Search form

Sirach (Ecclesiasticus) 36

CAB. XXXVI.

1Jean myghin orrin, O Hiarn Yee ain ooilley: as jeeagh orrin:

2As tayrn hood hene dy chooilley ashoon, nagh vel foast er jeet stiagh hood.

3Trog seose dty laue gys ny ashoonyn-quaagh, as soilshee dty phooar orroo.

4Myr v’ou er dty chasherickey aynin ’syn eanish ocsyn, myr shen bee er dty ghloyraghey ayndoosyn ’sy chilley ainyn.

5As lhig dauesyn tushtey y gheddyn jeed’s, myr hooar shinyn tushtey, nagh vel Jee erbee, agh ynrycan uss, O Yee.

6Soilshee cowraghyn noa, as jean mirrillyn yindyssagh elley: jean dty laue, as dty roih yesh y ghloyraghey, dy hoiaghey magh dty obbraghyn mirrillagh.

7Soilshee dty yymmoose, as lhig magh dty chorree: jean yn tranlaasagh y chastey, as y noid y stroie.

8Jean obbyr yiare roo, cooinee er dty chonaant, as lhig eer daue hene dty obbraghyn yindyssagh y hoilshaghey magh.

9Lhig da dewillys yn aile berraghtyn er ny scapailtee oc, as lhig da tranlaasee dty phobble cherraghtyn.

10Jean broo dy myn king ard-reiltee ny ashoonee, ta gra, Quoi agh shin hene?

11Chaggle dy cheilley ooilley kynneeyn Yacob, as lhig daue ve dty eiraght’s, myr er-dyn toshiaght.

12O Hiarn, jean myghin er y pobble, ta enmyssit ort’s; as er Israel, t’ou uss er n’enmys dty vac shinney.

13O jean myghin er Jerusalem, dty ard-valley casherick, dty ynnyd-vaghee hene.

14Lhieen Sion lesh dty ghoo flaunyssagh, as dty phobble lesh dty ghloyr.

15Jean feanish y ymmyrkey lhieusyn, ta er ve dty eiraght er-dyn toshiaght, as cooilleen ny phadeyryssyn t’er ve jeant ayns dty ennym’s.

16Jean adsyn y chooilleeney ta farkiagh er dty hon, as lhig da ny phadeyryn ayd’s v’er ny gheddyn firrinagh.

17O Hiarn, eaisht rish padjer dty harvaantyn, cordail rish bannaght Aaron er dty phobble, dy vod fys ve ec ooilley cummaltee yn theihll, dy nee uss y Chiarn, yn Jee er-dy-rieau as son dy bragh.

18Ta’n corp goaill stiagh dy chooilley veaghey, ny-yeih ta keint dy veaghey ny share na keint elley.

19Myr ta blass y vee-feïeys soilshaghey yn keint, myr shen ta cree tastagh goaill baght jeh raaghyn foalsey.

20Ta cree condaagagh coyrt oyr trimshey: agh hig dooinney keeayllagh seose rish.

21Ta ben ayn cour dy chooilley ghooinney; ny-yeih ta reih eddyr ben as ben.

22Ta aalid ben dy wooiys eddin dooinney, as cha vel nhee erbee t’eh goaill taitnys smoo ayn.

23My ta e ymmyrkey, dooie, meen, as bannee, ’smaynrey e sheshey erskyn deiney elley.

24Eshyn ta geddyn ben-heshey vie, t’eh ayns raad dy vishaghey, cooney cooie er e hon, as kemmyrk e vea.

25Raad nagh vel cleiy ny cagliagh, ta’n magher goll naardey: as shaghrynys as sou-aigney hig ersyn ta fegooish ben-heshey.

26Quoi hreishtys gys maarliagh shliawn, wagaantagh veih boayl dy boayl? myrgeddin, quoi hreishtys fer, echey nagh vel fastee lesh hene, agh goaill aaght raad erbee verrys yn oie er?

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index