Search form

Sirach (Ecclesiasticus) 28

CAB. XXVIII.

1Gowee yn Chiarn cooilleen ersyn ta goaill cooilleen [er e naboo:] son shickyrys cha bee e loghtyn er ny yarrood da.

2Leih da dty naboo yn assee t’eh er n’yannoo dhyt, as yiow hene leih dty loghtyn ayns dty phadjer.

3Ta dooinney ayns noidys rish dooinney: as vel e lheid shirrey leih er Jee?

4Cha vel myghin echey er dooinney jeh e ghooie hene: as vel eshyn shirrey leih son e loghtyn hene?

5My ta eshyn, ta eh hene ny pheccagh, freayll roon ayns e chree; quoi nee loayrt ass e lieh, son pardoon e ghrogh-yannoo?

6Cooinee er dty yerrey, faag void noidys; as smooinee er marvaanys as y baase, as freill ny annaghyn.

7Cooinee er ny annaghyn, as ny freill goanlys noi dty naboo: cooinee er conaant yn er smoo syrjey, as gow leshtal son ny mee-hushtee.

8Cur cooyl da streeu, as nee oo leodaghey dty loghtyn: son nee dooinney eulyssagh greesey seose streeu.

9Ta dooinney streeuagh doostey anvea eddyr caarjyn, as jannoo boirey mastey ny sheeoil.

10Myr ta stoo yn aile lheid shen ta e lossey: as myr ta niart y dooinney, myr shen ta e yymmoose; as rere myr ta e verchys, ta e chorree troggal; as myr stroshey ta ny streeualtee wheesh shen s’dewil vees nyn streeu.

11Ta streeu siyragh foaddey yn aile; as buillaghyn siyragh tayrn fuill.

12My heidys oo er y smarage, nee eh lossey; ceau shelley er, as bee eh er ny vooghey: as t’ad shoh ny-neesht cheet magh ass dty veeal.

13Cur dty vollaght er y chooyl-chassidagh, as y chengey lhiam as lhiat: son ta nyn lheid er stroie ymmodee va ayns shee.

14Ta chengey chooyl-chassidagh er heaghney ymmodee, as er nyn imman veih ashoon gy-ashoon; te er lhieggal ard-valjyn lajer, as er scaalheaney thieyn deiney mooarey gys y thalloo.

15Ta chengey chooyl-chassidagh er n’eebyrt magh eer mraane mie voish nyn gummallyn, as er hayrn orroo uail nyn gooid.

16Quoi-erbee eaishtys rish, cha vow eh fea, as cha gum eh dy bragh ayns shee.

17Ta builley yn chip faagail cronnyn ’syn eill: agh ta builley yn chengey brishey ny craueyn.

18Shimmey t’er duittym liorish foyr y chliwe; agh ta ny shlee er duittym liorish y chengey.

19S’maynrey eshyn t’er ny choadey voish, as nagh vel er n’ennaghtyn yn ghuin echey; nagh vel er hayrn fo’n whing echey, ny er ve kianlt lesh ny geulaghyn echey.

20Son ta’n whing echey ny whing dy yiarn, as ny boandaghyn nyn moandaghyn prashey.

21Ta’n baase echey ny vaase dewil, ta’n oaie ny share na eh.

22Cha bee reill echey harrystoosyn ta ayns aggle Yee, chamoo vees ad losht lesh yn lossey echey:

23Nee adsyn ta treigeil y Chiarn tuittym fo, as nee eh lostey ayndoo, as cha bee eh er ny vooghey, bee eh lhiggit orroo myr lion, as myr leopard nee eh stroie ad.

24Jeeagh dy der oo cleiy drineagh mysh dty chummal, as dy dasht oo dy kiaralagh dty argid as dty airh:

25As jean dty ghoan y howse ayns meih, as dooin seose dty veeal lesh dorryssyn as boltyn.

26Jeeagh royd nagh jean oo skirraghtyn liorish; er-aggle dy vow lhieggey kiongoyrt rishyn ta lhie cooyl-chlea er dty hon.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index