Search form

Creenaght Solomon 18

CAB. XVIII.

1Ny-yeih ec dty nooghyn va slane soilshey, yn coraa oc tra cheayll ad, as gyn fakin nyn gummey; er-yn-oyr nagh row ad er hurranse ny reddyn cheddin, ren ad coontey ad maynrey.

2Agh er-yn-oyr nagh ren ad skielley daue nish, lioroo hurr ad aggair roïe, hug ad booise daue, as ghuee ad leih orroo, son dy row ad roïe nyn noidyn.

3Ayns ynnyd y chooid cheddin, hug oo daue pillar lossey dy aile, dy ve chammah leeideilagh daue er nyn yurnah gyn-oayl, as grian breeoil dy chur soilshey ooasle daue.

4Son v’adsyn toilchin yn soilshey dy ve goit voue, as dy ve er ny phryssooney ayns dorraghys, va er reayll ayns bondiaght dty vec, lioroosyn va soilshey glen y leigh dy ve er ny hoilshaghey da’n seihll.

5As tra v’ad kiarit dy stroie oikanyn dty chloan chasherick, myr va un lhiannoo er ny hilgey magh, as er ny hauail dy chur oghsan daue, ghow uss ersooyl earroo nyn gloan, as stroie oo ad ooilley cooidjagh ayns ny ushtaghyn mooarey.

6Jeh’n oie shen va nyn ayraghyn er ny hickyraghey ro-laue, myr va fysseree firrinagh oc gys cre ny breearraghyn v’ad er choyrt nyn marrant, oddagh ad ny lurg shen ve jeh gien mie.

7Shoh myr hooar dty phobble yn vondeish, chammah jeh saualtys y vooinjer chairail, as jeh toyrt-mow nyn noidyn.

8Son lesh shen ren uss nyn noidyn y cherraghey, lesh y chooid cheddin t’ou uss er ghloyraghey shinyn dty chloan reiht.

9Son ren cloan chrauee deiney mie ouralley dy follit, as lesh un aigney ren ad leigh casherick, dy beagh ny nooghyn ayns paarteeas ry-cheilley chammah ayns maynrys as seaghyn, nyn ayraghyn nish fockley-magh arraneyn moyllee.

10Agh er y cheu elley va er ny chlashtyn eam atchimagh ny noidyn, as va bardoon trimshagh goll mygeayrt son y chloan v’ad dy ghobberan.

11Va’n mainshtyr as y charvaant er nyn gerraghey co-laik, as y ree myr dooinney erbee elley.

12Myr shen va oc ooilley dy cheilley earrooyn erskyn-towse dy verriu, lesh yn un cheint dy vaase, chamoo va ny bioee dy liooar dy oanluckey ny merriu: son ’sy tullogh va nyn sluight s’ooasle er nyn stroie.

13Son ga nagh jinnagh ad nhee erbee y chredjal fo molteyrys nyn obbeeys; ny-yeih tra honnick ad cragh nyn mec shinney, ghow ad roo shoh dy ve nyn gloan dy Yee.

14Son tra va dy chooilley nhee ayns fea as fast, as yn oie shen ayns mean e jurnah siyragh,

15Haink dty ghoo’s ooilley-niartal neose doaltattym veih dty stoyl-reeoil ayns niau, myr dooinney-caggee niartal ayns mean cheer kiarit son toyrt-mow.

16As hug eh lesh dty harey firrinagh myr cliwe geyre, as shassoo seose, lhieen eh dy chooilley nhee lesh baase, as v’eh roshtyn gys niau, ga dy hass eh er y thalloo.

17Er shoh v’ad seaghnit lesh ashlishyn dy ghreamallyn atchimagh, as haink aggle doaltattym orroo.

18As fer as fer jeu lieh-varroo scaait noon as noal, hoilshee ad oyr nyn maaish.

19Son va fysseree oc jeh shoh ro-laue veih nyn ghreamallyn seaghnagh, nagh jinnagh ad cherraghtyn gyn toiggal cre’n oyr v’ad seaghnit.

20Dy jarroo haink blass jeh’n vaase er y vooinjer chrauee hene, as haink cragh er y pobble ’syn aasagh: agh cha row yn jymmoose foddey-farraghtyn.

21Son eisht ren y * dooinney bannee siyr, as hass eh magh dy endeil ad; as cur lesh scape e hirveish cooie, eer padjer, as lhiasaghey incense, hass eh eddyr adsyn as y jymmoose, as shen myr ren eh yn arkys y lhiettal, soilshaghey dy row eh dty harvaant.

22Shoh myr hooar eh barriaght er y stroieder, cha nee lesh troshid corp, chamoo lesh eilley-caggee, agh lesh fockle hug eh fo-chosh yn cragheyder, liorish lhiasaghey ny breearraghyn, as ny conaantyn, va jeant rish ny ayraghyn.

23Son tra va ny merriu nish er duittym sheese ayns carnaneyn yn derrey yeh er y jeh elley, shassoo eddyr ad, ren eh castey yn jymmoose, as lhiettal y raad gys ny bioee.

24Son ayns y choamrey liauyr va slane aalid, as ayns ny kiare roaghyn dy chlaghyn costal va grainnit gloyr ny ayraghyn, as dty ard-ooashley er attey e chione.

25Daue shoh hug y stroieder raad, myr v’eh ’syn ammys oc: son s’lioar ve daue agh blass jeh e yymmoose y gheddyn.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index