Search form

Sirach (Ecclesiasticus) 30

CAB. XXX.

1Eshyn shynney lesh e vac, t’eh smaghtagh eh dy mennick, dy vod eh ve son boggey da fy-yerrey.

2Yiow eshyn ta smaghtaghey e vac boggey jeh, as bee eh son gerjagh da mastey e ainjyssee.

3Eshyn ta gynsaghey e vac, t’eh coyrt sneih er e noid: as fenish e chaarjyn bee boggey echey jeh.

4Ga dy vow e ayr baase, t’eh myr fer nagh vel foast er n’immeeaght: son t’eh er n’aagail fer ny-yeï ta goll-rish hene.

5Choud as va seihll echey, honnick eh as ghow eh boggey ayn: as tra hooar eh baase, cha row trimshey er.

6Daag eh ny-yeï cooilleeneyder noi e noidyn, as fer yeeaghys kenjallys da e chaarjyn.

7Eshyn ta dy ro vettey troggal e vac, ver eh e chione-lajerys er y hoshiaght, as seaghyn er e chree hene dy chooilley hraa t’eh geam.

8Bee cabbyl nagh row rieau fo laue creoi-veeallagh; as hed lhiannoo, lesh rouyr jeh e raad hene, gour e vullee.

9Jean babban jeh dty vac, as ver eh sou er dty aigney: cur drogh-ynsagh da, as ver eh chingys er dty chree.

10Ny jean ommydan jeed hene mârish, er-aggle dy bee oo trimshagh mârish, as dy nee snaggeraght feeacklyn vees y jerrey.

11Ny cur rouyr jeh e raad hene da ayns e aegid, as ny jeigh dty hooillyn er e ommijys.

12Freill eh fo smaght choud as t’eh aeg, as cur e chustym da choud’s t’eh ny lhiannoo; er aggle dy bee eh kione lajeragh, as mee-viallagh dhyt, as myr shen tayrn seaghyn er dty chree.

13Smaghtee dty vac, as bee jeidjagh dy chur ynsagh da, er aggle dy dayrn e ghrogh-ymmyrkey scammylt ort hene.

14Ta’n boght ta slane follan ny share na’n berchagh goarley-ching.

15Ta slaynt as corp follan ny reih er airh erbee, as callin ghastey erskyn ymmodee berchys.

16Cha vel berchys ’sy theihll ny share na slaynt y challin, ny gerjagh erbee erskyn boggey yn chree.

17Ta’n baase ny share na bea seaghnagh, ny chingys kinjagh.

18Ta bee blaystal da beeal gyn blass, myr mooarane gien er beeal yn oaie.

19Cre’n scansh t’ec y jalloo er chebballyn? son cha vod eh edyr gee ny soaral: lheid cheddin ta eshyn ta’n Chiarn seaghney.

20T’eh blakey lesh e hooillyn, as piantaanagh, as osnaghey myr eunuch as moidyn ny oghrish.

21Ny lhig da trimshey lhieeney harrish dty chree, as ny seaghnee oo hene, mannagh jig dty yeearree lhiat.

22Ta cree bannee-boggoil medshin y vea, as saase dy choyrt seihll liauyr.

23Bee dooie da dty annym hene, as gerjee dty chree, scugh trimshey foddey voïd; son ta trimshey er ve baase ymmodee, as cha vel foays erbee ayn.

24Ta troo as farg giarey seihll dooinney, as ta imnea tayrn shenndeeaght roish y traa.

25Nee cree ooasle as mie goaill soylley jeh e vee as e veaghey.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index