Search form

Creenaght Solomon 13

CAB. XIII.

1S’fardalagh shickyr, t’adsyn ooilley liorish dooghys, ta mee-hushtagh dy Yee, as nagh voddagh, veih ny nheeghyn mie ta ry-akin, goaill baght jehsyn ta ayn; chamoo, goaill tastey jeh ny obbraghyn, ren ad goaill-rish pooar yn ard-obbree hene.

2Agh smooinee ad dy row edyr yn aile, yn gheay, ny’n aer eddrym, ny coorse ny rollageyn, ny ny ushtaghyn freanagh, ny ny soilshaghyn flaunyssagh dy ve jeeghyn reiltee yn theihll.

3Agh my v’ad wheesh shen cleaynit dy ghoaill taitnys ayns aalid ny reddyn shoh, as dy ghoaill ad son jeeghyn; lhig daue toiggal cre-woad s’aalin erskyn-earroo ta’n Chiarn oc ooilley: son she eer bun dy chooilley aalid t’er chroo ad.

4As my v’ad lhieent lesh yindys ec y phooar as y vree oc, lhig daue toiggal lioroosyn cre-woad s’pooaral t’eshyn ren ad y chroo.

5Son cordail rish mooadys as aalid ny cretooryn ta’n fer-croo oc er ny akin.

6Foast ayns shoh hene cha vel yn foill oc mooar, son shirrey lurg Jee, as aggindagh dy gheddyn eh, hoiggal dy row ad fo marranys.

7Son ainjyssagh er e obbraghyn, t’ad briaght dy imneagh er e hon, as credjal myr t’ad fakin: er-y-fa dy vel e aalid hene ayns dy chooilley nhee ta er ny akin.

8Chamoo foast ta’n leshtal oc dy ve goit.

9Son my va wheesh shen dy hushtey oc as dy choyrt cheb er order y theihll, kys nagh row ny sleaie toiggal oc jeh Chiarn y theihll ooilley?

10S’treih t’ad! son ayns reddyn gyn-vioys ta nyn dreishteil; t’ad genmys adsyn jeeghyn ta obbyr laueyn deiney, airh as argid cummit dy schleïoil, as co-chaslys dy chretooryn, ny red gyn-foaynoo dy chlagh, obbyr shenn laue aghtal.

11Nish tra ta’n feyir ta lhieggal billey, as er fawal yn fuygh gys yn ymmyd cooie, dy glen er n’ghoaill jeh ooilley yn roost, as er n’obbraghey eh dy stoamey, as er n’yannoo saagh jeh son ymmyd ghooinney;

12As lurg da v’er lostey ny spollagyn ayns gaarlaghey e vee, as dy vel eh jeant magh;

13As goaill unnane jeh ny peeshyn gyn-ymmyd (dy jarroo ceab cam-chrontagh) as er ghrainney eh dy kiarailagh ec e chaa, er chummey shen dy aghtal, as er chiaddey eh ayns co-chaslys dooinney;

14Ny, er n’yannoo eh lurg caslys beisht eajee ennagh, layal harrish eh lesh vermilion as paint, daahghey jiarg eh, as coodaghey dy chooilley chron t’ayn;

15As er n’yannoo room jesh er y hon, t’eh dy hoiaghey eh ’sy voalley, jannoo shickyr jeh lesh holtyn yiarn:

16Son ghow eh kiarail er y hon nagh duittagh eh; toiggal dy row eh red gyn lheihll, (son cha vel eh agh jalloo, as eh hene feme cooney).

17Eisht t’eh goaill padjer gys y jalloo shoh ass lieh e chooid, e ven, as e chloan: as cha vel nearey er dy ghuee gys red gyn-vioys.

18Son slaynt, t’eh geamagh huggeysyn ta faase: son bioys, t’eh guee gys red gyn-vioys: son cooney, t’eh jannoo accan imlee gys y red sloo cooney t’ayn: as son jurnah mie t’eh jannoo padjer gys red nagh vod cass y ghleashagh:

19As son cooid as cosney, as son aïgh vie er e laueyn t’eh geearree cooney ersyn sloo fort t’ayn dy yannoo nhee erbee.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index