna Iesusa rɨpacrena laiplacarmo ra laŋa neaŋrina, na ma minmo aindoprina, ma mina moca memetmbaca mbendeia Raraŋ Aetaniacmo digica ma minmo otacna. Na iŋmbaia ma gan timbiŋ raparna kamna mɨnɨŋmo wiwitirena, “Meikramtaɨra mandaia Raraŋ Aetaniacna rɨtɨpac ŋgutiŋ te, Raraŋ Aetaniacna lamnɨac ŋgoutmo mina wandoŋ ndeacnande. Na mina iarwarna eteacna wat gidikap eacraŋnandet.” Na u gan timbiŋ raparna sapta 1 wes 17na inikca wat te, ma eacrena. Na Pola gaindoprina, meikramtaɨr muruŋcamiŋa mandaia Iudanaŋgeptan, co, Iudana meikramtaɨr wanaiŋ, mina muruŋa tɨp ŋgoreacna makukca morenan. Aintik Raraŋ Aetaniaca mina moca kadmaica ma minmo mac nda aŋgɨnande. Na meac, co, ramootta Iesus Karaisa rɨpac te, Raraŋ Aetaniaca manmo mac nda aŋgɨnande. Te, ma Raraŋ Aetaniacna aikndamootta larunandet, na ma Iesus Karaisna kaka ndarunandet.

Na Raraŋ Aetaniaca meac, co, ramoot ian mac nda aŋgɨ te, mana eteacna watta ŋgam ndarunande. Na Raraŋ Aetaniaca manap eacnande, na mana Ŋeroŋa manmo mbuki mɨnna tɨknande. Ainda moca tɨp ŋgoreacna makukapa memenaca manmo mo irikna gargarar kocor, na manmo bubuocna mɨnna wanaiŋ. Na sapta 5na mɨnna tɨkca taŋga sapta 8, Pola Raraŋ Aetaniacna tɨp wandɨkna mɨnɨŋna kambapa, Ŋeroŋ Ratna gargarna kamb ndoprina, na an Ŋeroŋ Ratta Iesus Karaisa rɨpacrena meikramtaɨrta eteacna watna inik ndeacreke, aiŋa morena.

Na sapta 9na tɨkca taŋca sapta 11, Pola ndona makuk aniacna kamb ndoprina. Na Pol tikca ma Iudanaŋgepta ramoot ian, na anna an meikramtaɨra atua Raraŋ Aetaniaca ndonan ŋgoinna moca larapacrinan. Na Iudanaŋgepta meikramtaɨrta wiwit anikca mina Iesusmo iŋ neaŋrena. Na Iudana meikramtaɨr wanaiŋna wɨtta, mina Iesusna iŋa raŋgairena meikramtaɨr ndarurina. Ri, Pola aindoprina, anna Iudanaŋgepta meikramtaɨrta makuk. Na mina an reac aniaca Raraŋ Aetaniaca minmo monanna, mina mba watta rapacri. Aintik Pola gaind ndamŋirina, iŋmbaia Iudanaŋgepta meikramtaɨrta wiwit toco, mina Iesusna wiwitna tumbunna mbuknandet.

Na mana mamamaina timbiŋ raparna kambca, ma an tɨpemb kirarira Iesusa rɨpacrena laiplacarmo anna raŋgaina mbopatna. Na ma aindopatna, kabena meikramtaɨrmo mamatŋi ŋgoinna tɨpemb kirarira moraŋ. Na ma Raraŋ Aetaniacna aiŋa momona kamb toco ma mboprina, na gan tiacarpaikna ramtaɨr paŋaindta kaŋgauk eacna kamb ndopri, na kabena meikramtaɨrmo otacna kambca ma mboprina.

Raraŋ Aetaniacna Kam Wembaŋ Laŋ

© Pioneer Bible Translators Association of Papua New Guinea, Inc.

© Pioneer Bible Translators of Dallas, Texas, USA

More Info | Version Index