Search form

Sirach (Ecclesiasticus) 41

CAB. XLI.

1O vaase, cre cha sharroo as ta’n chooinaghtyn jeed’s da’n dooinney ta beaghey ec e aash ayns e chummallyn, da’n dooinney nagh vel nhee erbee echey dy heaghney eh, as ta bishaghey ayns dy chooilley nhee, dy jarroo, dasyn ta foast son beaghey y ghoaill.

2O vaase, s’mie ta dty vriwnys da’n ymmyrchagh, as dasyn ta e niart failleil, ta nish ayns e henn eash, as seaghnit lesh dy chooilley nhee, as dasyn t’ayns mee-hreishteil, as er choayll e chree.

3Ny gow aggle roish briwnys y vaaish, cooinee orroosyn t’er ve royd, as hig dty yeï, son shoh briwnys y Chiarn er dy chooilley chretoor.

4As cre’n-fa t’ou uss noi aigney yn er smoo syrjey? cha bee veg y vriaght ’syn oaie, nee jeih, ny keead, ny thousane bleïn, ta dty heihll er ve.

5Ta cloan ny drogh-yantee cloan dwoaiagh, as t’ad taaghey sheshaght ny mee-chrauee.

6Nee eiraght cloan ny drogh-yantee goll naardey, as bee scammylt foddey beayn er nyn sluight.

7Nee’n chloan plaiynt er ayr mee-chrauee, er-yn-oyr dy bee ad er ny oltooan kyndagh rishyn.

8Smerg diuish, gheiney mee-chrauee, t’er hreigeil leigh yn Jee smoo syrjey; son my ta shiu bishaghey, bee eh gys nyn doyrt-mow.

9As my vees shiu er nyn ruggey, bee shiu er ny ruggey gys mollaght: as tra yiow shiu baase, mollaght vees nyn gronney.

10Nee ooilley ny ta jeh’n ooir chyndaa gys ooir reesht: myrgeddin nee ny mee-chrauee goll veih mollaght gys toyrt-mow.

11Ta trimshey deiney mychione nyn gallin: agh bee drogh-ennym ny drogh-yantee er ny yarrood.

12Gow kiarail jeh dty ghoo-mie, son nee shen tannaghtyn mayrt ny-sodjey na thousane dy hashtaghyn mooar airhey.

13Cha nee seihll liauyr ta jannoo bea vie, agh ta goo-mie farraghtyn son dy bragh.

14My chloan, freill-jee ynsaghey ayns shee: son creenaght ta keillit, as stoyr nagh vel ry-akin, cre’n ymmyd t’ayndoo nyn-neesht?

15Ta’n dooinney ta keiltyn e ommijys, ny s’keeayllagh na eshyn ta keiltyn e chreenaght.

16Shen-y-fa, bee jeh eddin naareydagh ôney, cordail rish my ghoo; son cha vel eh mie dy ve naareydagh ayns dy chooilley nhee, chamoo te dy slane er ny lowal er dy chooilley oyr.

17Gow nearey jeh maarderys er coontey dty ayr as dty voir; as jeh breg fenish prince as dooinney pooaral:

18Jeh loght fenish briw as fer-reill: jeh mee-chairys fenish quaiyl as theay: jeh dellal volteyragh fenish dty cho-heshey as dty charrey:

19As jeh maarlys raad t’ou cummal, as jeh brishey cairys, noi ynrickys Yee as e chonaant; as dy ve myr brout ec y voayrd; as jeh molteyrys ayns creck as kionnagh:

20As jeh dy ve tostagh roosyn ta bannaghey dhyt; as dy yeeaghyn er streebagh:

21As dy hyndaa ersooyl dty eddin veih dty ghooinney-mooinjerey, ny dy cheiltyn gioot ny legad, ny dy vlakey er ben dty naboo:

22Ny dy violaghey e inney-veyl, as nagh jig oo coair e lhiabbee; ny jeh raaghyn scammyltagh fenish caarjyn: as tra nee oo thurn mie, nagh der oo flout lesh:

23As nagh jig oo harrish ny cooyl-chassey shen ny t’ou er chlashtyn; as nagh jean oo folliaghtyn y vrah.

24As shoh myr vees dty nearey lowal as feudagh, as bee oo ayns foayr rish dy chooilley ghooinney.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index