Search form

Sirach (Ecclesiasticus) 15

CAB. XV.

1Nee eshyn ta ayns aggle y Chiarn jannoo dy mie, as eshyn ta tushtagh ’sy leigh, nee ish y chosney.

2As myr moir ver ee quaaltys da, as goaill-rish myr ben-aeg noa-poost.

3Lesh yn arran dy hushtey nee ish eshyn y veaghey, as ver ee da yn ushtey dy chreenaght dy iu.

4Ver eh e varrant urree, as cha bee eh er ny scughey; nee eh treishteil urree, as cha bee eh ny haart.

5Nee ish eshyn y hroggal erskyn e naboonyn, as ayns mean y cho-chruinnaght, nee ish fosley e veeal.

6Yiow eshyn boggey as attey dy varriaght, as ver ee da ayns eiraght goo as ennym foddey beayn.

7Agh son deiney ommijagh, cha jean ad ee y chosney, as cha jean drogh-gheiney cur-my-ner ee.

8Son t’ee foddey veih moyrn, as son breagyryn cha vel ad smooinaghtyn urree.

9Cha vel raaghyn-creeney cooie ayns beeal drogh-ghooinney, son cha row eh curmit er veih’n Chiarn.

10Son bee raaghyn-creeney er n’ockley magh lesh tushtey, as nee yn Chiarn jannoo mie jeh.

11Ny abbyr uss, She kyndagh rish y Chiarn huitt mee ayns peccah: son cha lhisagh oo jannoo ny reddyn ta dwoaie echey orroo.

12Ny abbyr uss, T’eh er choyrt orrym goll er-shaghryn: son cha vel feme echey er dooinney peccoil.

13Ta dwoaie ec y Chiarn er dy chooilley ghrogh-obbyr, as adsyn ta ayns aggle Yee cha nhynney lhieu eh.

14Eshyn eh chroo dooinney ’sy toshiaght, as daag eh eh ayns laue e choyrle hene:

15My sailt; dy reayll ny annaghyn, as dy chooilleeney yn ynrickys taitnyssagh,

16T’eh er hoiaghey aile as ushtey kiongoyrt rhyt; sheeyn magh dty laue, as gow dty reih.

17Kiongoyrt rish dooinney ta bioys as baase, as bee e reih hene er ny choyrt da.

18Son s’mooar ta creenaght y Chiarn, t’eh niartal ayns pooar, as cur-my-ner dy chooilley nhee.

19As ta e hooillyn orroosyn ta goaill aggle roish, as shione da ooilley obbraghyn dooinney.

20Cha vel eh er n’êginaghey dooinney erbee dy yannoo dy olk, chamoo t’eh er choyrt da dooinney erbee kied dy chur-rish peccah.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index