Search form

Creenaght Solomon 11

CAB. XI.

1Hug ee aïgh vie da ny obbraghyn oc ayns laue yn adeyr casherick.

2Jimmee ad trooid yn aasagh follym-faase, as hoie ad nyn gabbaneyn ayns ynnydyn neu-chassanagh.

3Hug ad eddin da nyn noidyn, as ghow ad cooilleeney er nyn dranlaasee.

4Tra v’ad feme ushtey deïe ad ort’s, as va ushtey er ny hirveish orroo ass y chreg chloaie, as chuir ad nyn baays ass y chreg chreoi.

5Son shen ny va kerraghey da nyn noidyn ve dauesyn son ooraghey ayns nyn veme.

6Son ayns ynnyd ushtey as awinyn roie lesh fuill,

7Myr oghsan cronnal da’n sarey dy stroie ny oikanyn, hug oo daue nyn saie dy ushtey liorish saaseyn erskyn nyn yercal.

8Soilshaghey liorish y phaays shen, kys v’ou er cherraghey nyn noidyn.

9Son tra v’ad er ny phrowal, ga ayns myghin er nyn gerraghey, hoig ad kys va ny mee-chrauee er nyn mriwnys ayns jymmoose, as er nyn dorchaghey lesh paays foddey s’dewil na va’n chloan chairal.

10Son ad shoh ren oo y vreagey, as dellal roo myr ayr: agh y vooinjer elley, myr ree dewil, ren oo deyrey as kerraghey.

11Edyr ad ve mooie ny sthie v’ad seaghnit co-laik.

12Son haink trimshey dooble orroo, as osnaghyn tromey ayns cooinaghtyn jeh ny v’ad er hurranse.

13Son tra cheayll ad, liorish yn cherraghey oc hene, dy row yn vooinjer elley er nyn mannaghey, dennee ad dy nee laue yn Chiarn va shoh.

14Son eshyn va oc ayns faghid tra v’eh foddey roïe faagit magh dy ve stroit, marish ny oikanyn elley, jeh shoh fy-yerrey ghow ad yindys mooar, tra honnick ad cre haink gy-kione.

15Agh son saaseyn ommijagh nyn mee-chraueeaght, ayns dy row ad cleaynit dy ooashlaghey ard-nieughyn as beishtyn eajee, lhig oo feayshlit orroo earroo mooar dy chretooryn dewilley son kerraghey.

16Dy chur toiggal daue dy bee dooinney er ny cherraghey lesh ny peccaghyn t’eh hene er n’yannoo.

17Son cha row dty laue ooilley-niartal, ren y seihll y chroo jeh stoo gyn cummey, laccal pooar dy choyrt ny mast’ oc earroo dy vucyn-awin as dy lionyn dewil,

18Ny beishtyn oaldey joarree, lane dy eulys, noa crooit, sheidey magh ennal aileagh, skeayley mygeayrt torcan breinn dy yaagh, ny lhiggey magh loandernee atchimagh veih nyn sooillyn:

19Cha nee ynrycan lesh nyn mree pyshoonagh dy varroo ad jeeragh; agh myrgeddin dy stroie ad lesh nyn shilley eajee atchimagh.

20As dy jarroo fegooish veg jeu shoh oddagh ad v’er duittym sheese ec un vlast, seaghnit lesh kerraghey, as skeaylt dy lhean liorish ennal dty phooar: agh t’ou er n’ordrail dagh nhee ayns towse, as earroo, as corrymid.

21Son foddee oo ec dy chooilley hraa dty phooar niartal y hoilshaghey, myr sailt; agh quoi oddys shassoo noi niart dty roih?

22Son cha vel y slane seihll kiongoyrt rhyt, agh myr eer grine gennee ayns ny meihaghyn, as eer myr bine jeh druight y voghrey, ta tuittym er yn ooir.

23Son ta dty vyghin’s roshtyn er ooilley; t’ou ooilley-pooaral, as chymmoil gys peccaghyn deiney, ad dy lhiasaghey nyn mea.

24Son ta graih ayd’s er dy chooilley nhee, as cha vel dwoaie ayd’s er nhee erbee dy vel oo er n’yannoo, son cha beagh oo dy bragh er chroo ad as dwoaie er ny ve ayd orroo.

25As kys oddagh nhee erbee v’er hannaghtyn, agh lurg dty aigney? ny ve er-mayrn, agh fo dty ard-chiarail?

26Agh t’ou uss gymmyrkey lesh ooilley, son t’ad lhiat hene, O Hiarn, oo ta graihagh er anmeenyn.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index