Search form

LEVI DÂN 26

Thuzômna hranga satvurna

(Dhn 7.12-24; 28.1-14)

1 “Ite ni ual loi, millim sinhai, lung millimhai, chubai mûk hrangin nin isiam hrang ni ma, kei hi Rengpa nin Pathian ki ni. 2Irngam hrang ki iti nikhuahai ser unglân, chubai nin ni imûkna hrang hmun chu inza roi, kei hi Rengpa ki ni. 3 Ki dânhai hi nin zôma, ki thupêkhai tak nin sônin chu 4a zoro taka rua inthotir ki ta, nin loi inlâp a ti, nin theihai khom ra nuam a ti. 5Grep ra irhmal zoro dênin bu ât nang a ti, bu tû zoro dênin nin grep ra irhmal nang a ti. Nuam do dôra fâk hrang nei nin ta, nin rama khan irtharngam takin om nin ti. 6Nin rama irngeina inlêngtir ki ta, chitna om loiin zâl nin ta, ram sahrânghai irzûlpai ki ta, râlin nangni hong doi no nihai. 7Nin râlhai chu irzûlhai nin ta, khandaiin that nin ti. 8Mi pangaiin mi irzakhat inhnê nin ta, mi irza’n chu mi sîngkhat inhnê thei nin ti. 9Sat nangni vur ki ta, nâi le te nangni pe nghek ki ta; ki thuthung angin keiin ki itho hrang chu nangni tho pe thiai ki ti. 10Bu milui nin nêk zoi loi chu a thar siana hrangin pai nang a ti. 11Nin laia om ki ta, nangni intha viat no ning. 12 Nangni ompui ki ta, nin Pathian ni ki ta, ki mihai ni nin ti. 13Kei Rengpa, nin Pathian hin, suak ni ta loi hrangin Aigupta ram ata nangni hruai suak ki ta, nin ringkolhai kha nangni inkhiakpai pea, irthiphiaiin nin lêng thei ta a ni.”

Thuzômloi hremna

(Dhn 28.15-68)

14“Ki thu nin irngaitua nuam noa, ki thupêkhai nin zôm nuam noa, 15ki dânhai nin hnôla, omdân hrang ki iti nin hnuaisiaa, tho hrang ki itihai nin tho nuam noa ki thuthung nin tho’nsualin chu, 16hiang hin nangni hrem ki ti: chamairakin nangni inomtir ki ta, inkhurpui, dam thei loi hri irvei nin ta, nin mit dolde suak a ta, hring suakpui no chin ni. 17Nangni irheisan ki ta, nangni khôkmâktuhai chu nin chunga roirêltuhai ni an ta, irzûl loi khomin intâ tânin om nin ti. 18Khan khomin ki thu nin la’rngai mai no’n chu a bâk sari’n nangni hrem ki ti. 19Nin isong tak tak, nin hrâtna chu, nangni insiat pe ki ta; nin ta hrangin irvân chu thîr anga rua insum loiin nangni siam ki ta, nin loihai khom dâr angin châr a ti. 20Môk sin sosôl ni nin ti, nin loia ât hrang om no nia, nin thei kunghai khom ra ual no ni.

21“A ni doi lamin nin oma, ki thu nin la uksak nuam mai no’n chu nin sual nêka irphu bâk saria irkhêlin hri nangni irveitir ki ti. 22Ramsa hâitak tak hong tîr ki ta, nin nâihai le nin sahai hong sê an ta.

23“Hi hremna nin tong hnung khoma ki tiang nin irhei noa, nin ni doi maiin chu, 24nangni irkalpui lamin om ki ta, a bâk saria nain nangni hrem ki ti. 25Nin laia râl hong tîr ki ta, thuthung nin itho’nsiatna phuba nangni hong la an ti. Nin khopui kul sûnghaia nin irbîk khomin hri inlêngtir ki ta, râlhaiin hong la dên an ti. 26Nin fâk irvaina inpingtir ki ta, lungthu sôm hmanga fâk le nêk suang nuhai khan lungthu inkhat vai hmangin fâk le nêk suang ta an ti. Sem viviat a ta, an dongtum an fâk zoi hnung khom an phîng la châm dên a ti.

27“Khaang dôr tena khom ki thu nin irngai nuam noa, nin ni la doi maiin chu, 28ningmurin nin chunga insum ki ta, a bâk saria nain nangni hrem ki ti. 29Nin nâipahai le nin nâinuhai hme fapuina rak nin ti. 30Nin millim pathian biakna hmun irsânghai kha insiatpai ki ta, nin mirimhoi hâlna maichâmhai kha insiat ki ta, nin ruakhai chu nin millim biakhai chunga pai ki ta, ki hringna khan nangni khôkmâk a ti. 31Nin khopuihai kha insim ki ta, nin pathian biakhai kha inramtir ki ta, nin irbôlnahai kha nangni lei pom pe no ning. 32Nin ram inkoltir zit ki ta, a luatu nin râlhai khan, a’rkhêl ti tak tak an ti. 33Irdoina hong tung a ta, nam dang rama nangni hruai indarh an ta, nin khopuihai kha chim remrum a ti. 34Nin râlhai rama nin om sûngin nin ram chu irngam a ti. 35Nin om sûngin nin ram kha inôltir nuam mak chêia, nin om no sûng chu a irngam ta hrang a ni. 36Nin râlhai rama hruaihai chu chi tak tak an ta, sûlhna inlêng maia luan intân an ta, khandaia irzûl ang dênin tûte irzûl loi khomin tûk an ti. 37Khandaia irzûl ang dênin irpalthût irhlôm an ta, râl doi nôk hrang tûte om no chin ni. 38Mi rama thi nin ta, kha khan nangni phûm an ti. 39Nin râlhai rama la dam sun omhai khom nin sualna sik le nin pahai sualna sikin zui irhmang nin ti.

Thil sa hong tung hrang a ni

40“Nin ni doia, nir heisanin kha mihai khan an pahai leh thilsual an tho a nih ti inhre suak an ta, 41anni sikin ki’rheisana, an râlhai rama kin hnotsuak a nih ti irhriat an ta; khanchu, an lungrîl irhnuai an ta, an sual man an pêl hnung chu, 42 Jakoba, Isaka le Abrahama hai kuang ki chonginkung kha inhriat mai ki ta, ki mihai chu, hi ram hi ki pêk hrang nôk thu hril thar nôk ki ti. 43Aniachu, ram chu a’rngam theina hrangin ram ata mihai kha lâk suak bak hrang a ni. Ki dânhai le ki thupêkhai hnôla an thilsual tho man kha an ituang bak hrang a ni. 44Khaang tak khan hrem khom inlân an râlhai rama an om kha, sehai rak no ninga, inboipaihai zit ual no ning. 45An irchibulhai leh ki thuthung kha inthar nôk ki ti. Aigupta ram ata khan nam tin hmua ki mihai kha, kei Rengpa hi an Pathian ni hrangin ki ihruai suak an ni kha te. Kei hi Rengpa ki ni,” a tia.

46Hi hi Sinai tânga Mosia kuang Rengpa dân le a thupêk, Israel mihai hranga pêk kha a ni.