Search form

Sirach (Ecclesiasticus) 31

CAB. XXXI.

1Ta kiarail son berchys shymley yn eill, as ta’n imnea mysh nyn dashtey castey cadley.

2Myr ta doghan dowil brishey’n cadley, shen myr ta kiarail imneagh freayll dooinney veih saveenys.

3S’mooar y tooilleil t’er y verchagh ayns coyrt seose berchys, as tra t’eh er gheddyn e haie, t’eh goaill soylley jeh e chooid.

4Ta’n boght tooilleil dy deinagh ayns e voghtynid, as lurg ooilley t’eh dy kinjagh ayns feme.

5Cha bee eshyn gyn loght ta sayntoilagh er airh, as eshyn ta coyrt rish drogh-ghellal yiow eh e haie jeh.

6Shimmey ta airh er stroie, as va nyn doyrt-mow er-gerrey daue.

7Te ny ribbey dauesyn ta jannoo nyn yee jeh, as bee dy chooilley vee-hushtagh er ny ghoaill ayn.

8Bannit ta’n berchagh ta er ny gheddyn gyn-loght, as nagh vel er choyrt e hreishteil ayns airh.

9Quoi eh hene? as nee mayd genmys eh bannit: son reddyn yindyssagh t’eh er n’yannoo mastey e phobble.

10Quoi t’er ve prowit liorish, as er ny gheddyn ynrick? eisht lhig da boggyssagh. Quoi oddagh jannoo aggair, as nagh vel er n’yannoo eh? ny, jannoo olk, as nagh vel er n’yannoo eh?

11Bee e chooid er ny vishaghey, as nee’n pobble soilshaghey magh e yiastyllys.

12My t’ou soie ec boayrd sonney, ny foshil dty yollys er, as ny abbyr, S’mooar dy vee t’er!

13Cooinee dy vel drogh-hooill ny red eajee: as cre er feaï-ny-cruinney ta ny smessey na’n thooill? shen-y-fa te mooaraghey er dy chooilley hyndaa.

14Ny sheeyn magh dty laue dy ghoaill cre-erbee dy naïlt hene, as ny jean daanys mârish ayns y chlaare.

15Smooinee jeh dty naboo myr jeed hene: as bee feudagh er dy chooilley aght.

16Ee dy feudagh myr dooinney, lheid as t’er dty veealloo, as ny ee dy jollyssagh, nagh der sleih feoh dhyt.

17Scuirr hoshiaght er graih feudys; as ny bee jollyssagh er-aggle dy der oo corree.

18Tra t’ou soie ayns sheshaght, ny bee yn chied er dy heeyney magh dty laue.

19Ta kuse fardalagh jannoo magh dooinney feudagh, as cha vel eh pantoogh er e lhiabbee.

20Ta cadley kiune cheet voish sheeltys, t’eh girree dy moghey, as ta e cheeayll mârish; agh ta coayl cadley, goarley-gailley, as pianyn y volg, marish y dooinney jollyssagh.

21As my t’ad er ghairrail bee ort trog ort, immee magh, tilg, as yiow fea.

22My vac, eaisht rhym, as ny soie beg jee’m, as ec y jerrey yiow my raa’s firrinagh: ayns ooilley dty obbraghyn bee gastey, myr shen cha jig chingys erbee dty choair.

23Quoi-erbee ta feoilt mysh e vee, loayree sleih dy mie jeh, as bee goo sonnys e hie er ny chredjal.

24Agh bee drogh-ghoo sleih ec y phiddeog as boiddagh: as bee imraa e phiddeogys er ny phrowal.

25Ny treisht gys dty hroshid ayns iu: son shimmey ta feeyn er stroie.

26Myr ta’n foyr er ny phrowal liorish thummey ’syn ushtey: myr shen ta jough prowal yn cree mooaralagh.

27Ta jough coyrt cree ayns dooinney, my te iu’t dy feudagh: cre’n cree eisht t’ec dooinney ta fegooish bine dy yough? son ve jeant dy ooraghey dooinney.

28Ta jough, my te iu’t dy sheelt, as ayns traa feme, coyrt gennallys ’sy chree, as aash gys yn aigney.

29Agh ta neu-heeltys ayns jough tayrn marish sherriuid-aigney, beealeraght, as fuilliaghtee.

30Ta meshtallys doostey eulys yn ommydan dy yannoo olk: te leodaghey yn niart, as jannoo lhottyn.

31Ny jean goltooan dty naboo ec y jough, as ny soie beg jeh ayns e yennallys: ny cur glare brasnee da, as ny chion y cappan er.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index