Search form

Sirach (Ecclesiasticus) 9

CAB. IX.

1Ny bee geadaghey harrish ben-heshey dty oghrish; er-aggle dy n’ynsee oo jee drogh-ourys dt’oï hene.

2Ny lhig da’n ven reill harrish dty chree, myr shen dy vod ee e cass y chur er dty chooid.

3Ny tar er-gerrey da strumpag, er-aggle dy duitt oo ayns e ribbaghyn.

4Ny jean cliaghtaghey sheshaght ben rouanagh, er-aggle dy bee oo goit ayns ny ribbaghyn eck.

5Ny shass blâkey er moidyn, nagh duitt oo liorish yn aalid eck.

6Ny cur dty yeearreeyn er streebee, nagh gaill oo dty eiraght.

7Ny shass jeeaghyn mygeayrt-y-mood er e son ayns straidyn yn ard-valley, chamoo jean rouail mygeayrt mâree ayns folliaghtyn ny drogh-hieyn.

8Chyndaa dty hooill dy lhiattee veih ben aalin, as ny jeeagh er aalid ben erbee; son shimmey t’er ny ve cleaynit lesh aalid ben; son liorish shen ta graih er ve er ny oaddey myr aile.

9Ny soie eddyr marish ben dooinney elley, chamoo gow ee ayns dty roihaghyn, as ny baare dty argid urree ec y feeyn; er-aggle dy lhiannee dty chree huic, as myr shen trooid yeearree dty chree dy duitt oo ayns toyrt-mow.

10Ny treig dty henn charrey, son cha vel fer noa dy ve soylit huggey: ta carrey noa myr feeyn noa, tra te er n’aase shenn, nee oo giu eh dy blaystal.

11Ny troo mysh maynrys y drogh-yantagh: son s’beg fys t’ayd cre vees e yerrey.

12Ny gow boggey ayns y red shen ta ny mee-chrauee goaill taitnys ayn; agh cooinee nagh jed ad gyn kerraghey gys nyn oaie.

13Freill oo hene foddey veih’n dooinney shen ta pooar echey dy varroo; myr shen cha bee oo ayns imnea roish aggle y vaaish; as my hig oo er-gerrey da, bee er dty hwoaie, er aggle dy gow eh dty vioys doaltattym: cooinee dy vel oo gimmeeaght mastey ribbaghyn, as dy vel oo shooyl er voallaghyn yn ard valley.

14Cha faggys as oddys oo gow baght jeh dty naboo, as shir coyrle veih’n vooinjer chreeney.

15Lhig da dty haggloo ve rish y vooinjer chreeney, as ooilley dty imraa ayns leigh yn er smoo syrjey.

16As lhig da deiney cairal gee as giu mayrt, as lhig da dty ghloyraghey ve ayns aggle y Chiarn.

17Cordail rish laue yn obbree, bee yn obbyr er ny voylley: as fer-reill creeney yn phobble, son e ghoan.

18Ta dooinney jeh drogh-hengey dangeragh ayns e ard valley, as eshyn ta siyragh ayns e haggloo, bee dwoaie er ny chur da.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index