Search form

Sirach (Ecclesiasticus) 7

CAB. VII.

1Ny jean olk erbee, myr shen cha jig skielley erbee dty raad.

2Chea veih ny mee-chrauee, as nee mee-chairys chyndaa ersooyl voïd.

3My vac, ny cuirr er imraghyn mee-chairys, as cha jean oo ad y vuinn shiaght-filley.

4Ny shir veih’n Chiarn oik staydoil, ny veih’n ree stoyl yn ooashley.

5Ny jean uss oo hene y heyrey kiongoyrt rish y Chiarn, ny boggyssagh ass dty chreenaght fenish y ree.

6Ny shir dy ve dty vriw, fakin nagh vod oo dy chooilley vee-chairys y chastey, er-aggle ec traa erbee dy bee oo fo smaght roish persoon dooinney s’pooaral, as dy der oo oyr snapperal ayns raad dty yeerid.

7Ny jean brasnaghey jymmoose y theay, as ny lhig oo hene sheese mastey’n pobble.

8Ny jean peccah y chiangley er peccah, son ayns unnane hene cha jed oo gyn kerraghey.

9Ny jir, Nee Jee jeeaghyn er earroo my ourallyn, as tra ta mee dy hebbal gys y Jee smoo syrjey nee eh soiaghey jee’m.

10Ny bee lhag-chreeagh ayns dty phadjeryn, as ny lhig shaghyd dy chur jeirk.

11Ny jean craid mysh dooinney erbee ayns angaish e annym: son ta fer ayn ta dy injillaghey, as dy hroggal seose.

12Ny lhiassee breg noi dty vraar: chamoo jean y lheid rish dty charrey.

13Ny cliaght oo hene er keint erbee dy vreg, son cha vel eh agh drogh chliaghtey.

14Ny gow rouyr taggloo ort ayns chaglym y chanstyr, as ny jean ymmyd jeh goan fardalagh ayns dty phadjeryn.

15Ny cur dwoaie da obbyr ghoccaragh, chamoo da farrysthie yn eirrinagh, ta’n er smoo syrjey er n’oardaghey.

16Ny jean oo hene dty heshey ayns earroo ny drogh-yantee, agh cooinee nagh vel yn kerraghey oc foddey jeh.

17Jean uss dty annym y injillaghey dy mooar, son ta briwnys ny mee-chrauee aile as beishteigyn.

18Ny caghlaa dty charrey son leagh ’sy theihll, er coontey erbee: chamoo braar firrinagh son airh Ophir.

19Ny scarr rish ben chreeney as vie, son ta’n foays eck erskyn airh.

20Choud’s ta dty harvaant gobbraghey dy firrinagh, ny cur drogh-ghellal da, chamoo da’n jiulean, ta slane jeidjagh ayns dty hirveish.

21Lhig da dty annym ve dooie rish fer-mooinjerey mie, as ny freill reamys voish.

22Vel maase ayd? freill sooill vie orroo: as my t’ad son dty vondeish, freill ad mayrt.

23Vel cloan ayd? ynsee ad, as croym sheese nyn mwannal veih nyn aegid.

24Vel inneenyn ayd? gow kiarail jeh nyn girp, as ny lhig daue goaill rouyr reamys ayns dty enish.

25Jean uss dty inneen y phoosey, as nee oo cooilleeney cooish ta lane lhie er; agh cur da dooinney tushtagh ee.

26Vel ben-heshey ayd lurg dty aigney? ny treig ee, agh ny jean oo hene y lhiantyn rish ben eddrym.

27Cur arrym da dty ayr lesh ooilley dty chree, as ny jarrood trimshey dty voir.

28Cooinee dy row er ny yientyn jeu, as kys oddys oo lhiasaghey dauesyn son ny t’ad er n’yannoo er dty hon?

29Gow aggle roish y Chiarn lesh ooilley dty annym, as cur arrym da e haggyrtyn.

30Cur graih dasyn ren oo y chroo, lesh ooilley dty niart, as ny treig e hirveishee.

31Gow aggle roish y Chiarn, as cur arrym da’n saggyrt, as cur e chair da, myr t’ou er dty harey; ny chied-vessyn, yn oural-loght, gioot ny geiltyn, as yn oural dy chasherickys, as ny chied-vessyn jeh ny nheeghyn casherick.

32As sheeyn magh dty laue gys y voght, dy chur mullagh er dty yiastyllys.

33Ta feoiltys graysoil ayns shilley dy chooilley ghooinney bio, as son ny merriu jean shen ny ta lowal as feudagh.

34Ny shaghyn dy ve mâroosyn ta keayney, as dy ghobberan mâroosyn ta dobberan.

35Ny bee liastey dy gholl dy yeeaghyn y vooinjer chingey, son myr shen nee oo aigney-mie y chosney.

36Cre erbee t’ou goaill ayns laue, cooinee er y jerrey, as cha jean oo dy bragh ass y raad.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index