Search form

Sirach (Ecclesiasticus) 35

CAB. XXXV.

1Eshyn ta freayll leigh Yee, t’eh chebbal oural slane-fondagh: as eshyn ta biallagh gys yn anney, t’eh chebbal oural-shee.

2Eshyn ta dy booisal jannoo cooilleeney son thurn mie, t’eh dy ouralley flooyr meein: as eshyn ta cur jeirk, t’eh jannoo oural taitnyssagh.

3Ta Jee er ny wooiys tra ta cooyl er ny choyrt da’n olk, as liorish treigeil neu-ynrickys ta fer jannoo lhiasaghey.

4Cha jig oo fenish y Chiarn lesh laue follym.

5As t’ad shoh ooilley kianlt ort liorish anney Yee.

6S’mea ta ourallyn ny ynrickee jannoo yn altar, as s’eunyssagh te troggal seose fenish yn er smoo syrjey!

7Bee soiagh jeant jeh oural y dooinney ynrick, cha bee yn imraa jeh dy bragh jarroodit.

8Eeck e cheesh da’n Chiarn lesh feoiltys dty hooill vie; as ny jean leodaghey chied-vessyn dty laue.

9Eeck ooilley dty cheeshyn lesh eddin arryltagh, as jean casherickey dty yagheenyn lesh cree feoiltagh.

10Cur da’n er smoo syrjey, myr t’eh er dty vannaghey, as rere dty chosney cur voïd lesh sooill ghennal.

11Son ta’n Chiarn cooilleeney, as nee eh dty vishaghey shiaght-filley.

12Agh ny smooinee liorish shoh dy chosney foayr; son cha vel Jee soiaghey jeh lheid; as ny cur dty varrant er ourallyn neu-ynrick, son ta’n Chiarn ny vriw, as cha vel eh jannoo soiagh jeh persoonyn.

13Cha jean eh soiaghey jeh persoon erbee noi dooinney boght: agh ver eh clashtyn da’n accan ocsyn ta tranlaasit.

14Cha jean eh soiaghey beg jeh aghin y chloan gyn-ayr; ny jeh’n ven-treoghe, tra t’ee gaccan huggey.

15Nagh vel ny jeïr roie sheese er keeillyn y ven-treoghe? as nagh vel yn eam eck noi-syn ta oyr nyn duittym?

16Bee soiagh foayroil ny chour-syn ta shirveish y Chiarn, as nee e phadjer roshtyn gys ny bodjallyn.

17Ta padjer ny imlee goll trooid ny bodjallyn; as derrey yiow ad clashtyn, cha bee ad er nyn gherjaghey: cha jean ad scuirr, derrey s’gooidsave lesh y Chiarn dy choyrt feaysley dauesyn, as briwnys er nyn dranlaasee.

18Son cha bee yn Chiarn lhag-lauee, chamoo nee yn Ooilley-niartal lhiggey lhieu, derrey t’eh dy bollagh er stroie niart ny tranlaasee, as er ghoaill cooilleeney er ny ashoonee, as er chur naardey earroo ny mooaralee, as er vrishey giare lorg-reill ny mee chairal.

19Derrey t’eh er chooilleeney dy chooilley ghooinney rere e yannoo, as obbraghyn deiney lurg nyn doilchin: derrey t’eh er vriwnys cooish e phobble, as ad dy ghoaill boggey ayns e vyghin:

20Myghin, ta gerjoil ayns earish seaghyn, myr bodjallyn fliaghee ayns emshyr fowanagh.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index