Search form

Sirach (Ecclesiasticus) 22

CAB. XXII.

1Ta dooinney litcheragh er ny hoylaghey gys clagh ’sy laagh, as nee dagh unnane craidey mysh gys e nearey.

2Ta dooinney litcheragh er ny hoylaghey gys trustyr: nee dy chooilley unnane ta bentyn rish craa ass e laue eh.

3Ta mac dy ghrogh-ynsagh mee-ooashley e ayr hooar eh: as ta inneen [ommijagh] ruggit gys e assee.

4Ver inneen chreeney lh’ee eiraght gys e sheshey; agh t’eeish ta beaghey neu-onneragh trimshey da e ayr.

5Nee yn unnane ghaaney tayrn scammylt chammah er e ayr as e sheshey, agh nee ad ny-neesht beg y hoiaghey j’eeish.

6Ta naight ass imbagh cooie myr ronneeaght ec farrarey: agh ta oghsan as smaght dy chreenaght cooie ec dy chooilley hraa.

7Quoi-erbee ta gynsaghey ommydan, t’eh casley rishyn ta thah yn shlig, as casley rishyn ta doostey fer ass cadley trome.

8Ta eshyn, ta ginsh skeeal da ommydan, loayrt rish fer ta ayns saveenys: lurg da v’er n’insh e skeeal, jir eh, Cre ta’n chooish?

9My ta cloan beaghey dy onneragh, as fort oc, nee ad coodaghey ymmyrch nyn ayraghyn.

10Agh adsyn ta gymmyrkey ad hene dy moyrnagh, as dy mooaralagh, trooid drogh-ynsagh, nee tayrn scammylt er ooashley nyn gynney.

11Jean dobberan son y varroo, son t’eh er choayl y toilshey; as jean dobberan son ommydan, son t’eh gyn tushtey: ny jean agh beggan dobberan son y varroo, son t’eh ec fea: agh ta bea yn ommydan ny smessey na baase.

12Slane shiaghtin ta deiney dobberan son y varroo; agh son ommydan as dooinney mee-chrauee, ooilley laghyn e vea.

13Ny jean cooid vooar dy haggloo rish ommydan, as ny jean sheshaght rish fer mee-hushtagh: bee er dty hwoaie jeh er-aggle dy vow seaghyn, as cha bee oo dy bragh mollit lesh e ommijys: shaghyn eh, as yiow fea, as cha bee oo boirit lesh e vee-cheïlid.

14Cre ta ny s’trimmey na leoaie? as cre ta’n ennym echey, agh ommydan?

15Ta genniagh, as sollan, as errey dy yiarn, ny s’assey dy v’er ny ymmyrkey, na dooinney gyn tushtey.

16Myr nagh vod fuygh ta kianlt as juntit dy cheilley ayns buildal, v’er ny lhaggaghey lesh craa: myrgeddin yn cree t’er ny hickyraghey lesh coyrle vie, cha gow eh aggle ec traa erbee.

17Ta cree t’er ny hickyraghey er smooinaghtyn creeney, goll-rish plaistyral aalin er voalley galleree.

18Myr nagh vod radling troggit er yn yrjey shassoo noi niart ny geayee: myr shen cha vod cree agglagh, ayns smooinaghtyn ommydan, shassoo noi aggle erbee.

19Eshyn ta coyrt gah ’sy thooill, ver er jeir tuittym; as eshyn, ta coyrt guin ’sy chree, ver er soilshaghey e hushtey.

20Quoi-erbee hilgys clagh er eeanlee, scaa-ee eh ad ersooyl: as t’eshyn, ta goltooaney e charrey, brishey caardys.

21Ga dy hayrn oo cliwe er dty charrey, foast ny jean mee-hreishteil: son foddee foast coardail y ve eddyr shiu.

22My t’ou er n’osley dty veeal noi dty charrey, ny gow aggle: son foddee shee ve jeant: er-lhimmey son oltooan, ny moyrn, ny brah folliaghtyn, ny builley follit: son ver ny reddyn shoh scarrey eddyr eer caarjyn.

23Bee firrinagh gys dty naboo ayns e voghtynid, dy vod oo boggey ’ghoaill mârish ayns e vaynrys: shass liorish dy shickyr ayns earish e heaghyn, dy vod cronney ’ve ayd mârish ayns e eiraght: son cha vel stayd injil dy kinjagh as beg dy v’er ny hoiaghey jeh: chamoo yn berchagh ta ommijagh, as ard-soiagh dy ve jeant jehsyn.

24Myr ta bree as jaagh y choirrey goll roish yn aile: myrgeddin ta oltooan roish fuill.

25Cha goym nearey dy endeil carrey: chamoo nee’m keiltyn mee-hene veih.

26As my haghyrys olk erbee dou liorish, bee dy chooilley unnane chlinnys jeh er nyn dwoaie jeh.

27Quoi hoieys arrey roish my veeal, as seal dy chreenaght er my veillyn, nagh duittym doaltattym lioroo, as nagh jean my hengey my stroie?

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index