Search form

LEVI DÂN 11

Hme fâk theihai

(Dhn 14.3-21)

1Rengpa’n Mosia le Arona kuang 2“Israel mihai kha hiang hin hrilhai roi. 3Tânga lêng, hiang sahai hi fa thei nin ti: a kemitin têra suak, a fâk insoi ngai sâ rêng rêng chu fa thei nin ti. 4Khannisianlân insoia inlem mani a mitin têr loia a suak laia om mani, hihai hi chu nin ifâk hrang ni ma; saringsei, insoiin invol khom sianlân, a mitin a têr no sikin, nin ta hrangin a iporinche a ni. 5Khan, mizupui, an soia an lem nâkin, a mitin a têr no sikin; nin ta hrangin a iporinche a ni. 6Khan, mizupui kha insoia an lema chu, khannisian a mitin a têr no sikin: nangni hrangin a porinche a ni. 7Vok hme fa no roi, sâ porinche a ni, a ke mitin a’rkaka chu, khannisian insoiin invol mah. 8Hiang sâ hmehai hi chu fa no roi, a thi tâk ruak khom tôn no roi, a porinche a ni.

9Nga chi tinrêng, tuia omhai, tuikhangliana om, dîla om, hlip le a phe neihai chu fa thei nin ti. 10Tuia lêng hlip le a phe nei loi chu fa loi hrang a ni. 11Khahai kha intir a om, a tôn khom tôn no roi. 12Tuia lêng, hlip le a phe nei loi chu nin ifâk hrang ni ma.

13Hi vâhai hi vâ intirom an ni: irmu, simbu 14muhâite, vânlaiirmu chi rêng rêng 15vaâk chi rêng rêng, 16vâ ngalirsâng hai, meibâk, tuivaârngoi, tuikhanglian vahai, irmu chi rêng rêng 17rângkêk, vadung irmuhai, suitilil hai 18simbu misiaknei, raikoso hai, 19khânghlâi hai, dîl va chi rêng rêng, sualungvakâmkei hai le bâk hai.

20Thilhring mitha nei, ke minlia irvâk chi rêng rêng chu nangni hrangin a porinche a ni. 21Irkâr theina hrang ke mitin irphal nei zât rêk chu fa thei nin ti. 22Khâihmimse chi rêng rêng, khâiruang chi rêng rêng, ruanguiêk chi rêng rênghai fa thei nin ti. 23Mitha nei, ke minlia irvâkhai chu nangni hrangin intirom a ni. 24A thi tôn murdi khohloi dênin porinche a ti. 25A hme khom puan diarin a tônin chu irsu hrang a ni, khohloi dênin a neitu chu a porinche a ni.

26Sa khom a mitin irkak khomsian insoi loi mani, a mitin irkak sualoi rêk chu a iporinche a ni, a ruak tôn chu porinche a ti. 27Ke minli nei, kepâr irtuam murdi chu, an iporinche a ni, an ruak tôn chu khohloi dênin porinche a ti. 28An ruak lâktu khan puandiar a irsûk hrang a ni, khohloi dênin porinche a ti; hi ruakhai ang hi nangni hrangin a porinche a ni.

29Irnênga a’rvâkhai ang zât hi nangni ta hrangin a porinche sa a ni; ibûi, mizu, châichek rêng rêng, 30tokke, innghâk, laikin, ûleng kinsanêlnek. 31Hiang a boka irvâka lôn chi hi nin ta hrangin a porinche a ni. A thi tôn khom khohloi dênin porinche an ti. 32Khan, a thiin chu thing mani, puandiar mani, savun mani, hmarsa mani, thil sianaa hmang tâka khom a delin chu porinche a ti, irthiang nôk zôi zel a ti. 33Pilbêl sûnga a tâkin chu a sûnga om tinrêng kha porinche a ta, a bêl kha zêmkhoichit hrang a ni. 34Thil fâk thei chi rêng rêng, khaang bêla lei om chu irchôk a niin chu porinche sa a ti; khaang bêla inthei chi om rêng rêng khom porinche sa a ti. 35Hihai thi ruak hi bai inzêina bêla mani, a tâkin chu porinche a ta, inkhoichit hrang a ni. 36A thi ruak chu i ang khomin tôn sian a tôntu chu a porinchea, khannisian, tuikuanga, tui panga ta sian porinche ma. 37Song hranga chîmu sia chunga tâk khom ni sian, chîmu chu porinche ma. 38Chîmu chu tuia an inchie laiin, hi a thi ruak hi a tâkin chu porinche a ti.

39Sa fâk zât thi sianlân, a ruak tôn murdi khohloi dênin porinche an ti. 40A hme fâk chu a puandiar a irsûk hrang a ni, khohloi dênin porinche a ti. A hme pêltu khomin a puandiar a irsûk hrang a ni, khohloi dênin porinche a ti.

41Thilhring, irnênga boka irvâk zât hi nin ifâk hrang ni mah. 42A’rtôla irtôlhai, ke minli mani kha nêka tam mani nei irnênga irvâk zât rêng rêng hi nin ifâk hrang ni ma, a porinche a ni. 43Hihai hi nin fâkin chu intirom ni nin ta, porinche nin ti. 44 Kei Rengpa hi nin Pathian ki nia, ir-enkol insa unglân, kei hi ki’rthiang a ni, nangni khom nin irthiang sa hrang a ni. Irnênga lôn zât chi rêng rêng hin porinche no roi. 45Nin Pathian ni hrangin Aigupta ram ata nangni hruai suaktu Rengpa ki ni. Nin irthiang hrang a ni, kei ki’rthiang sikin.

46Hihai hi ramsa hai, vâ hai, tui sûng hai, irnêng chunga irvâk hai, chungchânga dân chu a ni. 47A’rthiang le irthiang loi, fâk zât le fâk loi zât nin itheithâk hrang a ni.