Search form

FESUAKNA 30

Mirimhoi hâlna hrang maichâm

(Fes 37.25-28)

1“Sitim thing le mirimhoi hâlna hrang maichâm siam roh. 2Irki minli nei mûk khat vêla sei, a’rsâng lam mûk hni ni sianlân, a’rki minlia khan a’rki inchor maichâm leh tuan khata siam om ri se. 3A chung tianga incham, irki minlihai, a’rkihai chu rângachak rônga inluan hrang a nia, a hmor tiang chu rângachaka tuam hrang a ni. 4A irzônna hmol rolna hrang rângachak irkual inhni siamin lân, a sîr hitiang, hitiang a hmor hnuaia khan inkhop roh. 5A zônfung chu sitim thing ni sianlân, rângachak leh ni ituam hrang a ni. 6Hi mirimhoi hâlna maichâm hi Thuthung Bôm maton tianga puanzâr inkhâina maton tiang khan intoitir roh. Kha hmuna khan nang ki irhmupui hrang a ni. 7A zîng tin, Arona’n meiser infâi balamin, mirimhoi thil a inhlan hrang a ni. 8Khohloi tiang meiser an chok zoro khomin khaang khan a itho ngêt hrang a ni. Zoro la hong om thiai maia khom, hi mirimhoi thil inhlan hi irngam loiin a irzôm mai hrang a ni. 9Hi maichâm chunga hin hâl phal loi, thil mirimhoi, hme thil inhlan mo, bu thil inhlan mo, kha hnung uain khom thilin ni inhlan hrang ni mah. 10A kum tin voikhat, sual irbôlna thil inhlan thisen chu, Arona khan maichâm thâr irthiangna hrangin a’rki minli khan a ipol hrang a ni. A kum tin zoro la hong oma khan tho mai hrang a ni. Hi maichâm hi keima Rengpa kuanga inhlan a irthianghai hrang a ni,” tiin.

Rengpa omna puan in enkol dân

11Rengpa khan Mosia kha hiang hin a ti pea. 12“Irteppui zoroa a mi Israel mihai chunga vânduaina irkhêl a tung loina hrangin, mi tinin mâni hringna irtanna an ipêk ving hrang a ni. 13 Irteppuia om murdi an pêk hrang dôr sum an inkung chu an ipêk ngêt hrang a ni. Ki omna puan ina hrang, varna le diktaka varh sekel chimrip, Gera sômhni an pêk ngêt hrang a ni. Mi tinin sekel chimrip ki kuang thilinhlan an inei ving hrang a ni. 14Irteppuia tep kum sômhni chung tianga mihaiin Rengpa kuang hiang thil hi an inhlan ving hrang a ni. 15An hringna irtanna hrang Rengpa kuang an inhlan zoro khan sekel chimrip, mi tinin an inhlan ving hrang a ni. Mi irchong khomin hi nêka tam a inhlan hrang ni mah. Mi inriang khomin hi nêka tôm a inhlan hrang ni ual mah. 16Israel mihai laia irthokin hi hringna irtanna sum hi irfuangin lân, ki omna puan in enkolna hrangin hmang roh. Hi khâzana hi an hringna irtanna hranga chôi ni a ta, anni ki sûnghual ti inhriatmaina hrang ni a ti,” tiin.

Dâr tâbor

17Rengpa khan Mosia kha a ti pea, 18 “Dâr tâbora toina hrang dâr thîrin siamin lân, puan in le maichâm kâra intoitirin lân, tui om mai ri se. 19Arona le a nâihai khan an kut le ke irsûkinfâina hrangin tui kha an ihmang hrang a ni. 20Uain inna mo, fâk nêk zongna mo thil inhlanna hranga maichâm an pan mân khan chu thatin om no nihai. 21An thi loina hrangin an kut le ke an irsûk ngêt hrang a ni. Anni le an irchihaiin kumtuanga an hmang hrang chu a ni,” tiin.

Irpol zât sahriak

22Rengpa khan Mosia kha hiang hin a ti pea, 23“Mura tui her ruk, thingzungthum mirimhoi her thum, thing rimhoi her thum, 24kesepât thing her ruk, ki omna puan ina hmang lai her leh varh kha lakhômin lân, oliv hriak litar minli leh polin lân, 25mirimhoi irpol anga irthiang takin siam sa roh. 26Ki omna puan in thuthung bôm. 27Dokâng le hmangrua danghai, meiser siana le hmangrua danghai, mirimhoi hâlna hrang maichâm, 28Thil inhlan hâlna hrang maichâm le a hmangrua murdihai, tâbor irthûlna le an toitirnahai inlâpna hrangin kha kha hmang roh. 29Hi thilhai hi fel takin serindangin lân, hong irthiang khak an ta, mihriam mo, i dang khom a hong tônpu dôr chu a’rthiangna irtha khan a innatirhai hrang a ni. 30Arona le a mihai chu ki sintho hrangin sahriak hi polhaiin lân, ochai hrangin namindethai roh. 31Israel mihai chu hrilhai roh. Hi hriak irthiang hi ki sinthotu ni hranga serindang zoroa irpol hrangin hmang mai ngai hrang a ni. 32Mi pangaihai chu pol hrang ni maka; thil dang dang irpol ngai dân hmangin a dang nin isiamsuak hrang ni mah. Thil irthiang a nia, nin iser ok hrang a ni. 33Hianga irpol hrang sahriak le thil danga ki siamhai mo, ochai rua ni loi lei pol mihai chu ki mihai laia inkhat khom tep ni no nihai,” a tia.

Mirimhoi hâl hrang

34Khan, Rengpa’n Mosia kuang, “Hi mirimhoi Netep hai, Sekelet hai, Kalbana hai, Bero irfîmhai ir-angsarin la’nlân, 35mirimhoi sinpu sin dân angin mirimhoi takin siamin lân, fâi tak le irthiang taka a om theina hrangin michi pol roh. 36Vîkkham viatin lân, nôiinditir ro, nang ki’rtongpuina hrang hmun, irtongna Biakbuka Thuthung Bôm maton tiang khan sia’n lân, nangma ta hrangin irthiang tak ni a ti. 37Hi mirimhoi sin dân hranga hin, nangma ta hrangin mirimhoi zel siam ta no ro, Rengpa ta hranga hual a ni sikin, thil irthiang tak ni ibe ta hrang a ni. 38Mi tukhomin khaanga mirimhoihai kha mâni hmang hrangin a siama ni’n chu a mihai lai ata ipai ni a ti,” tiin.