Search form

Sirach (Ecclesiasticus) 1

CAB. I.

1Ta dy chooilley chreenaght cheet veih’n Chiarn, as mârishyn te tannaghtyn son dy bragh.

2Quoi oddys earroo y ghoaill jeh genniagh ny marrey, as jeh ny bineyn fliaghee, as y traa gyn toshiaght, gyn jerrey?

3Quoi oddys toiggal yrjid niau, as lheead y thallooin, as diunid ny marrey, as creenaght?

4Ta creenaght er ny ve ayn roish dy chooilley nhee, as ta fysseree e hushtey veih er-dy-rieau.

5Ta goo yn Jee smoo syrjey bun e chreenaght; as ta ny raaidyn ecksh annaghyn dy bragh breeoil.

6Quoi da ta bun creenaght er ve er ny hoilshaghey, ny quoi ta toiggal e coyrleyn creeney?

7[Quoi da ta tushtey e chreenaght er ny ve soilshit? as quoi ta dy slane er hoiggal e obbraghyn yindyssagh?]

8Ta un er ayn ynrycan creeney, as ard-aggle dy ve goit roish; eer y Chiarn ta ny hoie er e stoyl-reeoil.

9Ren eh ish y chroo, as ghow eh yn baght eck, as yn earroo jee, as heeyn eh magh ee er ooilley e obbraghyn.

10T’eeish marish dy chooilley chretoor cordail rish e yioot, as t’eh er choyrt ee dauesyn ta graihagh er.

11Ta aggle y Chiarn ooashley as gloyr, as gennallys, as attey dy voggey.

12Ta aggle y Chiarn jannoo cree gennal, as te coyrt boggey as gerjagh, as bea liauyr.

13Quoi erbee, ayn ta aggle y Chiarn, hig eh jeh dy mie ec y jerrey, as yiow eh foayr ec laa e vaaish.

14Dy ghoaill aggle roish y Chiarn, te bun dy chooilley chreenaght: as ve er ny chummey marish y chloan ynrick ayns y vreïn.

15T’ee er hoiaghey undin dy bragh farraghtyn marish deiney, as nee ee tannaghtyn marish nyn sluight.

16Dy ghoaill aggle roish y Chiarn, she shen yn ard-chreenaght; as t’ee jannoo magh cloan gheiney lesh ny messyn eck:

17T’ee dy lhieeney ooilley nyn dhieyn lesh nheeghyn mie, as ny thieyn-tashtee lesh bishaghey.

18Ta aggle y Chiarn attey dy chreenaght, cur er shee as slaynt firrinagh dy vlaaghey, as t’ad shoh ny neesht giootyn Yee: as te dy vishaghey yn voggey ocsyn ta graihagh er.

19Ta creenaght shilley neose schleï, as tushtey dy hoiggal, as t’ee dy hroggal seose adsyn gys ard-ooashley, ta cummal dy kinjagh mâree.

20Te fraue creenaght dy ghoaill aggle roish y Chiarn, as ta ny banglaneyn echey bea liauyr.

21Ta aggle y Chiarn dy eiyrt ersooyl peccah, as cre-erbee yn raad te, te castey jymmoose.

22Cha vod dooinney eulyssagh ve er ny heyrey, son nee aile e eulys eh hene y stroie.

23Foddee dooinney soccaragh surranse son traa; agh fy-yerrey hig boggey ny whail.

24Nee eh e ghoan y smaghtagh son traa, as nee meillyn ymmodee fockley magh e chreenaght.

25Ta raaghyn tushtey ayns tashtaghyn creenaght: agh ta craueeaght dwoaiagh da’n vee-chrauee.

26My t’ou geearree creenaght freill ny annaghyn, as nee yn Chiarn giootal ort ee.

27Son ta aggle y Chiarn creenaght as ynsagh: as ta credjue as meenid yn taitnys echeysyn.

28Ny bee lhag-hreishteilagh ayns aggle y Chiarn, tra t’ou boght: as ny tar kiongoyrt rish lesh cree dooble.

29Ny bee dty er-crauee-oalsey ayns shilley gheiney, as gow kiarail vie cre t’ou dy loayrt.

30Ny bee mooaralagh, er-aggle dy duitt oo, as dy dayrn oo scammylt er dty annym, as myr shen dy jean Jee dty pheccaghyn follit y hoilshaghey, as oo y cherraghey fenish ooilley yn pobble; er-yn-oyr nagh daink oo ayns ynrickys gys aggle y Chiarn, agh dy vel dty chree lane dy volteyrys.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index