Search form

Creenaght Solomon 17

CAB. XVII.

1Son s’mooar ta dty vriwnyssyn as erskyn-insh; shen-y-fa ta anmeenyn neu-hushtagh er n’gholl er-shaghryn.

2Son tra ghow deiney mee-chrauee orroo dy hranlaasey yn ashoon casherick; myr v’ad jeight seose ayns nyn dhieyn, pryssoonee yn dorraghys, as freilt fo geulaghyn oie liauyr, lhie ad ayns shen, giarit magh veih’n ard-chiarail dy bragh farraghtyn.

3Son smooinaghtyn dy cheiltyn ad hene fo nyn beccaghyn follit, v’ad skeaylt noon as noal fo coodaghey dorraghey dy yarroodys, agglit ass nyn geeayll, as seaghnit lesh ashlishyn atchimagh.

4Son chamoo oddagh yn cooill dorraghey shen, ayn v’ad lhie, ad y reayll voish aggle, agh sheean [myr jeh ushtaghyn] feiyral mygeayrt-y-moo, as shillaghyn agglagh v’er ny akin lioroo lesh eddinyn graney groamagh.

5Cha row bree yn aile dy choyrt soilshey daue: chamoo oddagh sollyssid soilshean ny rollageyn surranse dy cheau soilshey ’syn oie atchimagh cheddin.

6Ynrycan honnick ad aile foaddit jeh hene, feer agglagh; son myr v’ad fo mooarane atchim, er-lhieu dy row shen honnick ad ny smessey na ny shillaghyn nagh vaik ad.

7Agh son molteyrys nyn obbeeys v’ad er nyn gastey, as hooar boggyssagh nyn ysseree oghsan naareydagh.

8Son adsyn ghow orroo dy eiyrt ersooyl atchim as anvea veih annym seaghnit, v’ad hene seaghnit lesh aggle faghidagh.

9Son ga nagh row oc oyr erbee dy aggle; ny-yeih v’ad ec kione nyn geiley, mannagh row agh y maase goll shaghey, as ec tassane ard-nieughyn,

10As hooar ad baase son aggle, gra, Nagh vaik ad yn aer, va mygeayrt-y-moo er dy chooilley heu.

11Son ta olkys, deyrit liorish y feanish eck hene, feer agglagh, as tra t’ee er ny ghoostey liorish cooinsheanse, t’ee dy kinjagh cur-ro-laue mee-ourys atchimagh.

12Son cha vel aggle monney arragh, agh brah yn chooney shen ta nyn resoon dy hebbal dooin.

13As myr sloo t’ad seaghnit cheu-sthie, wheesh shen s’trimmey hig orroo kerraghey nyn mee-hushtey.

14Agh adsyn nyn lhie fo cadley trome yn oie cheddin, va dy jarroo atchimagh, as nagh dod shaghney shen haink orroo veih diunidyn niurin,

15Va paart jeu seaghnit lesh scaanyn neu-ghooghyssagh, as paart goll my-neealloo, nyn gree failleil ad: son haink aggle doaltattym orroo, as shen nagh row ad jeeaghyn er y hon.

16Myr shen, cre-erbee yn raad huitt fer ny lhie, shen y raad duirree eh, myr dooint ’sy phryssoon gyn boltyn yiarn.

17Son edyr eh ve ny eirrinagh, ny bochil, ny jiulean ’sy vagher, haink eh er, as êginit v’eh dy hurranse shen ny va nauyn da: son v’ad ooilley kianlt lesh yn un gheuley dy ghorraghys.

18Edyr eh ve geay rastagh, ny bingys eeanlee kiaulleeaght mastey banglaneyn ny biljyn, ny feiyr ushtey tuittym veih’n yrjid,

19Ny tharmane atchimagh dy chlaghyn tilgit neose, ny lheimyragh noon as noal dy veishtyn ’sy dorraghys, ny buirroogh agglagh ny cretooryn oaldey s’atchimee, ny sheean dooble veih ny sleityn ooiganagh; hug lheid ny reddyn shoh orroo goll my-neealloo son aggle.

20Son harrish yn chooid elley jeh’n theihll va’n soilshey sollys soilshean, as cha row unnane erbee er nyn lhiettal ayns nyn obbyr.

21Harrystoo shoh ny-lomarcan va skeaylt oie ghroamagh, co-chaslys jeh’n dorraghys shen, va lurg shen dy verraghtyn orroo: agh ny-yeih, v’adsyn daue hene ny seaghnagh na’n dorraghys.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index