Search form

Lucas 3

Juan Bautista mu misag warab waraimønug waminchib

(Mt 3.1-12; Mc 1.1-8; Jn 1.19-28)

1Roma maya misagwan ashib karub wabig Tiberio chabguen quince años karub waben, Pilatobe Judea pirau kubenadur køben, Herodesbe Galilea pirau ashib karub wabig køn. Inchen Herodeswei nuneg Felipebe Iturea pirøwanba, Traconite pirøwanba karub waben, Lisaníasbe Abilinia pirau ashib karub wabig køn. 2Inchen Anásba, Caifásbabe maya sacerdotesmeran tru uras nøm karubelø køben, Zacaríaswei nusrkai Juanwan Tius wamindig køn, mu misag warab waraimønug tsuben. 3Inchen Juanbe Jordán pi puluwan chuguen palømø pureb ippe, misaameran mas kaig marmønrrab isua møra, Tiusweimay llirain kønmab asamig piu umbu ulsrailø kømigwan eshkab kusrenanøbig køn, kaig mariilan ulø paymø pesannailø kønrrai. 4Truibe merrabsrø Tius maig karuigwan eshkabig Isaías pørigu maig taig øyeeg:

“Kan wam mu misag warab waraimønug trenchib trasan cha:

‘Señorwei maywan tamarøb, nuyasig maymerane ølmarøb inday tan chib.

5Kullimera købeløbe netsøganiilø køben, nørrø tunmeraba, shush tunmerababe kanguelarrøtø chag mariilø køben,

andul maymerabe ølmariilø køben, mitør maymerabe min mariilø kønrrun chib.

6Inchen maya misaabe Tius misagwan kaigyugurri wesranrrai ørigwan ashchun’ ” taig køn.

7Inchen misaamera Juan piu umbu ulsrailø kønrrab webambene, trenchibig køn:

—¡Ñimbe ul lataig inchib misaamera! ¿Ñimune mu eshkata cha, Tiuswei purø kørig kømdiig ñimuim pala attrabig pub pasrabigugurri wegørrønrraimbe? 8Ñimui kaig mariilan isua møra, Tiusweimay llirawar kuy tørgandø asamdiig kønrrai treelø kua, ñimbe ñimasiitø øyeeg chib mendømøtay cha: “Nambe, Abrahamwei misaamera ker” chib. Kaguende nabe trendamønrrun cha: Tiusbe i sruumeranguen Abrahamwei misaamera kønrrai marøg købene, martrun cha. 9Katø walømbe tusrmeran srølba para øramig chabguen srølyu pasringuen pasran cha. Chi tusrwandøgucha tab mamig niimíigwane para, nagu kegutsan— cha.

10Inchene misaamerabe truba nu pasrabiibe trencha payibelø køn:

—¿Nambe chi maramø?— cha.

11Inchen Juanbe trencha løtabig køn:

—Møikkøben pa turin tøgaibe chiguchagaigwan kan tranø cha. Inchen møikkøben mamig tøgaibe, chigaigwan pirishi— cha.

12Inchen katø møiløgøsrøn tru romasreelayasig an utabelø piu umbu ulsrailø kønrrab amrruabe, Juanwane trencha payibelø køn:

—Kusrennøbig, ¿nambe chi maramø?— cha.

13Inchen Juanbe trenchibig køn:

—Anwan maya utønrrai karua pasrigwan menrra utønrrab kømø, maig utamigwandø utønrrigay— cha.

14Inchen katø mø suldaumera køsrøn trencha payibelø køn:

—¿Nambe chi maramig kønrrerah?— cha.

Inchene nøbe trenchibig køn:

—Mun køben ‘chigøben martrumøn’ cha kwaarøsra chigøben kerramøwei, katø mun køben ka isatø chigøben kemesra kebenøsrkømøwei inday cha. Ñim chigøben marøb kuimburø ñimun maig pagaraitøgatø kasraaray— cha, trenchibig køn.

15Inchen misaamerabe ke nungøba isua ashib kuig køppe, Juanwane nømuinetøbe Cristo køppeendimab isub købelø køn. 16Inchen Juanbe mayeelan trenchibig køn:

—Nabe ñimune pi pinøbulrrai piu umbu ulsrar cha. Trune nai wendau arrubiibe si, Espíritu Santotøgaba, naatøgaba pinøbulrrun cha. Truibeguende, na lataguen kømø, maramburab marøbig køben, nabe truburab kømíig kua, nui alpargatisyu tsiwanguen pitchabgaig kur chibig køn. 17Nøbe tirigun isig øra tarømartrab tru kalagutsamig tsig utigwane sruaguen pasran cha. Incha truyu tru tirigu chishmari yabaløwan kerrigu chab chishmarabe, tirigune tru esegainug esegappe, shauwane mana kwamø nagu pattrab.—

18Incha maig melamigwan treeg marøb melay chib, katøgan øyeelø latailøba misaameran waminchibig køn, Tiuswei tabig srø wamwan. 19Inchen tru Galilea pirau ashib karub wabig Herodesbe nui nuneg Felipei srai Herodíaswan nø pera tsumba, katø chigurrimbunø kaig mariiløgurrimba Juanbe Herodeswane ‘øyeebe kalø køn’ chib namuben, 20Herodesbe møri urasbe, trubalatø mas kaig marøb, Juanwane merrarrawa, kailan keeri yau pasrøbig køn.

Jesúswan piu umbu ulsraig

(Mt 3.13-17; Mc 1.9-11)

21Inchen Juan maya misagwan piu umbu ulsrøb uñib uras, Jesúswangucha piu umbu ulsraig kuig køn. Inchen Jesús Tius Møskaimba waminchib pasramne, srømbalabe kuren, 22Espíritu Santobe nuim pala kan paloma lataig kørraarruben, srømbalasrøngurrimbe kan wam treeg mørø waminchib trenchibig køn:

—Ñibe nai Nusrkai undaaraig køn cha. Nabe ñuimburab truba tab kui war— cha.

Jesucristoi merrab misaamera

(Mt 1.1-17)

23Jesúsbe nui maramigwan pølbasrøppe chabguen treinta años køsrøn tøgaig købig køn.

Jesúsbe Joséwei nusrkain kuitamab isubelø køn.

24Joséwei møskaimbe Elí køben,

Elíwei møskaimbe Matat købig køn.

Matatwei møskaimbe Leví køben,

Levíwei møskaimbe Melqui køben,

Melquiwei møskaimbe Jana køben,

Janai møskaimbe José købig køn.

25Joséwei møskaimbe Matatías køben,

Matatíaswei møskaimbe Amós køben,

Amóswei møskaimbe Nahum køben,

Nahumwei møskaimbe Esli køben,

Esliwei møskaimbe Nagai købig køn.

26Nagaiwei møskaimbe Maat køben,

Maatwei møskaimbe Matatías køben,

Matatíaswei møskaimbe Semei køben,

Semeiwei møskaimbe José køben,

Joséwei møskaimbe Judá købig køn.

27Judáwei møskaimbe Joanan køben,

Joananwei møskaimbe Resa køben,

Resai møskaimbe Zorobabel køben,

Zorobabelwei møskaimbe Salatiel køben,

Salatielwei møskaimbe Neri købig køn.

28Nerii møskaimbe Melqui køben,

Melquiwei møskaimbe Adi køben,

Adii møskaimbe Cosam køben,

Cosamwei møskaimbe Elmodam køben,

Elmodamwei møskaimbe Er købig køn.

29Erwei møskaimbe Josué køben,

Josuéwei møskaimbe Eliezer køben,

Eliezerwei møskaimbe Jorim køben,

Jorimwei møskaimbe Matat købig køn.

30Matatwei møskaimbe Leví køben,

Levíwei møskaimbe Simeón køben,

Simeónwei møskaimbe Judá køben,

Judáwei møskaimbe José køben,

Joséwei møskaimbe Jonám køben,

Jonámwei møskaimbe Eliaquim køben,

Eliaquimwei møskaimbe Melea købig køn.

31Meleai møskaimbe Mena køben,

Menai møskaimbe Matata køben,

Matatai møskaimbe Natán købig køn.

32Natánwei møskaimbe David køben,

Davidwei møskaimbe Isaí køben,

Isaíwei møskaimbe Obed køben,

Obedwei møskaimbe Booz køben,

Boozwei møskaimbe Salomón køben,

Salomónwei møskaimbe Naasón købig køn.

33Naasónwei møskaimbe Aminadab køben,

Aminadabwei møskaimbe Admin køben,

Adminwei møskaimbe Arni køben,

Arnii møskaimbe Esrom køben,

Esromwei møskaimbe Fares køben,

Fareswei møskaimbe Judá købig køn.

34Judáwei møskaimbe Jacob køben,

Jacobwei møskaimbe Isaac køben,

Isaacwei møskaimbe Abraham køben,

Abrahamwei møskaimbe Taré køben,

Taréwei møskaimbe Nacor køben,

Nacorwei møskaimbe Serug købig køn.

35Serugwei møskaimbe Ragau køben,

Ragauwei møskaimbe Peleg køben,

Pelegwei møskaimbe Heber køben,

Heberwei møskaimbe Sélaj køben,

Sélajwei møskaimbe Cainán købig køn.

36Cainánwei møskaimbe Arfaxad køben,

Arfaxadwei møskaimbe Sem køben,

Semwei møskaimbe Noé køben,

Noéwei møskaimbe Lamec købig køn.

37Lamecwei møskaimbe Matusalén køben,

Matusalénwei møskaimbe Enoc køben,

Enocwei møskaimbe Jared køben,

Jaredwei møskaimbe Mahalaleel køben,

Mahalaleelwei møskaimbe Cainán købig køn.

38Cainánwei møskaimbe Enós køben

Enóswei møskaimbe Set køben,

Setwei møskaimbe Adán køben,

Adánwei Møskaimbe Tius køn.

Nacom Pejume Diwesi po diwesi pena jume diwesi xua Jesucristo yabara tinatsi

© 2010, Wycliffe Bible Translators, Inc. All rights reserved. More Info | Version Index