Search form

FESUAKNA 40

Rengpa omna puan in sin le inhlan

1Rengpa’n Mosia kuang hiang hin a ti pea, 2“Tha masa tak, sûn khatna nî chu Rengpa omna puan in sin roh. 3Thuthung Bôm a sûnga thupêk sômhai omna kha a sûnga sen lân, a maton tiang puanzâr târ ro. 4Dokâng chu a sûnga thunin lân; a chung tianga hmangruahai se roi. Meiser siana khom thuninlût sa unglân, a chunga meiser intoi roi. 5Rângachak maichâm, mirimhoi hâlna hrang chu, Thuthung Bôm maton tiang se unglân, puan in mikota khan puanzâr târ roi. 6Hâlirvôm thilinhlanna hrang maichâm chu puan in maton tiang intoi unglân, 7irsûkinfâina tuibêl chu tui sung inbitin puan in le maichâm kâra se roi. 8A tual kha dâiin sung unglân, a kotbâia khan puanzâr târ roi.

9“Khante, puan in le a hmangrua murdi chu hriak irthiang polin thârin lân, a hong irthiang hrang a ni ta. 10Kha hnung chu maichâm le hmangruahai pol intharin lân, a hong irthiang hrang a ni ta. 11Irsûkinfâina tuibêl le a toihmun khom khaang dênin ni ithâr hrang a ni.

12“Arona le a nâihai puan in mikota hong hruaihaiin lân, dân anga irthâr hrangin tuiirsil hrangin ti pehai roh. 13Arona chu ochai tukfamhaiin irvo sian, sahriak irthuin hiang tak khan ni iserhai bîk hrang a ni, ochai nia ki sin a tho theina hrangin. 14A nâihai khom koi inlûthaiin lân, anni chu songkol irfual innghâktirhai roh. 15Khanchu an pa sahriak ni irthu ang tak khan, anni chu ochai sintho hrangin, sahriak irthutirhai roh. Hi hriak irthu hin anni chu zoro la hong hranghaia khom ochaiin a isiamhai mai hrang a ni ta,” a tia.

16Rengpa thupêk ang tak khan Mosia’n itinrêng a tho vinga. 17Khaang takin Aigupta ram ata an suak zoia, kum hnina le tha masa tak sûn khat nî sûn khan, Rengpa omna puan in chu an indingtir ta. 18Mosia’n a bul intoinahai an deta, a hmangruahai a’rfûktira, tângkhang an khopa, chopuihai a phuna; 19puan in chunga khan a irkhûna puanzâr a târa, a chung nôka khom khan a’rthuatira, Rengpa thupêk lam takin. 20Khanchu lungphêk inhnihai kha a lâka, Thuthung Bôm sûnga a siah tâka, a zônfunghai chu Bôm irzônna irkual sûnghai khan a rola, a sîngna leh a sînga. 21Bôm chu puan in sûnga a chôi inlûta, a irhli hrang puanzâr chu a târa, Rengpa thupêk lam takin an sina.

22Puan in sûng tentan sûnginta ual hmâr tiang khan dokâng a doa, 23Rengpa thupêk ang takin a chunga khan bai ser a siaa. 24Sim tiang khan puan in sûnga meiser siana chu dokâng depna tiang an toia. 25Kha hmuna khan Rengpa makunga, a thupêk ang takin meiserhai chu an choka. 26Rângachak maichâm chu puan in sûnga tentan puanzâr kôla a doa. 27RENGPA thupêk ang takin thil mirimhoihai chu a hâla. 28Puan in mikota puanzâr chu a târa; 29kha puanzâr pêna khan hâlirvôm thilinhlan le bu le bâl thilinhlanhai a’rhlana, RENGPA thupêk lam takin. 30Dâr irsûkinfâina tuibêl chu puan in le maichâm kâra khan a siaa, tui a sung inbita. 31Kha khan Mosia’n, Arona le a nâihai khom an kut le kehai an irsûkinfâia, 32puan in sûnga mo, maichâma moh an fe hrang richamin RENGPA thupêk lam ang takin an kut le kehai an irsûkinfâi ngai a ni. 33Mosia khan puan in le maichâm irhualtu hrang dâi a sina, a dâi mikota khan puanzâr a târa.Hiang hin sin hrang murdi chu a izoi zit a ni ta.

RENGPA omna puan in chunga a tuamtu sûm

(Nam 9.15-23)

34 Khanchu puan in kha sûmin a tuama, RENGPA ompuina vâr irkhêl khan a sipa. 35Hi sika hin Mosia kha puan in sûnga a ilût thei ta loi a ni. 36Israel nâihai khan puan in chung ata kha a’rthon vaiin an riakbuk kha an irthon theia. 37Sûm kha, kha hmuna khan a om kâr kai chu an riakbuk kha an irthon ngai loi a ni. 38An chaninvâi laiin a zîng sûng kâr chu sûna RENGPA ompuina sûmin a tuama, zâna meichokin puan in chunga khan an hmu ngaia.