Search form

Sirach (Ecclesiasticus) 40

CAB. XL.

1S’mooar y tooilleil ta cour dy chooilley ghooinney, as ta quing hrome er mec Adam, veih’n laa t’ad goll magh ass breïn nyn mayrey, derrey’n laa t’ad chyndaa gys moir dy chooilley nhee.

2Ta nyn smooinaghtyn dowin er ny ta ry-heet, as laa yn vaaish seaghney nyn aignaghyn, as jannoo cree agglagh.

3Chammah veihsyn ta ny hoie er stoyl dy ghloyr, huggeysyn t’er ny injillaghey ayns ooir as leoie.

4Chammah veihsyn ta coamrit lesh purple as crown, huggeysyn ta ceau lheiney varree.

5Jymmoose as troo, seaghyn as anvea, aggle y vaaish, as corree, as streeu, as ayns traa ny fea er e lhiabbee, ta e chadley-oie cur shaghrynys er e cheeayll.

6Cha vel eh goaill agh beggan, ny gyn veg y fea, as ny lurg shen t’eh ayns e chadley, myr fer ’syn arrey-laa, e chree seaghnit lesh ashlishyn agglagh, myr fer chea veih’n eiyrtys caggee.

7Tra ta ooilley sauchey t’eh doostey as goaill yindys, nagh row yn aggle monney.

8Ta lheid ny reddyn bentyn gys dy chooilley chretoor, chammah dooinney as baagh, as ta shen shiaght-filley smoo er peccee.

9Baase as deayrtey-folley, streeu as cliwe, treihys, gortey, seaghyn, as yn phaitt.

10Ta ny reddyn shoh kiarit cour ny mee chrauee, as kyndagh roosyn haink y thooilley.

11Ta cooid yn ooir chyndaa gys yn ooir reesht; as cooid yn ushtey gys ny ushtaghyn.

12Bee dy chooilley slaa-laueeys as mee-chairys er ny chastey: agh nee dellal yeeragh farraghtyn son dy bragh.

13Bee cooid yn vooinjer vee-chairagh er ny hyrmaghey seose myr strooan, as er ny lheïe ersooyl lesh feiyr, casley rish taarnagh atchimagh lesh fliaghey.

14Choud as ta e laue foshlit dy ghoaill, ta boggey er: agh hig y drogh-yerrey er ny drogh-yantee.

15Cha bee cloan ny drogh-yantee banglaneagh; agh t’ad myr fraueyn neu-chooie er y chreg chreoï.

16Myr weed ta gaase er dagh poyll-ushtey as broogh awin, bee ad astyrit roish faiyr erbee.

17Ta feoiltys myr garey feer vessoil, as ta myghin farraghtyn son dy bragh.

18S’maynrey bea yn labbree ta booiagh lesh y stayd t’eh ayn: as t’eh myr fer t’er n’gheddyn tashtaghyn follit.

19Ta cloan, as dy hroggal ard-valley, freayll ennym dooinney ayns cooinaghtyn: agh ta ben dyn loght ny share na ad ny-neesht.

20Ta feeyn as kiaulleeaght cur boggey ’sy chree; agh ta graih er creenaght erskyn oc ny-neesht.

21Ta’n feddan as y psalteree jannoo bingys villish; agh ta chengey villish goaill raad jeu ny-neesht.

22Ta dty hooill geearree stoamid as aalid; agh roue ny-neesht arroo ’sy ghlassyrid.

23Cha vel traa erbee neu-chooie son carrey as sheshey dy heet dy cheilley; agh ny s’dooie na ad ny-neesht, ta ben rish e sheshey.

24Ta braaraghyn as cooney cour traa dy heaghyn: agh ta giastyllys jannoo feaysley smoo na ad ny neesht.

25Ta airh as argid cur shickyrys da’n chass: agh ta coyrle vie ny share na ad ny-neesht.

26Ta berchys as niart troggal seose yn cree; agh ta aggle y Chiarn erskyn oc ny-neesht: cha vel nhee dy laccal ayns aggle y Chiarn, as cha vel feme echey cooney y hirrey.

27Ta aggle y Chiarn garey messoil, dy choadey eh erskyn dy chooilley ghloyr.

28My vac ny leeid bea chercheenagh, son ta’n baase ny share na lheid y vea.

29Cha vel yn vioys echeysyn dy ve coontit son bioys, ta e yerkal er boayrd ghooinney elley; son t’eh tayrn scammylt er hene lesh beaghey deiney elley: agh nee dooinney creeney as mie-ynsit shaghney shoh.

30Ta jeirk millish ayns beeal yn er gyn-nearey: agh ayns e volg nee aile lostey.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index