Search form

Sirach (Ecclesiasticus) 2

CAB. II.

1My vac, my t’ou cheet dy hirveish y Chiarn, kiare dty annym son seaghyn.

2Niartee dty chree, as jean gymmyrkey oo hene dy dunnal, as ny eiyr er drogh haaseyn dy haghney seaghyn.

3Cum shickyr huggey, as ny scugh dy lhiattee, dy vod oo ve er dty vishaghey ec y jerrey.

4Cre-erbee hig dty raad gow dy mie rish: as bee surransagh tra t’ou er ny chaghlaa gys stayd injil.

5Son ta airh er ny phrowal ayns yn aile, as deiney cairal ayns y choirrey dy heaghyn.

6Cred aynsyn, as nee eh cooney lhiat, freill dty chesmadyn dy kiart, as cur dty hreishteil ayn.

7Shiuish ta goaill aggle roish y Chiarn, farkee jee er e vyghin, as ny gow-jee dy lhiattee, er aggle dy duitt shiu.

8Shiuish ta goaill aggle roish y Chiarn, cred-jee ayn, as cha jean nyn leagh failleil.

9Shiuish ta goaill aggle roish y Chiarn, jeeagh-jee son bannaght, as son boggey dy bragh farraghtyn, as myghin.

10Jeeagh-jee gys sheelogheyn y chenn earish, as toig-jee: row rieau fer erbee, hug e hreishteil ayns y Chiarn, er ny choyrt mow? ny row rieau fer erbee, ren tannaghtyn ayns e aggle, er ny hreigeil? ny quoi ren eh rieau soiaghey beg jeh, ren geamagh er?

11Son ta’n Chiarn lane dy hymmey as dy vyghin; foddey-surransagh, as feer erreeishagh, as leih peccaghyn, as sauail ayns earish seaghyn.

12Smerg da’n moal-chreeagh, as y lhag-lauee, as y peccagh ta goaill daa raad.

13Smerg da’n moal-chreeagh, son ta e chredjue faase, shen-y-fa cha bee eh er ny choadey.

14Smerg diuish t’er choayll nyn meenid fo surranse: as cre’n erree hig erriu, tra lhieys y Chiarn e laue erriu?

15Adsyn ta goaill aggle roish y Chiarn, cha bee ad mee-viallagh gys e ghoo, as adsyn ta graihagh er, freillee ad e raaidyn.

16Adsyn ta goaill aggle roish y Chiarn, eiyree ad er shen ta taitnyssagh huggeysyn, as adsyn ta graihagh er, bee ad jeant magh lesh e leigh.

17Adsyn ta goaill aggle roish y Chiarn, kiartee ad nyn greeaghyn, as nyn anmeenyn y injillaghey ayns e hilley.

18Gra, Lhig dooin tuittym ayns laueyn y Chiarn, as cha nee ayns laueyn deiney: son lheid as ta e ard-ooashley, lheid cheddin ta e vyghin.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index