Search form

IRPHUTNA 23

Sari thi thu Abrahama’n a thân hmun hrang ram irchôk

1Khan Sari dam sûng kum chu 127 a nia: hi hi Sari dam sûng kum chu a ni. 2Khan Sari chu Kanaan ram Kiriath-arba khuaa khan a thia, (hi hi Hebron khua a ni): khan Abrahama chu Sari chûlpuia châ hrangin a honga.

3Khan mithi ruak mâkin a thoia, Hit mihai kuanga khan, 4 “Kei chu nin laia mikhual anga om ki nia, ki mithi ruak hi ki hmu loina rama nin phûmtir hrangin hmun ni pe roi,” tiin a hrila. 5Khan, Hit mihaiin Abrahama kha hiang hin an sâma, 6“Ka pu irngai ro, nangma chu kin laia hin hruaitu inthangtak ni nia: kin thâna hin ni inuamna taka ni mithi ruak chu phûm ro: ni mithi phûmna hrangin, mi tukhomin mithi ruak phûmna hrangin inhroi ma ung,” an tia.

7Khanchu Abrahama kha a thoia, kha mihai Hit mihai kha chubai a mûkhaia, 8khan, ki mithi chu hmu loina rama ki phûm hrang hi a dik nin ti’n chu, Makpela khura loihnôm a om, kha kha ni pe hrangin Zohara nâipa Efrona kuang ni zong pe roi. 9Nin laia irphûmna hmun irchon a man nin iti ang lamin ni pe roi, tiin a nghihaia. 10Khan Efrona chu Hit mihai laia a om maia; khanchu Hit mi Efrona chu Hit mihai inhriatin, a khua dâimitzînga lût murdi inhriatin, 11“Ni no ni, ka pu ni’rngai hi ro: loi khom nang ki pêk, loihnôma khur khom nang ki pêk; ni mithi chu phûm ro,” tiin Abrahama an hrila. 12Khan Abrahama chu kha rama nâihai makunga khan chubai a mûkhaia, 13khan, kha rama omhai inhriatpuiin Efrona kuang, “A sa ni ni tipuiin chu; loi man chu nang pe ki ti; ki kut ata la tan lân, kha hmuna khan ki mithi phûm ki ti,” tiin a hrila. 14Khan Efrona’n Abrahama kha hiang hin a ti pea, 15“Ka pu ni’rngai pe hi ro: irnêng hmun tangka irzaminli irnôi, nang le keima kâra irpêk ngêt mo a inang? ni mithi chu phûm zel ro,” a tia. 16Khanchu Abrahama’n Efrona hê a lâk tâka; khan Abrahama’n Hit mihai inhriatin Efrona’n tangka sum a iti dôr chu sumru irzaminli, sum hlo mihai ihlo zât chu varin Efrona a pêk tâka.

17Kha zoiin chu Efrona loi, Mamre irdîna Makpela rama om chu, a loi le a sûnga khur le, a loia thing om murdi, a ram kôla thing om murdi chu, 18Hit mihai mithmua, a khuaa lût murdihai mithmua khan, Abrahama irchon hrangin pêk indetin a om tâka. 19Kha zoiin chu Abrahama’n a dôngma Sari chu Kanaan ram Mamre kôla (Hebron khua a ni.) Makpela loi kôla khura khan a phûm ta. 20Khanchu loi le a sûnga khur om kha irphûmna irchon hrangin Abrahama pêk indetin a om ta.