Search form

FESUAKNA 19

Israelhai Sinai tânga

1Israelhai kha Aigupta ram ata an zôk nî ata tha thumna taka khan Sinai ramchâr an hong tunga. 2Refidim ata an suak zoiin Sinai ramchâr an lûta, kha ramchâra khan, Israelhai chu tâng kôla khan an riaka. 3Khanchu Mosia kha Pathian irtongpui hrangin tânga khan a hong luia. Rengpa khan tâng ata kha a koia, a kuang, “Jakoba in sûngkuahai laia hiang hin ti ro, Israel mipuihai laia khom: 4Aigupta chunga ki sinthohai le irmupuiin a tê a mitha chunga a ichôi ngai ang khan nangni ki chôia, ki kuanga nangni ki hruai intung lam nin hmua. 5 Khasikin ki chong nin irngai ta taka, ki thuthung hi nin vong maiin chu, rammuala nam tin laia ki ta hrangin ki’rchon nei thei nin ti: rammual pumpuia chi, nam irthiang ni nin ti, iti hril roh. Hi hi Israelhai laia ni insîr hrang a ni,” a tia. 6 Khanchu ki tah hrangin ochai chu, nam irthiang ni nin ti; iti hril roh. Hi hi Israelhai laia ni insîr hrang chu a ni, a tia. 7Khanchu Mosia chu a chum nôka, mipui hruaituhai a koibûma, Rengpa thupêk murdi kha a hril vinga. 8Mipuihai khomin, “Rengpa’n a iti murdi chu tho kin ti,” an rêngin an ti inruala. Khanchu Mosia’n mipuihai sâmna kha Rengpa kuang an tung nôka.

9Rengpa khan Mosia kuang, “Irngai ro, nang ki chongpui lai tak mipuihai inhriat sa theina hrangin le kumtuangin ki thu an zôm mai theina hrangin sûm irsatakin ni kuang zuang ki ti,” a tia. Khanchu Mosia khan mipuihai iti kha Rengpa an hril nôka. 10Rengpa’n a kuanga, “Mipuihai kuang fe’n lân, a vuan le nangtûk khi thâr roh. An puanhai irsutirhaiin lân, 11sûn thumna nî tena chu irzoi ri sehai; kha nî khan chu mipuihai mit hmua Sinai tânga khan Rengpa a zuang ichum hrang a ni sikin. 12 An kuanga khan, Irdîn unglân, tânga khan hong lui viat no roi, tâng hmor khom hong tôn viat no roi; tukhomin tâng a hong tônin chu lung leh dêng that hrang a ni, 13kut leh zel inthem phal ni maka, lunga dêng that hrang a ni, anino’nchu thala kâp that hrang a ni; sa mani mihriam mani a huam dôr that hrang a ni, khannisianlân bekul an ring tena chu mipuihai kha tânga an ilui hrang a ni,” a tia.

14Kha zoiin chu Mosia kha tâng ata a zuang chuma, mipuihai kha a thâr irthianghaia; an puanhai irsûk infâiin, 15Mosia’n an kuang, “Sûn thum nîa hrangin irsiam ving unglân, pasal le nupang chunga irdîn roi,” a tia. 16 Sûn thum nî zînga khan chu khua a hong irzila kôl a irtêka, tâng sîp ata sûm a zuang irsâtira, bekul inring takin an tuma; riakbuka om an rêngin an phûk an thinga. 17Khanchu Mosia khan a hruai suakhaia; tâng kôla khan an ngîra. 18Sinai tânga khan Rengpa kha mei angin a zuang chum sikin an thim khap tâka; kha meikhu kha, hâl inzôina meikhu angin a tâk chûl chûla, tâng kha a saterengin an hnîngtira. 19Bekul irhâi an ringtir si sita, khanchu Mosia’n thu a hrila, Pathianin khonri angin a sâma. 20Pathian kha tâng sîp taka a zuang chuma, Mosia chu tâng sîpa khan a koia, khanchu Mosia kha a hong luia. 21Rengpa khan Mosia kuanga, “Zu chumin lân, mipuihai khu zu ngo ro, anino’nchu, Rengpa hmêl hmu tumin ramri an hong khêl duaiin chu, mi tamtak an irhmang hrang a ni. 22Ochai nihai khom sianlân, a ni hong nâi nuamtuhai chu an irthâr ngêt hrang a ni. Anino’nchu, deng ki intheitirhai hrang kêng,” a tia.

23Mosia’n, Rengpa kuanga, “Mipuihai hi chu Sinai tânga hong lui thei mahaia; nangma’n, tâng kôla hin ramri khang pehaiin lân, thâr irthiangna hrangin, nangma’n thu ni ni ipêk mo ni ma,” a tia. 24Rengpa khan, “Zu chumin lân Arona hong hruai ro, khannisian ochaihai le mipuihai chu ki kuanga hong hrangin ramri an ikhêl viat hrang ni ma, khano’nchu deng ki intheitirhai hrang kêng,” a tia. 25Khanchu Mosia chu mipuihai kuang a zu fea, Rengpa’n a iti murdi a hrilhaia.