Search form

Creenaght Solomon 6

CAB. VI.

1Clasht-jee, er-y-fa shen, O shiuish reeaghyn, as toig-jee; gow-jee ynsagh, shiuish vriwnyn er king ny hooirey.

2Eaisht-jee shiuish ta reill y pobble, as ta boggyssagh ayns ymmodee ny ashoonyn.

3Son ta pooar currit diu veih’n Chiarn, as reiltys veih’n er-syrjey, eh nee prowal ny obbraghyn eu, as ronsaghey magh ny coyrleyn follit eu.

4Er-yn-oyr nagh vel shiuish ta shirveishee yn reeriaght echey, er vriwnys dy cairal; cha vel shiu er vreayll yn leigh, ny er n’immeeaght lurg aigney Yee.

5Dy atchimagh as doaltattym hig eh erriu, son briwnys ghewil ver eh orroosyn ta ayns ard-phooar.

6Son trooid myghin yiow yn vooinjer imlee pardoon: agh er ny ard-gheiney hig ard-cherraghey.

7Son ersyn, ta ny hiarn harrish ooilley, cha bee aggle roish persoon dooinney erbee; chamoo vees eh ayns ammys roish pooar dooinney erbee: son t’eh er chroo beg as mooar, as goaill yn un chiarail jeu ooilley.

8Agh bee briaght geyre jeant er ny tranlaasee.

9Riuish, er-y-fa shen, O reeaghyn, ta mee loayrt, dy vod shiu creenaght y ynsaghey, as gyn tuittym ersooyl.

10Son adsyn ta dy casherick freayll casherickys, bee ad er nyn mriwnys dy casherick: as adsyn t’er leeideil lheid y vea bee ansoor oc ass nyn lieh hene.

11Shen-y-fa, soie-jee nyn aigney er my ghoan: yeearree-jee ad, as yiow shiu ynsaghey.

12S’gloyroil ta creenaght, nagh vel dy bragh goll naardey! dy jarroo t’ee dy baghtal er ny chronnaghey lioroosyn ta graihagh urree, as er ny gheddyn lioroosyn ta shirrey ny-jeï.

13T’ee ro laue roosyn ta dy yeearree ee, soilshaghey ee hene hoshiaght dauesyn.

14Eshyn ta dy leah shirrey ee, cha mooar vees e ghoccar, son yiow eh ee ny soie ec e ghorryssyn.

15Te ard-chreenaght, er-y-fa shen, dy smooinaghtyn urree, as eshyn ta aggindagh dy chosney ee, bee eh dy leah seyr veih imnea.

16Son t’ee goll mygeayrt shirrey lheid as ta feeu j’ee: t’ee soilshaghey ee hene foayroil daue ayns ny raaidyn, as coyrt quaaltys daue ayns dagh smooinaghtyn.

17Son t’ee eer goaill toshiaght ayns y yeearree dy ynsagh: as ayns y chiarail dy gheddyn ynsagh ta graih;

18As ayns graih, ta freayll e annaghyn: as ayns freayll e annaghyn, ta shickyrys dy veaynid braa;

19As ta’n veaynid braa tayrn shin er-gerrey da Jee.

20As shoh myr ta’n yeearree dy chreenaght cosney dooin reeriaght.

21My ta nyn daitnys, er-y-fa shen, ayns stuill as luirg-reeoil, O shiuish reeaghyn y phobble, cur-jee ooashley da creenaght, dy vod shiu reill son dy bragh.

22Er son creenaght, cre t’ee hene, as kys ghow ee toshiaght, insh-ym diu, as cha vreill-ym folliaghtyn veue; agh nee’m briaght ny-jeï veih’n toshiaght, neayr haink ee er-ash, as soilshee-ym diu slane toiggal j’ee, chamoo nee’m yn ynrickys y cheiltyn.

23Chamoo hem laue rish yn obbyr shoh lesh troo olkyssagh, son cha vel creenaght sheshey cooie da e lheid.

24Agh ta earrooyn dy leih creeney maynrys y theihll; as ta ree creeney barrant y theay.

25Gow-jee, er-y-fa shen, ynsagh veih my ghoan, as bee eh son ard foays diu.

Yn Apocrypha 1772

© Society for Promoting Christian Knowledge (SPCK) under licence to the British and Foreign Bible Society (BFBS) 2017

More Info | Version Index