Search form

Sirach (Ecclesiasticus) 49

CAB. XLIX.

1Ta cooinaghtyn Yosiah myr soar millish yn perfume ta jeant liorish schleï yn photecaree: te millish myr mill ayns dagh beeal, as myr kiaull villish ec gien-feeyney.

2Ren eh eh-hene y ymmyrkey dy cairagh ec chyndaa yn phobble, as ghow eh ersooyl yn eajeeys dy vee-chraueeaght.

3Va e chree soit jeeragh er y Chiarn, as ayns traa ny mee-chrauee ren eh ooashley Yee y hoiaghey seose.

4Er-lhimmey jeh David, as Hezekiah, as Josiah, va ooilley foiljagh: son hreig ad leigh yn er smoo syrjey, ren eer reeaghyn Yuda failleil.

5Shen-y-fa hug eh yn phooar oc da feallagh elley, as y ghloyr oc da ashoon joarree.

6Losht ad ard-valley reiht yn chiamble casherick, as ren ad ny straidyn y yannoo fadaneagh, cordail rish phadeyrys Yeremiah.

7Son hug ad drogh-ghellal dasyn va er ny chasherickey ny adeyr ayns breïn e vayrey, dy astyrt, dy heaghney, as dy stroie; as myrgeddin dy hroggal seose, as dy phlantal.

8She Ezekiel honnick yn ashlish ghloyroil, va er ny hoilshaghey da er fainagh ny cherubim.

9Son ren eh gimraa er ny noidyn fo cowrey yn fliaghey, as hug eh shee dauesyn hie er y raad cair.

10As jeh’n daa adeyr jeig lhig da’n imraa oc ve bannit, as lhig da ny craueyn oc blaaghey reesht ass yn oaie: son ren ad Jacob y gherjaghey, as ad y livrey liorish treishteil shickyr.

11Kys ver mayd yn moylley feeu da Zorobabel? v’eh eer myr fainey er y laue-yesh.

12Y lheid cheddin va Joshua mac Yosedec: ren ’sy traa ocsyn yn thie y hroggal, as chiamble casherick y hoiaghey seose gys y Chiarn, va kiarit son gloyr dy bragh farraghtyn.

13As mastey’n chloan reiht va Nehemiah, hooar ennym mooar, ayns dy hrog eh seose dooin ny voallaghyn v’er duittym, as hoie eh seose ny giattyn, as ny boltyn, as hrog eh seose ny toltanyn ain ass-y-noa.

14Agh er yn ooir cha row dooinney er ny chroo casley rish Enoch; son v’eh goit seose bio veih’n thalloo.

15Chamoo va dooinney er ny ruggey casley rish Joseph, kiannoort er e vraaraghyn, kemmyrk da’n pobble, ny craueyn echey va soiaghey jeant jeu liorish y Chiarn.

16Va Shem as Seth ayns ard-ooashley mastey deiney, as myr shen va Adam erskyn dy chooilley nhee bio v’er ny chroo ’sy theihll.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index