Search form

Sirach (Ecclesiasticus) 43

CAB. XLIII.

1Yn yrjid erskyn towse, yn aer sollys, aalid niau, marish e hilley gloyroil.

2Yn ghrian tra te cheet rish, soilshaghey ec eirree greïe yindyssagh, obbyr yn er smoo syrjey.

3Mysh y vunlaa ta’n cheer sponkit fo, as quoi oddys surranse yn chiass loshtee echey?

4Ta dooinney ta sheidey fo coirrey ayns obbraghyn dy hiass, agh ta’n ghrian lostey ny sleityn three keayrtyn s’breeoil; sheidey magh gollyn aileagh, as cur magh tendreilyn, te dolley ny sooillyn.

5S’mooar ta’n Chiarn ren croo eh, as ec e harey te goll dy kinjagh.

6Ren eh yn eayst myrgeddin dy hirveish ayns e imbagh, dy hoilshaghey ny earishyn, as son cowrey jeh’n theihll.

7Veih’n eayst ta cowrey ny feaillaghyn, yn soilshey eck ta goll ny veggan as ny veggan veih’n vullagh.

8Ta’n vee er ny enmys urree, bishaghey dy yindyssagh ayns e caghlaa, leeideilagh armeeyn yn yrjid, soilshean ayns aer niau;

9Aalid niau, gloyr ny rollageyn, seihll dy hoilshey ayns ynnydyn syrjey yn Chiarn.

10Ec sarey yn er casherick nee ad shassoo ayns nyn goorse, as gyn dy bragh gannooinaghey er nyn arrey.

11Jeeagh er y goll twoaie, as cur moylley dasyn ren cummey eh, feer aalin te ayns y sollyssid echey.

12Te combaasal yn aer mygeayrt lesh bow gloyroil, as ta laueyn yn er smoo syrjey er lhoobey eh.

13Liorish e harey t’eh coyrt er y fliaghey dy huittym dy trome, as dy tappee lhiggey magh tendreilyn e vriwnys.

14Liorish shoh ta ny tashtaghyn er ny osley, as ta ny bodjallyn getlagh magh myr eeanlee.

15Liorish e ard phooar t’eh shickyraghey ny bodjallyn, as ta ny claghyn-sniaghtee er ny vrishey myn.

16Kiongoyrt rishyn ta ny sleityn er-creau, as ec e aigney ta’n gheay-jiass sheidey.

17Ta feiyr y taarnagh coyrt er y thalloo craa, ta’n sterrym my-hwoaie as y gheay-chassee jannoo myrgeddin: myr eeanlee ta getlagh t’eh skeayley yn sniaghtey as ta’n tuittym sheese echey casley rish tuittym lheimyderyn faiyr.

18Ta’n sooill goaill yindys jeh aalid yn yillid echey, as ta’n cree ayns atchim myr te ceau.

19Yn lheeah-rio neesht myr sollan t’eh deayrtey er y thalloo, as tra te riojit, te lhie er baare ny stakyn birragh.

20Tra ta’n gheay sheidey feayr veih yn twoaie, ta’n ushtey er ny chreoghey ayns rio, te tannaghtyn er dy chooilley loghan ushtey, as coodaghey ny ushtaghyn mooarey myr lesh eilley-broghil.

21Te cur mow ny sleityn, as lostey yn aasagh, as stroie yn faiyr myr aile.

22Saase leah son shoh ooilley kay ta cheet dy gerrit; ta druight, cheet lurg chiass, dy ooraghey.

23Liorish e ghoo t’eh kiunaghey yn diunid, as soiaghey ellanyn ayn.

24Adsyn ta shiaulley er y cheayn, t’ad ginsh jeh’n gaue echey; as tra ta shin clashtyn eh lesh nyn gleayshyn, ta shin goaill yindys jeh.

25Son ayns shen ta obbraghyn atchimagh as yindyssagh ry-akin, earrooyn jeh dy chooilley cheint dy chretooryn, as whaleyn er ny chroo.

26Liorishyn vees aïgh vie er nyn obbraghyn, as liorish e ghoo ta dy chooilley nhee er nyn gummal seose.

27Foddee mayd loayrt lane, as ny-yeih cheet giare; shen-y-fa, ayns fockle, Eshyn ooilley.

28Kys oddys mayd ard-voylley feeu ’choyrt da? son t’eh ard erskyn ooilley e obbraghyn.

29Ta’n Chiarn atchimagh as feer ard, as s’yindyssagh ta e phooar!

30Tra ta shiu gloyraghey’n Chiarn, cur-jee ard-voylley da gys y chooid sodjey jeh nyn niart; son dy jarroo foast bee eh foddey er-y-skyn; as tra ta shiu cur ard-voylley da, cur-jee magh ooilley nyn booar, as ny bee-jee liastey, son cha vod shiu dy bragh goll foddey dy liooar.

31Quoi t’er n’akin eh, dy voddagh eh ginsh dooin? as quoi oddys ard-voylley corrym y choyrt da?

32Ta foast reddyn s’yindyssagh na ad shoh keillit voïn, son cha vel shin er vakin agh beggan jeh e obbraghyn.

33Son ta’n Chiarn er chiaddey dy chooilley nhee, as er y vooinjer chrauee t’eh er yiootal creenaght.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index