Search form

Judith 3

CAB. 3

1Myr shen hug ad chaghteryn huggey, dy yannoo shee, gra,

2Cur-my-ner, ta shinyn sharvaantyn Nabuchodonosor yn ree mooar tuittym sheese kiongoyrt rhyt; dell rooin myr vees mie ayns dty hilley.

3Cur-my-ner, nyn gabbil, as ooilley ny ynnydyn ain, as ooilley ny magheryn curnaght ain, as shioltaneyn as shellooyn, as slane grunt ny cabbaneyn ain, t’ad lhie roish dt’eddin; jean yn ymmyd sailt jeu.

4Cur-ny-ner, eer ny ard-valjyn ain, as ny cummaltee oc t’ad dty harvaantyn; tar as dell roo myr share s’liack lhiat.

5Shoh myr haink ny deiney gys Holofernes, as er yn aght shoh loayr ad rish.

6Eisht haink eh neose gys ard ny marrey, chammah eh-hene as e heshaght-caggee, as hoie eh sauchysyn ayns ny ard-valjyn mooarey, as ghow eh ass-doo deiney reiht son fir-choonee.

7Myr shen dy ren ad-hene as ooilley yn cheer runt mygeayrt goaill roo lesh attaghyn-blaa, as daunseeyn, as lesh timbrelyn.

8Ny-yeih lhieg eh ny cagleeyn oc, as yiare eh sheese ny keylljyn oc: son v’eh er n’yannoo briwnys dy stroie ooilley jeeghyn ny cheerey, dy chur er ooilley ny ashoonyn dy ooashlaghey Nabuchodonosor ny lomarcan, as dy chooilley hengey as tribe dy eamagh ersyn myr jee.

9Myrgeddin, haink eh noon jeeragh er Esdraelon er gerrey da Judea, er y cheu elley jeeragh er coonid vooar Yudea.

10As ghow eh grunt eddyr Geba as Scythopolis, as ayns shen duirree eh son slane mee, dy voddagh eh ooilley carraidsyn e heshaght-caggee y haglym dy cheilley.

Yn Apocrypha (Broderick) 1979

© Yn Cheshaght Ghailckagh 1979, 2017

© Manx Gaelic Society 1979, 2017

More Info | Version Index