Search form

Sirach (Ecclesiasticus) 8

CAB. VIII.

1Ny streeu rish dooinney ayns pooar, er-aggle dy duitt oo ayns ny laueyn echey.

2Ny bee ec noidys rish dooinney berchagh, er-aggle dy gow e hrimmid niart oc: son ta airh er stroie ymmodee, as er chur shaghrynys er cree reeaghyn.

3Ny streeu rish beealerey dy ghooinney, as ny shirveish stoo gys yn aile echey.

4Ny jean glare sportoilagh rish dooinney gyn-nearey, nagh dayrn oo drogh-ghoo er dty chynney.

5Ny jean goltooaney yn arryssagh, ta treigeil e pheccah, agh cooinee dy vel shin ooilley toilchin kerraghey.

6Ny jean beg y hoiaghey jeh dooinney ayns e henn eash: son ta paart j’in hene gaase shenn.

7Ny jean boggyssagh harrish dty noid smoo as eh marroo, agh cooinee dy vow mayd ooilley baase.

8Ny jean beg y hoiaghey jeh goan y vooinjer chreeney, agh fow ynsaghey mie ayns nyn raaghyn-creeney; son vouesyn nee oo ynsagh y gheddyn, as kys dy hirveish ard-gheiney dy aghtal.

9Ny shaghyn goan y chanstyr: son dynsee adsyn myrgeddin veih nyn ayraghyn, as vouesyn nee oo tushtey y ynsaghey, as dy reggyrt myr te cooie.

10Ny cur aile ayns smarageyn y drogh-yantagh, er-aggle dy bee oo losht ’syn aile t’ou hene er n’oaddey.

11Ny gow ort dy chur eddin da’n olkyssagh ayns dty ghlare, er-aggle dy lhie eh cooyl-chlea dy ghoaill oo ayns ribbey dty ghoan.

12Ny eeassee da fer stroshey na oo hene, son my t’ou geeasaght da, foddee oo jeeaghyn er myr caillit.

13Ny bee raane erskyn dty fort: son my t’ou goll raane, gow kiarail dy eeck eh.

14Ny gow gys y leigh rish briw, son nee ad briwnys er e hon, cordail rish e vriwnys hene.

15Ny jean sheshaght er y raad marish dooinney daaney, nagh bee eh seaghnagh dhyt: son nee eshyn lurg e aigney hene, as nee oo cherraghtyn mârish trooid e ommijys.

16Ny streeu rish dooinney fargagh, as ny gow mârish magh gys yn eaynee: son cha vel eh soiaghey floag jeh fuill, as raad nagh vel cooney er-gerrey, bee oo ayns gaue dty vaaish.

17Ny gow coyrle marish ommydan, son cha vod eh coonceil y reayll.

18Ny treisht joarree lesh dty chooishyn follit, er-aggle dy jean eh dty vrah.

19Ny foshil dty chree gys dy chooilley ghooinney, er aggle dy gooilleenee eh oo lesh drogh-hurn ennagh.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index