Search form

Hechos 28

Pablo Malta pe

1Opareve noẽ ma ɨvɨ pe yave, nduicuaa jocua ɨvɨ jee Malta. 2Jare joco pegua reta ipɨacavi oreve. Echa'ã orembɨresive cavi, jare uyatapɨ, ama oquɨ jare roɨ ramo. 3Jare Pablo umbatɨ yepea, jare oñono tata pe. Jayave penti mboi tata güi oẽ osi, jare uñemama Pablo ipo re, uichuu yave. 4Jare joco pegua reta uecha yave mboi usagüɨgüɨ oĩ Pablo ipo re, jei reta uyupe:

—Añetete yepe cua cuimbae upuruyuca vae. Yepe tẽi umano'ã ɨ guasu pe, ẽrei ndarau ipuere icoño, jupi'ã ramo.

5Ẽrei Pablo umɨtɨmo ipo güi mboi tata pe, jare uyeyapo'ã mbae chupe. 6Jare joco pegua reta ipɨa pe uyemɨngueta tẽi iruruta ani aramoi oata jare umanota. Ẽrei jae reta uãro tẽi ma ɨma yave, uecha uyeyapo'ã mbae chupe. Jayave jae reta jei'ã ma tenonde rami. Jei reta ma:

—Cua cuimbae penti tumpa co.

7Jare jocua ɨvɨ pegua reta juvicha Publio jee vae güɨnoi jocoropi iɨvɨ reta. Jae orembɨresive cavi, jare oremɨngaru mbapɨ ara. 8Jare Publio tu imbaerasɨ oĩ jupa pe. Jacu jare jepotiugüɨ. Pablo oo umae jese. Jare uyerure Tumpa pe yave, oñono ipo jese, jare umbɨgüera. 9Jare cua uyeyapo yave, ĩru imbaerasɨ vae jocua ɨvɨ pegua reta yugüeru, jare Pablo umbɨgüera vi. 10Jayave jae reta umeei oreve jeta mbaembae. Jare nduyupi ye yave chalana guasu pe, umbuyupi vi oreve mbaembae nduipota vae.

Pablo oo uvãe Roma pe

11Jare mbapɨ yasɨ ma uasa yave, ndoo joco güi penti chalana guasu Alejandría pegua pe. Cua chalana guasu upɨta jocua ɨvɨ pe, roɨ iara umbɨasa vaerã. Chalana guasu itĩ re ñugüɨnoi choguaquiri-raanga ɨvɨra pegua Cástor jare Pólux jee vae. 12Jayave ndoo nuvãe tenta guasu Siracusa pe, jare ndupɨta joco pe mbapɨ ara. 13Jayave joco güi nduyere jare ndoo nuvãe tenta guasu Regio pe. Jayave pɨareve pe ɨvɨtu uyepeyu sur cotɨ güi, jare pɨareve ye pe ndoo nuvãe tenta guasu Puteoli pe. 14Jare joco pe nuñevãe upurugüɨrovia vae reta ndive. Jare jae reta uparea oreve ndupɨta vaerã jae reta ndive siete ara pegua. Jare joco güi ndoo tenta guasu Roma cotɨ. 15Jare orererãcua upurugüɨrovia vae Roma pegua reta pe, jare amocue jae reta yugüeru orerovãiti Foro Apio pe, jare ĩru vae reta yugüeru orerovãiti Tres Tabernas pe. Jare Pablo uecha yave cua reta, umee yasurupai Tumpa pe, jare uñemɨatangãtu. 16Jare ndoo nuvãe yave Roma pe, sundaro reta juvicha umee pereso reta penti sundaro reta juvicha tenondegua vae pe. Ẽrei umaeño Pablo re icoiño vaerã penti sundaro uyandareco jese vae ndive.

Pablo umɨmbeu ñee icavi vae Roma pe

17Jare mbapɨ ara ma uasa yave, Pablo uenica judío reta itenondegua reta. Jare uyembatɨ reta yave, Pablo jei chupe reta:

—Cherɨqueɨ reta, yepe tẽi ayapo'ã mbae nunga teco ñanerentaɨgua reta cotɨ ani yandetenondegua reta iyemboe cotɨ, ẽrei Jerusalén pegua reta chemee romano reta pe, jare romano reta cheñono peresorɨru pe —jei—. 18Jare jae reta upɨrandu yave cheve, uipota tẽi cheyora, ayapo'ã mbae nunga teco amano vaerã ramo. 19Ẽrei judío reta oyovaicho cheré ramo, ayapo'ã vaerã mbae, jaeño ayu vaerã cherãa César, yepe tẽi mbaetɨ mbae ambɨjeco vaerã cherentaɨgua reta jese vae —jei chupe reta—. 20Jáeramo che pueni puecha vaerã, jare ayemɨngueta vaerã pe reta ndive. Echa'ã Israel pegua reta güɨrovia vae jeco pegua añeapɨ̃ti aĩ cua cadena pe —jei.

21Ẽrei jae reta jei chupe:

—Mbaetɨ quía ombou tupapire oreve Judea güi nemɨmbeu vaerã oreve. Jare ou'ã penti ave ñanerentaɨgua joco güi umɨmbeu vaerã oreve icavi mbae vae nderegua. 22Ẽrei nduipota nduicuaa mbae ndepɨa pe ndiyemɨngueta vae. Echa'ã nduicuaa opaete que rupi jei reta icavi'ã co cua moromboe —jei reta.

23Jayave jei reta Pablo pe ĩru ara rupi yugüeruta co. Jayave jocua ara jeta vae yugüeru Pablo jenta pe. Jare neimbove güive Pablo icaaru umɨmbeu chupe reta Tumpa iporoyocuia regua. Jare Moisés iporoyocui rupi jare Tumpa iñee aracae umɨmbeu vae reta uicuatiacue vae rupi umɨmbeu vi chupe reta Jesús regua. Cua uyapo, jae reta güɨrovia vaerã. 24Jare amocue güɨrovia Pablo jei vae. Ẽrei ĩru vae reta güɨrovia'ã. 25Jáeramo uyembɨyao reta uyugüi, jare yugüɨraa Pablo jenta güi, Pablo opa yave jei chupe reta cua ñee:

—Jupi co jei Espíritu Santo Tumpa iñee aracae umɨmbeu vae Isaías rupi yandetenondegua reta pe. Echa'ã jei cuarãi:

26‘Ecua tenta guasu pegua reta pe, jare ere chupe reta:

Piyandu tẽita, ẽrei ndarau picuaa.

Peecha tẽita, ẽrei ndarau picuaa cavi.

27Echa'ã cua reta ipɨatanta,

jare iyapɨsa pe uyandu tẽi,

jare usapɨmiño,

agüɨye vaerã uecha jesa pe,

jare agüɨye vaerã uyandu iyapɨsa pe,

jare agüɨye vaerã uicuaa ipɨa pe,

jare agüɨye vaerã uyerova checotɨ’ —jei Tumpa—.

‘Echa'ã uyerova checotɨ yave, ambaita tẽi imbaeyoa reta’ —jei.

Jucuarãi jei —jei Pablo chupe reta—.

28Picuaa cavi cua: Tumpa umɨmbeucata cua ñee judío mbae vae reta pe, jae reta uyembɨasaca vaerã. Echa'ã jae reta uyapɨsacata jese —jei.

29Jare cua Pablo opa ma jei yave, judío reta yugüɨraa uyeaca reve uyupii.

30Jare Pablo uiporu penti o umbɨepɨ reve, jare ico joco pe mocui año. Jare umbɨresive opaete yugüeru opou ipɨ vae reta. 31Jare jecuaeño umɨmbeu Tumpa iporoyocuia regua, jare oporomboe yandeYa Jesucristo re uquɨye mbae reve, jare mbaetɨ quía umbɨavai.

Nuevo Testamento Guaraní Pe

© 2012, Ethnos360 (New Tribes Mission). All rights reserved. More Info | Version Index