Search form

FESUAKNA 16

Mana le Mamîm

1Israel nam pumpui Elim ata an suakin chu, Sin ramchâra an hong tunga; kha kha Elim le Sinai kâra om a nia; kha zoro kha Aigupta ram ata an suaka irthokin a tha hnina sûn sôm hleiringa nî sûn a ni. 2Kha ramchâra khan Israel nam pumpui Mosia le Arona chunga an ichiar a ni. 3Israelhai khan an kuang, “Aigupta rama hmê bêl kôla kin toi lai le bai khoptela kin fâk lai khan Rengpa kuta kin ithi ni sian chu o! atûn nangni lakin ramchâra hin phîngchâma thi hrangin mipui irbukkhôm murdi hi hin nin ni hong hruaia,” an tia.

4Rengpa khan Mosia kuang, “Irngai ro, nin ta hrangin bai irvân ata zuang inthatir ki ta, khanchu mipuiin a sûn tina an fâk hrang vai va hrût ngai ri sehai, ki dân an zôm le zôm loi ki fiahai theina hrangin. 5Sûn ruk nî sûn chu an va ihrût kha sinsiam an ta; a sûn tina hrang an zêkin inhni a ini hrang a ni,” a tia.

6Khaang khan Mosia le Arona’n Israel mihai laia, “Khohloi tiang chu Aigupta ram ata nangni hruai suaktu chu Rengpa ngêt a nih iti inhre ta an ti. 7Zînga khom Rengpa roiinpuina hmu nin ti; a chunga nin nuarnahai kha a le’nhriat tâk sikin. Keinihai hi tu ual mo kin nia, kin chunga nin inuarna hrang a om,” an tia. 8Khante Mosia’n ama kha la’nhria nin ti, khohloi tiang sa fâk hrang nangni a pêka, zîng tiang bai nin fâk khop hrang dôr nangni a pêk tika chu; Rengpa Pathian khan a chunga nin nuarna kha a le’nhriat tâk sikin, keini hi i ual mo kin nia? kin chunga nin inuar ni maka, Rengpa chunga nin inuar a ni, a tia. 9Khanchu Mosia’n Arona kuang, “Israel irbukkhômhai laia hin, Rengpa kôla hong nâi roi, nin inuarnahai kha a le’nhriat tâk, ti pehai ro,” a tia. 10Arona’n Israel mipuihai laia thu an sîr lai takin ramchâr tiang an irnghata; Rengpa vâr irkhêl kha sûm laia a zuang inlanga. 11Rengpa khan Mosia a chongpuia, 12“Israelhai nuarna kha ki le’nhriata; an kuang khan khohloi tiang hmê fa nin ta, nangtûk chu bai khop takin fa nin ti; kha tena kêng Rengpa nin Pathian ki nih ti inhre ta an ti,” ti pehai ro, tiin.

13Kha nî khohloi tiang chu mamîm an hong vuanga an riakbuk kha an sip zoi tâka, zînga chu an riakbuk vêl kha irdôin a sipa. 14Kha irdô tâk kha a hulin chu ramchârna pil chunga khan thil inperte tehai ivur kâra khan a’rlang pehai phura. 15 Israelhai khan an hmu’n chu, “Imo a ini hrang tâk?” an irti irhlôma, i zât moh a inih ti an inhriat no sikin. Mosia khan an kuang, “Rengpa’n nin fâk hrang piala bai nangni a ipêk a ni. 16Hi hi a ni Rengpa’n, Mi tinin mâni khop hrang dôr hrût unglân, mi inkhat hrangin Omer khat nin in sûnga mihriam om dôr angin nin ihrût hrang a ni, mi tinin nin puan in sûnga omhai hrang nin ihrût hrang a ni, tia thu a ipêk kha a ni,” a tia.

17Israelhai khan a iti angin an thoa; a sen a zârhaiin an hrût intama, a senin an hrût intôma. 18 Khaang khan Omer leh an irtea, a hrût intam khomin a zôk om maka, a hrût intômhai khomin tôm pehai ual ma; mi tinin mâni khop dôr hrangin an hrût senga. 19Khanchu Mosia’n an kuang, “Mi tukhomin nangtûka hrang hôi no roi,” a tia. 20Khannisianlân Mosia chong zôm nuam mahaia; a senin nangtûka hranga an hrêa; an ihrêhai kha a’rngê pehaia, a thu pehai ta, khasikin Mosia kha a ning an mur pe ok tâka. 21Khaang khan a zîng tin an khop hrang dôr ti no chu hrût ta mahaia, khanchu misa a hong lum tena chu irnênga an ihrût zoi loi la om chu a zôi ving ngai. 22Sûn ruk nî chu bai kha mi inkhat hrangin bak hni Omer inhni chit an hrûta; khante mipuihai hruaitu khan Mosia an hong hrila. 23 Ama’n an kuang khan, “Rengpa thupêk chu hi hih a ni, nangtûk chu irngamnî sûn a ni, Rengpa hranga irngamni irthiang. Khasikin nin isuang nuam dôr suang unglân, a but nin inuam kai but roi, a ban la om kha chu nangtûka hrangin se roi,” a tia. 24Mosia iti angin zînga hrang an khâia, kha kha chu a mirim khom se pehai maka, irngê pehai mah. 25Khanchu Mosia’n, “A vuan chu hi hi fa roi; a vuan chu Rengpa hranga irngamnî sûn a ni sikin, riakbuk kôlvêla ite bu hmu thei ni no ni. 26Sûn ruk sûng fâk hrang bûm nin ta, khan sûn sari nî chu, irngamnî sûn a ni, ite om no ni,” a tia.

27Kha tena khom khan sûn sari nî khan mipui a sen a zârhaiin hrût hrangin an la’rthoka, hrût hrang zel hmu ta mahaia. 28Rengpa’n Mosia kuang khan, “Ki thupêkhai le ki dânhai hi idôr ten mo zôm loi nin la itum? 29Rengpa’n irngam nî nangni a ipêk hi inhre roi ba, khasika khan kêng sûn ruk nî khan, sûn hnia nin khop hrang dôr nangni a ipêk a ni kha te; mi tin mâni hmun chita omchian roi, sûn sari nî chu tukhom mâni om hmun ata suak viat no ri sehai,” a tia. 30Khaang khan sûn sari nî chu an irngam tâka.

31 Israel mihai khan bai irhming kha Mana an tia. Koriender (theiru) ru anga ngoi le bai khuaitui leh siam anga thum a ni. 32Mosia’n, “Hi hi a ni, Rengpa’n nin irchihai dênin Omer inkhat se roi: Aigupta rama bai kha an la hong hmu theina hrangin, tia thu a ipêk kha,” a tia. 33 Khaangin Mosia’n Arona kuanga, “Bêl va la’nlân, Omer inkhat Mana hi thun ro, nin irchihai dênin vong mai hrangin Rengpa makunga se ro,” a tia. 34Rengpa’n Mosia thu a ipêk angin Arona khan vong mai hrangin thuthung bôm kôla a sia tâka. 35 Israelhai khan mihriam omna ram an tung mâka chu, kha kum 40 sûng kha chu Mana an fâka; Kanaan ramri dep an tung mâka chu an fâk ngai. 36Omer khat hi epha hmun sôma zêkin inkhat a ni.