Search form

IRPHUTNA 44

Josefa khilât irhmang

1Khan Josefa’n a in enkoltupa kuang khan, “Kha ki mihai puak kha an inhnê hrang ang dôr chitin bu siam pehai unglân, an sumhai khom an hmarsaa khan siam ro, 2khan ki tangkarua khilât satak kha an mitumtakpa puaka siamin lân, a sum leh khan,” tiin thu a pêka; khanchu Josefa iti angin a tho pea. 3Khua a hong vârin chu an sakuartunghaia chuangin a tîrhaia. 4Khanchu an fea, zoro sôtnote hnunga chu Josefa’n a in enkoltupa kuang khan, “Thoiin lân, kha mihai kha va’rzûlhaiin lân, ni va phâkhaiin chu, itho sika mo thil sa teh thil saloiin nin ithuan? 5kha thil kha chu ka pu uain inna le a tasânna ngai kêng? Hianga thil nin itho hi chu, nin inchâi ok a nih va ti ro,” a tia.

6Khanchu a va phâkhai tena chu kha thu kha a ti pehaia; 7“Ka pu i thu mani tâk, khaang khan teh ni ni ti lik tâka? Ni siahlohai hin khaanga thil kha tho le mo ni nir hoitir. 8Irngai ro, kin phura sum kin ihmuhai lua khom Kanaan ram ata, ni kuang kin zuang chôi nôk kha te: itin mo ni pu in ata sum mo, rângachak mo kin inrûk ngam hrang? 9khasikin ni siahlohai laia hin enin lân, tu phura mo ni man, ni imantakpu chu thi dênin kin pu suak chang ri se,” an tia. 10“A ni nangni iti lam tak ni ri seh duah, ki imanpu tak chu keima suak chang ri se, a tia. a danghai chu ite nangni ti no ning,” a tia. 11Khanchu an phurhai insumin an kêlsuahaia; 12khanchu a ulian dônin a zonga, khanchu kha tangkarua khilât kha Benjamina phura a hmua. 13Khanchu an songkolhai an ir-ekthêra, an sakuartunghai chunga chuangin kho sûng tiang an kîr nôka.

14Khan Juda le a sanghaiin Josefa in an va tungin chu, a lei om maia, kûnin chubai an va mûka. 15Josefa’n an kuanga khan, “I zât thil mo nin itho tâk hi? keima anga mi hin tâ a sân thei nin ni isôn loi ma ni?” a tia. 16“Ka pu ni kuanga imo kin ihril ta hrang? I ang tak ngân mo kin ihril thei ta hrang? Pathianin ni siahlohai sualna chu a ihmu a ni ta. Ka pu kin rêngin ni suak kin ni ta,” an tia. 17“Khaang khan chu nangni sia thei no ning; a kuta tangkarua khilât an ihmupu tak vai kêng ki suak ni a ta; nangni chu nin pa ina fe roi,” a tia.

Juda’n Benjamina sansuak tumna

18Juda khan Josefa a va nâia, “Ka pu lungkham takin nangma inhriata thu bâi khat ki hril nuam a tia, khannisianlân ni ning an mur khomin a’rngai ni thei ngêt ni ti; nang chu Faroa anga mi lian ni nia. 19Ka pu, nangin pa le urêng dang mo nin nei? tiin ni nir dona. 20Ka pu keini’n chu ni kuanga khan, o kin pa chu tar tak a ni tâka, a tar hnunga nâi, nâipangte kin neia, ama chungapu chu a thia, a nu inkhat le nâi chu ama vai kêng a ni ta, a pa khan ama chu an hlu dor dor a ni: kin tia. 21Khan nangma’n kin kuanga khan, ‘Ama kha ki mithmua hin zuang hruai roi,’ ni tia, 22ka pu, keini’n chu tôia chu zuang hruai thei no ni ung kin tia; a pa a mâksanin chu a pa beidongin a ithipui hrang kêng kin tia. 23Khan nangma’n kin kuang nin mitumtak nin zuang hruai no’n chu ki hmêl hmu thei no chin ni, ni tia.

24“Khanchu ka pa kuang ki hong tungin chu, ni thurchi kha ka pa kin insîr pea; 25Kin pa khan, ‘Fe nôk unglân bu zu’rcho nôk ta roi,’ a tia. 26Keini’n chu zu fe thei ta no ni ung; kin mitumtakpa hi kin hruai vaiin kêng kin zu ife thei hrang, khano’nchu ni hmêl hmu thei no ni ung, kin tia. 27Khan ni siahlo mi kin pa khan, ki dôngma’n nâi inhni vai a ni neipui ti khom nin inhriat. 28Inkhat chu ki kuang ata a suaka, ramsa’n an isê that ni a tih tiin ki oma, khatak ata hmu ta loiin ki oma; 29khaang khan hi mi khom hi nin hruaiin chu thil saloi zu tongin om a ta, keima tar luchuak tâk hi beidong pumin kêng thânmual nin ni inliamtir hrang a tia. 30Khasikin tôia hi kin hruai no’n chu kin pa hringna le tôia hi a sate’n a’rzompui sikin, 31hiang hin kêng a ini hrang, tôia chu hong suak nôk ta mah ti an hriatin chu, a ithipui hrang kêng, kha tena chu keini ni siahlohai khom hin kin pa chu beidong pumin thânmual inliamtir kêng kin ichang hrang; 32kei, ni siahlo hin kin pa kuang ata nuamloi puma ni kuanga zuang hruaitu hin kumtuangin a mô ki iphur hrang tiin, ka pa kin thêmin a bultumtu ki ni tâk sikin. 33Khasikin keima hi tôia irthûlin, ni suaka nin omtirin lân, tôia chu ni tîr pe nôk roh. 34Tôia ki hruai no’n chu ka pa hmêl itin mo ki ihmu thei ta hrang? ka pa chunga siatna hong tung hrang ki ihmu a ni,” a tia.