Search form

LEVI DÂN 16

Irtanna Nikhua

1Arona nâihai inhni’n Rengpa makunga mei irthiang loi hmanga mirimhoi an hâl sikin an thi zoi hnungin Rengpa’n Mosia a chongpuia: 2 “Ni upa Arona kha hril roh: Thuthung bôm sîng chunga sûma ki zuang ngai sikin hmun irthiang tak tentan zâr sûnga a hong ilût papai hrang ni ma, kha kha a uksak no’n chu thi a ti. 3 Hmun irthiang taka chu sehrâtchal tuai, sual irbôlna thilinhlan le belra hâlirvôm hong inhlan hrangin chu hong lût thei a ti. 4Tui irsil bak a ta, sil le kai irthiang a irbel hrang a ni; puan irnêm songkol hai, tumante kai a ta, puan irnêm kongkhitin khit a ta, puan irnêm diarin a ikai sa hrang a ni. 5Israel pungkhôm khan sual irbôlna thilinhlan hrang kêlchal inhni le hâlirvôm thilinhlan hrang belrachal inkhat an ipêk hrang a ni. 6Arona’n sehrâtchal kha ama le a in sûng mihai hrangin sual irbôlna’n sual irbôlna thilinhlana inhlan a ti. 7Irtongna puan in lûtnaa kêl inhni kha kai a ta, 8a kho tak mo Rengpa hrangin ni ni, a kho tak mo Azazela hrangin a ini hrang ti inhriatna hrangin tâ an sâna, 9Rengpa inthang ual chu sual irbôlna thilinhlana inhlan a ti. 10Azazela hrangin inthang kêl kha Rengpa kuang a hring puma inhlan phot hrang a ni, sual irbôlna hrangin Azazela kuang ramkâra insua hrang a ni.

11Arona’n sehrâtchal kha inhlan a ta, ama le a in sûng mihai sual irbôlna hrangin sual irbôlna thilinhlana inhlan hrang a ni. 12Mei lâkna’n maichâma meiri-al kha lâk a ta, mirimhoi hâl zât hap hni le hmun irthiang taka a hong ichôi hrang a ni. 13Rengpa makunga mirimhoi kha meia phul a ta, mirimhoi khu khan thuthung bôm sîng kha a inhli hrang a ni: khanchu, hmu thei no nia, a ithiloi hrang a ni. 14Sehrâtchal thisen kha a kut chalin thuthung bôm makunga khom voisari a inthek hrang a ni. 15 Kha zoi tika chu kêl kha mipui sual irbôlna thilinhlana that a ta, a thisen kha hmun irthiang taka khan hong chôi a ta, sehrâtchal thisen a iti ang thuthung bôm maton tianga le a sîngnaa a inthek hrang a ni. 16Khaang khan hmun irthiang tak kha Israel mipuihai tho’nchâina le an sualna ata a thâr irthiang hrang a ni. Irtongna puan in riakhmun kôl zela om a nia, riakhmun porinche sikin khaanga irthiangtir kha a inang a ni.

17Hmun irthiang tak thâr irthiang hranga Arona a lût le a hong suak nôk kâra irtongna puan in sûnga tukhom an iom hrang ni mah. 18Ama le a in sûng mihai sual le Israel pungkhôm sual irbôlna a tho zoiin chu pên tiang hong suak a ta, maichâma hâlirvôm thilinhlan inhlan a ta, thâr irthiang a ti. Sehrâtchal thisen le kêl thisen senkhat kha maichâm kila irkihaia khan a pol hrang a ni. 19A kutchalin thisen chimrip kha maichâma voisari inthek a ta, Israel mihai sualna sikin a thâr irthiang hrang a ni. 20Hmun irthiang takhai, irtongna puan in sûng murdihai, maichâmhai a thâr irthiang zoiin chu Azazela hranga kêl kha Rengpa makunga inhlan a ti. 21Kêl lua khan a kut kianghni’n irnghat a ta, Israel mihai thil saloi le sual an ithohai le an pualoina murdi kha phuang a ta, kêl lua khan irnghat a ti; a itho hranga inkung khan ramchâra kêl kha fepui a ta, 22Kêl khan an porinchena murdi kha pêl a ta, ramchâra khan insua a ti.

23 Kha zoi tena Arona kha irtongna sûnga lût a ti, hmun irthiang taka a lu doa ochai songkol innghâkhai kha hlîk a ta, masan a ti. 24Hmun irthianga khan tui irsil a ta, ama puandiar irbel nôk a ta, hâlirvôm thilinhlan, ama dongtum le mipui dongtum inhlan a ta, ama sual le mipui sual kha a irbôl hrang a ni. 25Sual irbôlna thilinhlan, sa marhai kha maichâma hâl a ti.

26Ramchâra Azazela hranga kêl va insuatu khan in tiang a hong kîr tika a puandiar irsu a ta, tui a irsil sa hrang a ni. 27 Sehrâtchal le kêl, sual irbôlna thilinhlan hranga that, hmun irthiang taka sual lapaina hrang an thisen lâklût sai kha a vunhai, a sûngkuahai le dâi pên tiang hâl zit hrang a ni. 28Va hâlirvômtu’n chu a sil le kai irsu a ta, irtongna puan in tiang a hong kîr mân tui a irsil hrang a ni. 29 Hi dân hi kumkhuaa zôm hrang a ni. Tha sarina tarik sûn sôm niin chu Israel mi murdi le an laia nam dang om sahai khan bu nghei an ta, sin an itho hrang ni mah. 30Hi nikhua hin a ni, an hong irthiang theina hrangin an sual murdi irbôlna thilinhlan an inhlan a ni.

31Hi nikhua hi nikho ser, ser ir-up khak hrang a ni, bu ngheia sin khom tholoi hrang a ni. Hi dân hi kumkhua’n zôm hrang a ni.

32“Ochai inlaltak hranga sahriak pol le a pa irthûl hranga namindetin hi thil hi a itho hrang a ni, ochai songkol irthiang a innghâk hrang a ni. 33Hmun irthiangtak, irtongna puan in sûnghai, maichâmhai, ochaihai le pungkhômhai thâr irthiangna sin kha a itho hrang a ni. 34Hi dânhai hi kumkhuaa zôm hrang a ni. Israel mihai kha kum khata voikhat, an sual an irthâr irthiangna sin hi tho pe ngêt hrang a ni,” a tia. Mosia’n Rengpa thupêk ang khan a tho tâka.