Search form

Sirach (Ecclesiasticus) 29

CAB. XXIX.

1Nee dooinney chymmoil geeasagh da e naboo, as t’eshyn ta niartaghey e laue freayll ny annaghyn.

2Eeasee da dty naboo ayns traa e eme, as eeck dty eeasaght ayns traa cooie.

3Bee er dty ockle, as dell dy firrinagh rish, as yiow dy kinjagh cooid dty ymmyrch.

4Shimmey t’ayn, ta coontey ny va eeasit daue dy ve muir-cherraghtyn, as coyrt adsyn gys seaghyn t’er chooney lhieu.

5Derrey t’eh er gheddyn, nee eh paagey dty laue, as son argid e naboo nee eh loayrt dy ammyssagh: agh tra lhisagh eh geeck, lhiggee eh shaghey, as ver eh jeh oo lesh gaccan as plaiynt er y traa.

6My nee eh geeck, s’coan yiow yn derrey lieh, as nee oo jeeaghyn er myr cooid chosnit: mannagh jean, t’ou er hayrn ort hene coayl dty argid, as er gheddyn noid gyn oyr: t’eh geeck lesh mollaghtyn as oltooan: as son goo-mie ver eh drogh-ennym dhyt.

7Ta ymmodee, er-y-fa shen, t’er n’obbal geeasaght son drogh-ghellal sleih elley, er-aggle dy bee ad mollit.

8Ny-yeih cur uss dayll da’n voght, as ny bee lhiastey dy ve chymmoil da.

9Cooin lesh y voght er graih yn sarey, as ny cur cooyl rish er coontey e voghtynid.

10Cur magh dty argid son dty vraar, as dty charrey, as ny lhig da lhie mergagh, as gyn-ymmyd fo-chlagh.

11Stoyr seose dty verchys cordail rish saraghyn y Smoo-syrjey, as yiow use jeh ny share na airh.

12Cur jeirk seose ayns dty hieyn tashtee; as nee eh dty livrey veih dy chooilley heaghyn:

13Nee eh caggey er dty hon noi dty noidyn ny share na scape-caggee, ny shleiy lajer.

14Ta dooinney coayr goll raane roish e naboo: agh nee fer gyn-nearey treigeil eh.

15Ny jarrood turn mooinjerey dty raantagh, son t’eh er n’ghialtaghey e vioys er dty hon.

16Ver y drogh-ghooinney naardey stayd vie e raantagh:

17As nee eshyn, ta jeh aigney neu-wooisal, faagail ayns gaue eshyn ren livrey eh.

18Shimmey’n fer souyr ta raanteenys er stroie, as er n’eebyrt eh noon as noal myr tonn ny marrey: ard-gheiney te er n’imman veih nyn dhieyn, dy ve wagaantee mastey ashoonyn joarree.

19Nee drogh-ghooinney, ta brishey annaghyn y Chiarn, tuittym ayns raanteenys: as nee eshyn ta goaill ayns laue, as geiyrt da cooishyn sleih elley, son faill, tuittym fo seaghyn leighderys.

20Cooin lesh dty naboo rere dty phooar, as bee er dty hwoaie nagh duitt oo hene fo yn chooid cheddin.

21Ta ny ard-reddyn son beaghey, ushtey, as arran, as coamrey, as thie dy choodaghey nearey.

22Ta beaghey yn dooinney boght ayns eer bwaag, ny share na farrail vie ayns thie dooinney elley.

23Lhig da ve mooar ny beg, bee booiagh lesh, nagh glin oo oltooan dty hie.

24Son s’treih yn seihll eh, dy gholl veih thie dy thie: son raad t’ou dty yoarree cha by-loys dhyt fosley dty veeal.

25Ver oo cuirraghyn, as jannoo gien, gyn veg y vooise: ny-sodjey na shoh, nee oo clashtyn goan fargagh: [lheid as]

26Tar, uss yoarree, as soie magh dty voayrd, as jean magh mee lesh ny t’ayd aarlit;

27Jean room, uss yoarree, da dooinney ooasle, ta my vraar cheet dy ghoaill aaght mârym, faag dou my hie.

28Ta ny reddyn shoh seaghnagh da dooinney keeayllagh: oltooan dy aaght, as cassid yn eeasyder.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index