Search form

Sirach (Ecclesiasticus) 44

CAB. XLIV.

1Lhig dooin nish soiaghey magh moylley deiney ooasle, as nyn shenn-ayryn ayns nyn sheelogheyn.

2Lioroosyn ta’n Chiarn er hoilshaghey mooarane gloyr, trooid e phooar niartal veih’n toshiaght.

3Lheid as ren gymmyrkey reill ayns nyn reeriaghtyn, deiney ooasle son nyn booar, fir-choyrlee tushtagh as fockley magh phadeyrys.

4Leeideilee yn theay liorish nyn goyrle as liorish nyn dushtey ayns ynsagh cooie son y pobble, creeney as floaoil ayns nyn ynsaghey.

5Lheid as hooar magh bingys kiaullee, as ren fockley magh arraneyn scruit.

6Deiney berchagh ayns slane fort, beaghey dy sheeoil ayns nyn gummallyn.

7V’ad shoh ooilley ayns ooashley rish nyn lhing, as v’ad gloyr nyn sheelogheyn.

8Ta paart jeu shoh t’er n’aagail ennym mie nyn yeï, as ard-ghoo gys earishyn foddey.

9As ta paart elley nagh vel veg yn imraa jeu, t’er herraghtyn myr nagh beagh rieau nyn lheid er ve, ny ad hene ruggit, ny nyn gloan nyn yeï.

10Agh v’ad shoh deiney myghinagh, as ta’n ynrickys oc ayns cooinaghtyn kinjagh.

11Ec y sluight oc nee eiraght vie dy kinjagh tannaghtyn, as ta’n chloan oc cheu-sthie jeh’n chonaant.

12Ta’n sluight oc shassoo dy shickyr, as nyn gloan er y choontey oc.

13Nee’n sluight oc tannaghtyn gys earishyn foddey beayn, as cha bee yn ghloyr oc er ny leodaghey.

14Ta ny kirp oc oanluckit ayns shee, agh ta’n ennym oc bio er son dy bragh.

15Nee yn pobble ginsh jeh nyn greenaght, as nee yn theay soilshaghey magh nyn moylley.

16Ren Enoch yn Chiarn y wooiys, as v’eh goit seose gys niau, preachoor dy arrys gys ny sheelogheyn.

17Va Noah er ny gheddyn ynrick as cairagh ayns traa yn yymmoose, as v’eh goit myr yeearlys son y theihll; shen-y-fa v’eh faagit son fooilliagh da’n theihll, tra haink yn thooilley.

18Va conaant dy bragh farraghtyn jeant rishyn; nagh beagh dy chooilley eill arragh er ny stroie liorish thooilley.

19Va Abraham shenn-ayr mooar ymmodee pobble: ayns ooashley cha row unnane erbee casley rish.

20Dreill eh leigh yn er smoo syrjey, as v’eh ayns conaant rish: ayns e eill ren eh yn conaant y hickyraghey, as tra v’eh er ny phrowal, v’eh er ny gheddyn firrinagh.

21Shen-y-fa ren eh shickyraghey da lesh breearrey, dy jinnagh eh bannaghey ny ashoonyn ayns e luight, as dy jinnagh eh eshyn y vishaghey myr joan ny hooirey, as soiaghey seose e luight myr ny rollageyn, as cur daue eiraght veih faarkey gys faarkey, as veih’n awin gys ardjyn sodjey magh yn ooir.

22Rish Isaac ren eh niartaghey myrgeddin bannaght ooilley sheelnaue, as yn conaant: [er graih e ayr Abraham],

23As hug eh er lhie er kione Yacob. Ghow eh rish ayns e vannaght, as hug eh eiraght da, as rheynn eh e chronneeyn; mastey’n daa hribe jeig ren eh ad y rheynn.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index