Search form

San Mateo 14

Juan imano

(Mr 6.14-29; Lc 9.7-9)

1Jare jocua ara reta pe mburuvicha guasu Herodes uyandu Jesús regua. 2Jare jei jembiocui reta pe:

—Jae co Juan upurumbɨbautizase vae. Icove ye ma ou umanocue vae reta ipɨte güi. Jáeramo uyapo cua mɨacañɨ reta —jei.

3Echa'ã ndei Juan umano mbove, Herodes uipɨsɨca Juan, jare oñonoca peresorɨru pe, Herodías jei ramo. Herodías co jae Herodes tɨvɨ Felipe jee vae jembireco. 4Echa'ã tenonde yave Juan jei Herodes pe: “Icavi'ã nemenda vaerã nderɨvɨ jembireco ndive.” 5Jáeramo Herodes uipota tẽi uyucaca Juan. Ẽrei uquɨye tenta guasu pegua reta güi. Echa'ã jae reta güɨrovia Juan co jae penti Tumpa iñee umɨmbeu vae.

6Ẽrei Herodes uyembɨara yave oa vae regua, Herodías imembɨ cuña ou upɨrae ipɨte pe jare umbɨyerovia Herodes. 7Jayave Herodes jei Tumpa jee re umeeta co cuñatai pe ipotave mbae ueca chupe vae. 8Jayave cuñatai jei Herodes pe:

—Emee cheve cua pe Juan upurumbɨbautizase vae iñãca penti plato pe.

Echa'ã cuñatai ichɨ umɨmbeu ma chupe jucuarãi jei vaerã.

9Jayave mburuvicha guasu ipɨatɨtɨ. Ẽrei Tumpa jee re jei chupe ramo, jare ĩru vae reta uyandu ramo, omondo sundaro Juan iñãca güeru vaerã umee chupe. 10Jayave oo sundaro peresorɨru pe uñãcasɨa Juan. 11Jayave güeru iñãcacue penti plato pe, jare umee cuñatai pe. Jayave cuñatai güɨraa umee ichɨ pe. 12Jare Juan jemimboe reta yugüeru güɨraa jetecue jare oñotɨ. Jayave yugüɨraa umɨmbeu Jesús pe.

Jesús umɨngaru cinco mil cuimbae reta

(Mr 6.30-44; Lc 9.10-17; Jn 6.1-14)

13Jare Jesús cua uyandu yave, oo penti chalana pe quĩi ngatu vae pe. Ẽrei jeta vae uicuaa yave, yugüɨraa ɨvɨ rupiño tenta guasu reta güi Jesús oo vae pe. 14Jesús ugüeyɨ yave chalana güi, uecha jeta vae, jare uiparareco reta. Jayave umbɨgüera imbaerasɨ vae joco pe ñugüɨnoi vae reta.

15Caaru ma yave, Jesús jemimboe reta yugüeru jei chupe:

—Mbaetɨ quiave ico cua rupi, jare caaru ma oĩ. Emondo cua jeta vae, ogua vaerã jembiurã tenta tenta rupi —jei reta.

16Ẽrei Jesús jei chupe reta:

—Agüɨye tuyugüɨraa. Pe reta pemee tucaru —jei.

17—Jaeño ime cua pe nonoi pandepo mbɨyape jare mocui pira —jei reta chupe.

18—Peru cheve cua pe —jei.

19Jayave Jesús oyocui jocua jeta vae reta uguapɨ vaerã capiichape re. Jayave uipɨsɨ jocua pandepo mbɨyape jare mocui pira, jare umae ara cotɨ, jare umee yasurupai Tumpa pe. Jayave upɨsãa mbɨyape, jare umee jemimboe reta pe, jae reta umee vaerã yatɨ vae reta pe. 20Opareve ucaru, jare iyangapɨɨ reta. Jayave Jesús jemimboe reta umbatɨ tembíu uñepɨsãacue jembɨre vae, jare umɨtɨnee doce canasta. 21Jare ucaru vae reta güi cuimbae retaño uyepapa cinco mil rupi. Uyepapa'ã cuña reta jare sambiaɨ reta.

Jesús uguata ɨ iárambo

(Mr 6.45-52; Jn 6.16-21)

22Jare jupivoiño Jesús oyocui jemimboe reta uyupi vaerã chalana pe, jare yugüɨraa vaerã jenonde ɨ guasu jovaicho pe, jae omondo rambueve uyembatɨ vae reta. 23Jare opa omondo yave, Jesús uyupi ɨvɨtu guasu re uyerure vaerã Tumpa pe. Jare pɨ̃tu ma yave, jaeño Jesús joco pe oĩ. 24Ẽrei chalana oo ma uvãe ɨ guasu mbɨte pe. Yavai Jesús jemimboe reta uruguata vaerã. Echa'ã tuicha ɨ uyembɨaparoaroa jare ɨvɨtu tanta oovãiti. 25Jare cõeta ma yave, Jesús uguata oo ɨ iárambo güɨraa uepitɨ. 26Jare Jesús jemimboe reta uecha yave uguata ou ɨ iárambo rupi, uquɨye. Jei reta:

—Penti mbae iãcue co.

Usapɨcai reta uquɨye güi.

27Ẽrei jupivoiño Jesús ombou iñee chupe reta.

—Piñemɨatangãtu. Che co. Agüɨye pequɨye —jei.

28Jayave Pedro jei chupe:

—CheYa, jae co nde yave, cheocui aguata vaerã aa ɨ iárambo rupi ndecotɨ.

29—Eyu —jei Jesús chupe.

Jayave Pedro ugüeyɨ chalana güi, jare umbɨpɨ uguata ɨ iárambo oo vaerã Jesús cotɨ. 30Ẽrei uecha yave quirãi ɨvɨtu tanta chupe, Pedro uquɨye. Jayave umbɨpɨ uique ɨ pe, jare iñeeãta reve jei:

—CheYa, cherepɨ.

31Jupivoiño Jesús uupi ipo jare uipɨsɨ Pedro. Jayave jei chupe:

—Michi ete ndepurugüɨrovia. ¿Maera pa nderovia'ã cheré? —jei.

32Jare uyupi reta yave chalana pe, upɨta ɨvɨtu. 33Jare chalana pe ñugüɨnoi vae reta umbɨadora Jesús. Jei reta:

—Añete co, nde co jae Tumpa Taɨ.

Jesús umbɨgüera Genesaret pegua imbaerasɨ vae reta

(Mr 6.53-56)

34Jare ɨ guasu uasa reta yave, yugüɨraa uvãe ɨvɨ Genesaret pe. 35Jare joco pegua reta uicuaa jae co Jesús. Jáeramo jae reta yugüɨraa opaete jocua ɨvɨ rupi, jare güeru Jesús oĩ vae pe imbaerasɨ vae reta. 36Jare güeru vae reta uyerure Jesús pe umaeño imbaerasɨ vae reta uyavɨquɨ vaerã jemimonde jembeɨ yepe. Jare opaete jemimonde uyavɨquɨ vae reta ucuera.

Nuevo Testamento Guaraní Pe

© 2012, Ethnos360 (New Tribes Mission). All rights reserved. More Info | Version Index