Search form

Lucas 14

Kan møg parab kwanrrø tøgaigwan Jesús tamarøb

1Kan isrin kwaløm Jesúsbe kan fariseo chi maramigwan nø ashibigwei yausrø manrrab kebya wabene, kaneløbe ke chindashchab ashibelø køn. 2Inchene truyube kan møg Jesúswei merrab parab kwanrrø tøgaig wabene, 3Jesúsbe tru maig maramigwan martrai Moisés pørigwan kusrenanøbelanba, fariseosmeranba trencha payibig køn:

—¿Isrin kwaløm kan kwanrriigwan tamarmønrrai merig kø, chindah, kabe merømuig kø, chindah?— cha.

4Inchen nømbe chigucha løtømeelø køn. Inchene nøbe kwanrriigwan srua arrua, tamarabe, yandø inrrai ‘ungwa’ chibig køn. 5Incha nømune trenchibig køn:

—¿Ñimma møikkøben, ñui nusrkain kui, kabe ñui wey kui pisuyu kebeñenma, isrin kwaløm kuingucha, tru urastø wesramønrraitirru?— cha.

6Inchen nømbe øyeelan chigucha løtønrrab kaimabelø køn.

Novios yaumay linchab amrrunrrai eshkailø

7Linchab amrrunrrai eshkaig misaamera mishatsigu mas tab purramdønug, tab purramdønug laben, Jesúsbe treeg indi ashabe, øyeeg kømig køn chib eshkab waminchibig køn:

8—Møikkøben ñun kan novios yaumay linchab attrai eshkabene, mas tab wamdønug merrarramøta cha. Inchippa ñi lataguen kømø, mas nuigwan linchab attrai eshkaig kua, truig puben, 9tru ñunba, truigwanba linchai eshkabiibe arruppa: “Ñi waigwan ønun tranø” chibene, ñibe køriimisra wendausrø wanrrab purainrrabguen cha. 10Treeg inchimøtø, masken ñun lincha cha eshkabene, wendausrø wamisr cha, tru ñun lincha chibig arrua: “Ñi, kasukube, yu merrabsrø wanrrab puraamø” cha, ñun trenchinrrai. Inchen ñibe tru mishatsigu ñiba purrabelai merrab truba tab indig kønrrabguen cha. 11Kaguen møikkøben nøasiitø ‘nuig kurmab’ isubigwane, ka kørig martrun cha. Inchen nøasiitø ‘nuig kurmab’ isumíigwane ‘i møøbe si, nuig køn’ taig kønrrun— chibig køn.

12Incha katø Jesúsbe tru lincha cha eshkab møwangucha trenchibig køn:

—Ñi kan mamig srørrøppe, ñui asiilandø kømøwei, ñui nunelandø kømøwei, ñui misagwandø kømøwei, ñui ya pulu puarmerandø kømøwei wama srøsr cha. Kaguen truiløbe ñungucha treetøwei linchai wama, nømgurringucha treetøwei marene, truburø ñibe utamigwan uta kørrømisrtrun cha. 13Treeg kømøtø, ñi kan fiesta marøppe, waachameran køben, kønønrrab kaimabelan køben, cojosmeran køben, kabgarmeran køben linchab amrrunrrai eshkawabe, 14ñibe mayanguen tab indig kønrrabguen cha. Kaguende truiløbe ñune katøburø treetøwei marmuindøgucha, sølgandø tabigwan marøbelø katø øsiirab kwalømbe, tru ututø ñungucha Señorbe truburø tranamigwan tøgatø tranig kønrrun— chibig køn.

Iibe mamig truba nu tamara kuigwan kemesra wamindig

(Mt 22.1-10)

15Inchen iigwan mørabe, tru kan mishatsigu wabiibe Jesúswan trenchibig køn:

—Tius nø ashib karub waisrø mamigwan mabiibe mayanguen tab kuig kønrrun— cha.

16Inchen Jesúsbe nun trenchibig køn:

—Kan møg truba nørrø mamimera mannamig tamara, misaamera truba nu linchab amrrunrrai eshkawa, 17yandø mam urasbe nui karuindiig megabigwane tru lincha tailan trenchinrrab ørøbig køn cha: “Yandø ke chab pønsrainguen pønrran cha, amrruy” chinrrai. 18Inchene møitøgucha ke chine kemesrøb mendabelø køn cha. Srøtiibe: “Kanbalø pirø ke møindø chab pena, trunun ashchab inrrab war tan cha. Treekkurri kaimamønrrun tan chirrunrrig cha”, trendan cha. 19Inchen kane: “Weymera diez arabelø pena, maig marøbelø køtashchab ashchab inrrab war tan cha. Treekkurri attrab kaimamønrrun tan chirrunrrig” tan cha. 20Inchen katøgane: “Ke srø kasharawa kua, trugurri attrab kaimamønrrun tan, chirrunrrig” tan cha.

21’Inchen karuindiig megabiibe ya, tru nun karub pera wabig ya puaigwan kerrigu eshkaben, nøbe namappe, karuig megabigwane trenchibig køn cha: “Malla inrrø cha, ciudayu calleswanba, maywanba ya, waachameran køben, kønønrrab kaimabelan køben, cojosmeran køben, kabgarwan køben yu pera attrig” cha. 22Inchen mas yanasrø tru karuindiig megabiibe trenchibig køn cha: “Ñi nan karub pera wabig, ñi maig karuigwan maren, katøgucha aldø pasran” cha. 23Inchen nøbe tru karuindiig megabigwane: “Ciudayu wambiisrø nørrø maymerawan køben, shush maywan køben ya, nai ya netsanrrai katøganelan amrrumø kømø, ke amrrumne wamønrrig cha, trendan cha. 24Kaguende nabe trendamønrrun: Tru srøsreelø na lincha cha wamiiløbe møikkucha nai mamigwane maig mamig kuinguen mørtraamøn” cha trendan— chibig køn Jesúsbe.

Jesúswei mendig yamibe murig køn

(Mt 10.37-38)

25Misag truba nørrø Jesúswei mendig amben, nøbe keesha ashabe trenchibig køn:

26—Møikkøben naimay arrua, nui møskawan, nui usran, nui srawan, nui uregwan, nui nunelan, nui nuchalan lataitøguen kømø, nan mas undaarab, katø nui øsig kømigwan lataitøguen kømø, nan mas isub undaaramíibe nai mendig uñibig kønrraamøn cha. 27Inchen katø møikkøben nui kuruswan nø muta arrumigwan muta, nai mendig arrumíibe, nai mendig uñibig kønrraamøn chibig køn. 28Ñimma møikkøben, kan truba pala ya martrab inchabe, ¿patsøgamdiig køtashchab anwanmerrig ashchab wamisrmønrraitirru? cha. 29Treenchimøtø, pøtøburab pølsrugwandø pølbasra, patsøgønrrab kaimabene, mayeelø ashibeløbe ñune indzatø ashib trenchinrrun cha: 30“Ø møøbe yawan martrab pølbasra, patsøgønrrab kaiman” cha. 31Kabe kan reyma katøgan reyba kwayanrrab webinrraptø, ¿suldaumera diez mil nø tøgagúitøgaba, katø tru nøba kwayanrrabig suldaumera veinte mil pera arrubiiba, ka kwayamdiig køtashchab trununmerrig isunrrab wamisrmønrraitarru? cha. 32Pøs kaimappe, tru katøgan rey yabsrø srø pasrøbenbatø, kwayamø, tammay kørrømisrkun chinrrai karuilø ørtrun cha. 33Inchawei ñim møikkøben chi tøgagúigwan kerrigu elachimíibe, nai mendig uñibig kønrraamøn chibig køn.

Tre yandø larrmíig misrøb

(Mt 5.13; Mc 9.50)

34’Trebe tabig køn. Inchendø yandø tru trebe larrmíig misrabe, ¿katøbe chincha kui larrøbig misriasamø? 35Pirø tamisrtrai pirøyu wiitamdiig kømøwei, animal pøywan abono marigu pusramdiig kømøwein køben, yandø petig kønrrun cha. ¡Møramig kalu pønsraibe mør!— chibig køn.

Nacom Pejume Diwesi po diwesi pena jume diwesi xua Jesucristo yabara tinatsi

© 2010, Wycliffe Bible Translators, Inc. All rights reserved. More Info | Version Index