Search form

FESUAKNA 7

Arona khianghrol

1Rengpa’n Mosia kuang khan, “Irngai ro, Faroa ta hrangin, Pathiana nang ki siam tâk kêng, ni upa Arona hrangin deipu ni ta ni ti. 2Thu nang ki ipêk murdi hrilhai zitin lân; khanchu ni upa Arona’n Faroa kha a ram sûng ata Israelhai kha insuatir hrangin hrilhai a ta, 3 khannisianlân Faroa lungrîl inngartir pe nôk ki ta, irsinsiana le sinirkhêl ki tho chu Aigupta rama hin hong inthang a ta. 4Khan, nikhomsianlân Faroa hin pom nuam no ni, khanchu Aigupta ram sûnga hin ki kut irnghat ki ta, annihai chunga a sate’n dengtheina tuangin ki mi Israelhai chu Aigupta ram ata hruai suakhai ki ti. 5Khanchu, Aigupta mihaiin, an rama ki kut ki phara, Israelhai ki hruai suakhai nî tena kêng, Rengpa ki nih ti hi an la inhriat hrang,” a tia. 6Khanchu Mosia le Arona khan a iti ang takin an hong thoa, Rengpa’n thu a ipêkhai ang takin. 7Hi zoro lai hin Mosia chu kum sômriat mi a nia, Arona chu kum sômriat inthum mi a ni.

8Rengpa’n Mosia le Arona kuang khan, 9“Faroa’n sinirkhêl tho roi nangni a lei ti’n chu, Arona kuanga ni khianghrol kha la’nlân hnuaia pai ro, khanchu mirûl hong chang a tih ti pe’n lân,” tiin a hrilhaia. 10Khanchu Mosia le Arona kha Faroa kuang an va lûta, Rengpa thupêk angin an thoa; Arona’n a khianghrol kha Faroa le a siahlohai mit hmua a paia, mirûl a hong chang pehai tâka. 11Khanchu Faroa’n dôithei le mi vârhai a koihaia, Aigupta ram sûnga mitphil dôi theihai khomin an khianghrolhai an paia, mirûl an hong chang pehai tâka. 12Khannisianlân, Arona khianghrol khan a danghai kha an volpaihai vinga. 13Khannisianlân, Faroa lungrîl chu a ngar pe maia, an thuhril kha zôm nuam ual maka, Rengpa’n a lei iti tâk ang khan.

Aigupta ram hremna thisen

14Khanchu Rengpa’n Mosia kuang khan, “Faroa lungrîl an ngartir sikin, a mihai insuatir hrangin nuam maka. 15Khanchu Faroa kuang zînga va fe nôkin lân; tui chôi fe ngai a ni sikin, ama irhmupui hrangin tui kôla khan ngîrin lân; ni khianghrol mirûl chang thei kha chôi roh. 16Khanchu a kuang khan, ‘Rengpa, Hebraihai Pathianin, ki mihai hin ramchâra ki sin an tho theina hrangin insuahai ro, tiin a ni hong itîr a ni; atûn ten ni la ngaipoimo no’n chu. 17 Rengpa’n a vuan ata ni la’rhriatsuak no’n chu Rengpa ki nih ti inhre lat ta ni ti. Irngai ro, ama ki mi hong tîrtu khianghrol leh hin ivadunga tui hi vîk a ta, khanchu thisen chang ving a ti. 18Kha tena chu tuia ngahai, khom thi ving an ta, tui khom a mirimhai hong siat ta a ti. Aigupta mihaiin kha tui khom kha in thei no nihai a ti, va ti ro,’ a tia. 19Khanchu Rengpa’n Mosia kuang khan, ‘Arona kuanga ni khianghrol chôiin lân, Aigupta ram tui chunghaia, ivadung haia, dîl le tui omna hmun tin chunga ni khianghrol kha pharin lân, tui chu thisen a hong chang theina hrangin, kha tena chu Aigupta rama thing le lunghai tenin thisen hong om ving a ti, a tih va ti ro,’ a tia.

20Khanchu Mosia le Arona haiin Rengpa thu pêk angin an thoa. Khianghrol kha an irleka, Faroa le a siahlohai mit hmua ivadunga tui kha a hong vîka; khan ivadunga tuihai kha thisen a hong chang zit ta. 21Tuia nga om murdihai khom an hong thi zoi tâka; Aigupta mihaiin in thei ta mahaia; khanchu Aigupta ram lian dôra khan thisen a hong bit zoi tâka. 22Khanchu Aigupta rama mitphil dôi theihaiin an dôi hmangin an ni khom an thoa; Faroa lungrîl chu inngartirin a oma, an thu ite irngai nuam loiin a oma; Rengpa’n a lei iti tâk ang khan. 23Khanchu Faroa chu a in tiang a kîr nôk tâka, ite a lungrîl châng pe viat maka. 24Aigupta mihai khan tui in hrang zongin muang kôlhai khan an tuka; ivadunga tui an in thei ta no sikin. 25Rengpa’n tui a vîk nî ata irthokin sûn sari a hong ni ta.