Search form

Sirach (Ecclesiasticus) 42

CAB. XLII.

1Jeh ny reddyn shoh ny bee nearey ort, as son ammys dooinney erbee, ny bee foiljagh ayndoo:

2Jeh leigh yn er smoo syrjey, as e chonaant, as jeh briwnys, dy gheyrey ny mee-chrauee:

3Jeh coontey kiart rish dty cho-heshaghyn as troailtee, ny jeh gioot eiraght eddyr caarjyn:

4Jeh corrymid meihaghyn as weightyn, ny jeh cosney mooarane ny beggan.

5As dy ve geyre mysh cooid varchan, dy chur smaght as ynsaghey da cloan, as dy hayrn fuill er lhiatteeyn drogh-harvaant.

6Te mie dy ve cummyr raad ta drogh-ven, as dy yeigh seose raad ta ymmodee laueyn mygeayrt.

7Shirveish magh dy chooilley nhee ayns coontey as towse, as scrieu sheese ooilley ny t’ou cur magh, ny goaill stiagh.

8Ny bee nearey ort dy choyrlaghey yn vee-cheeayllagh as ommijagh, as dy ve ass lieh yn chenndeeaght noi yn aegid: myr shoh nee oo soilshaghey dty ynsaghey vie, as bee oo ayns goo-mie ec dy chooilley ghooinney.

9Ta’n ayr doostey son e inneen gyn-yss da dooinney erbee, as ta’n chiarail j’ee cur coayl e chadley er: tra t’ee aeg, er-aggle dy jed ee shaghey blaa e eash: as lurg j’ee ve poost, er-aggle dy beagh dwoaie currit j’ee.

10Ayns traa e moidynys, er-aggle dy voghe ee scammylt, as ee dy ve torragh ayns thie e ayrey: as tra ta dooinney eck, er-aggle dy jean ee gymmyrkey ee hene dy olk; as erreish j’ee ve poost, dy beagh ee gennish.

11Freill arrey gyere er inneen gyn-nearey, er-aggle dy der ee ort dy ve craid da dty noidyn, as an-ghoo ’syn ard-valley, as oltooan mastey’n pobble, as dy bee oo er dty naaragh fud y theay.

12Ny jean soiagh jeh aalid dy chooilley unnane, as ny jean sheshaght rish drogh vraane.

13Son veih coamraghyn ta’n lhemeen cheet, as veih drogh-vraane olkys.

14Ta coyrle vie yn dooinney raghtagh ny share na brynneraght y ven oalsey, ben, er-lhiam, ta cur lh’ee nearey as oltooan.

15Nee’m nish gimraa er obbraghyn y Chiarn, as fockley magh shen ny ta mee er n’akin: Ayns goo yn Chiarn ta e obbraghyn.

16Myr ta soilshey yn ghrian cur-my-ner dy chooilley nhee, shen myr ta gloyr y Chiarn ry-akin ayns ooilley e obbraghyn.

17Cha vel y Chiarn er choyrt pooar da eer e nooghyn dy ghoaill slane baght jeh ooilley e obbraghyn mirrillagh, ta’n Chiarn ooilley-niartal ayns e phooar er hickyraghey, dy vod cre-erbee t’ayn, ve er ny oardaghey son e ghloyr.

18T’eh dy baghtal cur-my-ner yn diunid, as yn cree, as cur tastey da kialgyn croutagh deiney: son da’n Chiarn cha vel nhee erbee gyn-yss, as t’eh cur-my-ner cowraghyn y theihll.

19T’eh soilshaghey ny reddyn t’er n’gholl shaghey, as ta ry-heet, as cur briaght er kesmadyn nheeghyn follit.

20Cha vel smooinaghtyn erbee gyn-yss dasyn, chamoo ta fockle hene keillit voish.

21T’eh er hoiaghey magh dy stoamey obbraghyn ooasle e chreenaght, as t’eh er-dy-rieau as seihll gyn jerrey; ny sloo, ny ny smoo cha vod ve jeant jehsyn; chamoo t’eh feme fer-coyrlee erbee.

22O cre wheesh dy v’er ny yeearree ta ooilley e obbraghyn! as shen foddee dooinney fakin eer ayns smayl.

23Ta dy chooilley nhee jeu shoh beayn, as tannaghtyn son dy bragh, cour dy chooilley ymmyd, as t’ad ooilley biallagh.

24Ta dy chooilley nhee dooble noi ry-hoi, as cha vel eh er n’aagail nhee erbee giare.

25Ta’n derrey yeh niartaghey gys foays y jeh elley: as quoi oddys ve jeant magh lesh cur-my-ner e ghloyr?

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index