Search form

LEVI DÂN 19

A’rthiang le irthiangloi

1Rengpa’n Mosia kuang, 2 “Israel mipui pungkhômhai kha hril roh: nin irthiang hrang a ni, kei Rengpa nin Pathian hi ki’rthiang sikin. 3 Mâni nu le pa mahrip nin itho seng hrang a ni, ki thupêk angin ki sabat nikhua nin iser hrang a ni, Rengpa nin Pathian ki ni. 4 Millim tiang irhei no roi, biak hrangin millim pathianhai irsiam ual no roi: kei hi Rengpa nin Pathian ki ni.

5Irpôlkhômhai thilinhlan Rengpa kuang nin hlanin tho hrang lam ki iti ang khan tho’n lân, lei pom ki ti. 6A sâ kha nin thatin mani, a tûka mo fa zoi hrang a ni, 7a sûn thum ni’n nin fâkin chu a porinchea, thilinhlan kha pom no ning. 8Khaang fâk chu thil irthiang a porinchetira, a mô a ipêl hrang a ni, a mihai khan an iensan hrang a ni.

9 Bu nin âtin faôi tena ât no roi, nin ilâk irhmâi ât hrangin fe nôk no roi. 10Grep voikhat lâk zoi mani, a ra tâk mani, irvai ta no ro, mi’nrianghai le nam danghai hrangin masan ro, kei hi Rengpa nin Pathian ki ni. 11 Inru no ro, mi huang no ro, milak hril no roh. 12Ki’rhming sâmin milak tho no ro, ni Pathian irhming insiat no ro, Rengpa ki ni hi.

13 Ni bômhai huang no’n lân, an thil nei irchûpuihai no ro, ni kuanga irhlo chu zân khat khom a hlo khap pe no roh. 14 Kuarsêt khuasâl no ro; mitcho matona tûkna thil se no roh. Ni Pathian chi ro, kei hi Rengpa ki ni. 15 Dik takin ni tualbômhai thu rêl pe ngaiin lân, mi’nriang ditsak bîk no’n lân, mi’rchong chi ual hliak no roh. 16Mi chungchâng, milak chong inzaptu ni no ro: thi zôi thei ngîrhmuna ngîr kha san hrangin ni thu inhriat ang ang hril irdîn no ro; Rengpa ki ni hi. 17 Tukhom khôkmâk lungrîl irput no ro, irhong pharin thu insîr suakin nin kâr thu infeltir ro, khanchu thilsual ni itho loi hrang a ni. 18 Tu chunga khom phuba la no ro, khôkmâk no ro; lung ni irthung angin ni bômhai kha lungthung roh. Kei hi Rengpa ki ni.

19 Ki thupêkhai hi zôm roh. Ni sâ vâi kha chi dang dang irzêltir no roh. Loi inkhata chîmu dang dang song no roh. Thil chi hni puankhông sil no roh.

20Suak dôngmate kha, mi’n dôngma hrangin hual sianlân, a man la pe loi mani, la’nsualoi mani a ni’n chu mi dangin lei châipui khomsian, suak mamai a nia, that hrang chu ni ma, hrem hrang chu a ni. 21Pasal khan tho’nchâi man thilinhlan, irtongna puan ina a hong inhlan hrang a ni. 22Kha pa sual irbôlna hrang irthârna kha ochaiin lei inhlan pe a ta, Pathianin ngaidam a ti. 23Kanaan ram nin hong tung tika, thei nin iling rêng rêng a ra phut ata kum thum sûng chu porinchea bê hrang a ni, fa no roi. 24A kum minlinaa thei ra murdi chu Rengpa, nin Pathian kuang lômthu hrilna hrangin nin inhlan hrang a ni. 25A kum ringanaa thei ra chu fa thei ta nin ti; khaang khan nin tho’n chu nin thei kha a sân ra nuam a ti; Rengpa nin Pathian ki ni.

26 Sa rêng rêng a thisen le ileh fa no roi, mitvai dôihai, tasânhai, uar no roi. 27 Nin michal ata a vêlin nin sam voi inkol mani, hnerkamul voihai mani nin itho hrang ni ma. 28Mithi sûn sikin nin taksa rêng rêng khom nin irziak inchialhai, ir-âtkhok mani uar no roi. Kei hi Rengpa nin Pathian kha ki ni.

29 Ni nâinu chu tempil notizuara pêkin thanginse no ro; nam dang pathian tiang irheina lik ni ti, ram chu pualoina’n sipna ni. 30 Sabat nî serin lân, chubai ni ni mûkna hmun chu inza ro, Rengpa ki ni hi. 31 Ramilhli ikop mani, mithi kaithoi thei mani irdon hrangin fe no ro; khaang kha ni tho’n chu porinche ni ti. Rengpa nin Pathian ki ni hi. 32Tar luchuak tâkhai makunga ngîrna châng inhren lân, ulianhai chu inza roh. Nin Pathian chi roi, kei hi Rengpa ki ni.

33 Nin rama nam dang om saihai chu dengintheitir no roi. 34Nin Israel chanpuihai angin bê unglân, mâni lung nin irthung angin lungthunghai roi. Nangni khom Aigupta rama mikhual nin ni ngai kha inhre mai roi. Kei hi Rengpa nin Pathian ki ni.

35 Irtêna dik loihai, varna lung dik loihai, phalla dik loihai hmangin mi huang no roi. 36Irtêna diktak, varna lung diktak, phalla diktak hmang ngai roi. Aigupta ram ata nangni hruaisuaktu Rengpa nin Pathian ki ni. 37Ki dân murdi le ki thupêkhai hi zôm roi, Rengpa ki ni.