Search form

Creenaght Solomon 19

CAB. XIX.

1Er son ny mee-chrauee huitt y jymmoose orroo gyn-vyghin gys y jerrey: son va fys echey ro-laue cre yinnagh ad;

2Lurg kied y choyrt daue dy immeeaght, as geiyrt magh ad ayns preis siyr, dy goghe ad arrys, as goll er nyn eiyrt’s.

3Son choud as v’ad foast dobberan as keayney harrish oaiaghyn ny merriu, ghow ad cooish ommijagh elley ayns laue, as deiyr ad orroosyn myr scapailtee, v’ad roïe er n’êginagh dy chosney roue.

4Son y kerraghey va nauyn daue hayrn ad gys y jerrey shoh, dy daink jarrood orroo cre v’ad hannah er hurranse, dy yannoo magh slane towse ny briwnyssyn shen va kiart orroo.

5Chammah dy osley raad yindyssagh da dty phobble; agh dy hayrn baase atchimagh orroo shoh.

6Son va’n slane cretoor lurg e ghooghys er ny chummey reesht ass-y-noa, shirveish ayns nyn oikyn cooie, dy reayll dty chloan hene gyn assee.

7Ta shen dy ghra, Bodjal scadooagh harrish y champ, as raad va ushtey roïe, thalloo chirrym cheet rish; as trooid yn aarkey-jiarg, raad rea; as trooid y thooilley niartal, magher glass.

8Ny-hrooid hie ooilley yn pobble va fo coadey dty laue, cur-my-ner dty virrillyn erskyn-towse yindyssagh.

9Son ghow ad raad gyn lhiettal myr cabbil, as lheimyragh myr eayin, cur moylley dhyt’s, O Hiarn, ren ad y livrey.

10Son cha row ad foast er yarrood cre v’er daghyrt ayns cheer nyn yoarreeaght, kys dy dymmyrk y thalloo beishteigyn ayns ynnyd maase, as dy row yn awin er-croo lesh froggyn ayns ynnyd eeastyn.

11Agh lurg shen honnick ad sheeloghe noa dy eeanlee, tra va nyn yeearreeyn miandagh jollyssagh er bee blaystal.

12Son haink quaylyn seose huc veih’n aarkey, dy yannoo magh ad.

13As haink kerraghey er ny peccee lesh cowraghyn agglagh dy haarneeyn atchimagh: son s’mie hoill ad shoh liorish nyn olkys ayns nyn ghrogh-ghellal creoi as dwoaiagh gys joarreeyn.

14Son cha dug ny Sodomiteyn oltaghey-bea da ny joarreeyn haink ny mast’ oc: agh dreill ad shoh eer caarjyn fo bondiaght, va er hoilchin dy mie voue.

15As cha nee shen ny-lomarcan, agh hoiggal dy bee foayr ennagh er ny hoilshaghey dauesyn, nagh ren ad hene y ymmyrkey dy dooie gys joarreeyn.

16Agh ghell ad shoh dy feer dewil roosyn v’ad er n’ghoaill stiagh lesh cuirraghyn, as va hannah ayns commeeys mâroo ’sy leighyn cheddin.

17Shen-y-fa lesh eer dellid v’ad shoh er nyn mwoalley, myr va’n vooinjer elley ec dorryssyn y dooinney cairagh; tra v’ad combaasit lesh dorraghys dullyr, atchimagh, as dagh unnane razey son raad e ghorrys hene.

18Son va ny elementyn er ny chaghlaa ayndoo hene, myr liorish keint dy choardail, myr ayns greïe-chiaullee, ta caghlaa bingys cur ennym elley er y shiaull, as ny-yeih te foast bingys, as foddee mayd baght y ghoaill jeh shoh liorish ny ta hannah er daghyrt ’sy theihll.

19Son va nheeghyn thallooinagh er ny chaghlaa gys ushtagh, as ny reddyn va roïe snaue ’syn ushtey, v’ad nish gimmeeaght er y thalloo.

20Va pooar ec yn aile ’syn ushtey, jarrood yn dooghys echey hene: as chaill yn ushtey e ghooghys mooghee hene.

21Er y cheu elley, cha ren bree yn aile stroie feill cretooryn marvaanagh, ga dy jimmee ad ayn; chamoo lheïe eh yn * bee flaunyssagh shen, va dooghyssagh da dy lheïe, myr y lheeah-rio rish chiass ny greïney.

22Son ayns dy chooilley nhee, O Hiarn, ren oo mooar jeh dty phobble, as ren oo ad y ghloyraghey, chamoo ren oo beg y hoiaghey jeu: agh chooin oo lhieu ec dy chooilley hraa, as ayns dy chooilley voayl.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index