Search form

Sirach (Ecclesiasticus) 26

CAB. XXVI.

1S’maynrey yn dooinney t’er gheddyn ben-heshey vie; son bee earroo e laghyn er ny ghoobley.

2S’mooar y gerjagh ta ben-heshey vie da e dooinney; son nee eh ceau laghyn e heihll ayns shee.

3Ta ben vie ny reih toghyr, kiarit son leagh dauesyn t’ayns aggle y Chiarn.

4Scummey boght ny berchagh, my ta dooinney jeidjagh gys y Chiarn, bee eh dy kinjagh as gien mie er e eddin.

5Ta aggle my chree orrym roish three reddyn; as roish y chiarroo va mee er-creau: drogh-ghoo yn sleih, irree-magh y theay mee-reiltagh, as cassid foalsey: t’ad shoh [nyn droor] ny smessey na’n baase.

6Agh treihys er treihys, ben gheadagh, as gah yn chengey gyn-tort.

7Te ny s’doillee dellal rish y drogh-ven heshey, na rish cubbyl dy ghew ta gobbal tayrn: t’ee myr scorpion ny laue echeysyn ta lhiantyn r’ee.

8Ta ben veshtal, as cartage ny dhieyn doostey lane boirey, as cha jean ee keiltyn y nearey eck hene.

9Yiow baght er streebagh liorish e shilley daaney, as sooill rouanagh.

10My ta dty inneen gyn-nearey, freill ee fo smaght geyre, er-aggle dy der ee naardey ee hene lesh rouyr reamys.

11Bee er dty hwoaie roish sooill ghaaney, cha n’yrrys jee tayrn scammylt ort.

12Bee ee cha jollyssagh as y troailtagh paagh, ta er daghyrt er ushtey: iuys ee ass dy chooilley phoyll ta ’sy roshtyn; hed ee er e cosaayl fo dy chooilley hammag, as shin-y-mea da dy chooilley vaarderagh.

13Agh ta ben ghraysoil boggey da e sheshey: ta e ymmyrkey feudagh myr smuir ayns e chraueyn.

14Ta ben sheeoil as dooie gioot veih yn Chiarn: as s’mooar sheeagh yn aigney bwaagh-beasagh!

15Ta ben feudagh as beasagh ny ard-vannaght, as ta’n aigney sheelt ecksh erskyn dy chooilley leagh.

16Myr y ghrian tra te er droggal gys yrjid y vunlaa: shen myr ta aalid y ven frioosagh ayns gordrail e thie.

17Myr y soilshey aalin er y chainlere casherick [’sy chiamble:] shen myr ta aalid yn eddin ayns niart yn aegid.

18Myr ny pillaryn airhey er socketyn argid: shen myr ta gymmyrkey-bea feudagh lesh cree ynrick.

19My vac, freill follan blaa dty aegid; as ny baare dty niart er mraane joarree.

20My ta dty chronney ayns magher messoil, cuirr eh lesh dty rass hene, treishteil gys sluight follan dty ghooghys.

21Myr shoh faagys oo goo-mie da dty luight, as bee boggey oc jeh nyn gynney ooasle.

22Cha vel ’sy theihll cretoor s’eajee na beisht dy ghrogh-ven; agh ta ben vie myr toor noi yn baase da e sheshey.

23Ta drogh-ven cronney yn drogh-ghooinney: agh ta ben vie currit dasyn ta goaill aggle roish y Chiarn.

24Ver drogh-ven nearey cooyl e coshey: agh ver ben vie ammys da e sheshey.

25Cha bee scansh y voddee soit jeh ben gyn-nearey: agh bee ben feudagh ayns aggle y Chiarn.

26Yiow ish, ta ammyssagh da e sheshey, slane goo yn ven chreeney: agh hig faghid as drogh-imraa yn theihll urreeish ta craa e moyrn er.

27Bee briaght foddey as gerrit jeant son postyr dy ven veeallagh, ee hene ver scaalhean er nyn noidyn.

28Ta daa red ta cur sneih er my chree, as ta’n trass greinnaghey my chorree: Dooinney-caggee surranse boghtynid, deiney creeney fo faghid, as y dooinney ta chyndaa veih cairys gys peccah, lheid y fer ta’n Chiarn faagail magh son y chliwe.

29S’coan oddys marchan ve seyr veih aggair, ny pedlar veih dellal volteyragh.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index