Search form

NAMBAR 1

Israelhai irtepna maton tak

1 Israelhaiin, Aigupta ram an suaksan zoi kum hnina, a tha hnina, sûn maton taka khan, Sinai ramchâra irtongna Biakbuk khan Rengpa’n Mosia kha a chongpuia, 2“Nangma le Arona hin Israel irchihai chu an panam dungzuiin le an in sûng mi angin tephai roi. 3Râl doi thei tak pasal kum sômhni le a chung tianga mi chu tephai ving roi. 4Nang changpui hrangin panam tina pâfonghai chu inhrilhai ro,” a tia. 5Hi sinthopui hranga panam tina an inthang suakhai chu hihai hi an ni: Reubena panama mi Sedeura nâipa Elizura, 6Simeona panama mi Zurisadaia nâipa Selumiela hai, 7Juda panama mi Aminadaba nâipa Nasona hai, 8Isakara panama mi Zuara nâipa Nethanela hai, 9Zebulun panama mi Helona nâipa Eliaba hai, 10Josefa irchi Efraima panama mi Amihuda nâipa Elisama hai, Manasea panama mi Pedazura nâipa Gamaliela hai, 11Benjamina panama mi Gideona nâipa Abidana hai, 12Dana panama mi Amisadaia nâipa Ahiezera hai, 13Asera panama mi Okrana nâipa Pagiela hai, 14Gada panama mi Deuela nâipa Eliasapha hai, 15Naftalia panama mi Enana nâipa Ahira hai hi. 16Annihai hi mipuihai inthang, an panam sûnga hruaitu, Israel in sûngkua pâfonghai kha an ni.

17Mosia le Arona chu hi mi sômhleihnihai hin an isanhai a nia, 18khanchu Israel nam murdihai chu tha hni sûnga sûn masa taka khan an koibukhaia, panam tin le in sûngkuahai an tephaia. Pasal kum sômhni chung tianga mi chu irziakin an itephai a ni tâka. 19Rengpa’n thu a ipêkhai ang takin, Mosia’n Sinai ramchâra khan mipuihai kha a itephai a ni. 20Pasal kum sômhni le a chung tianga râl doi theihai kai chu, an panam le an in sûngkua ang takin an irhming an irziakhaia, Jakoba nâilutîr, Reubena panam ata phutin hiang hin an tam dân chu a ni. 21Reubena panama mihai chu sîngminli sângruk le irzaringa an ni. 22Simeona panama irchihai chu an itam lam angin pasal kum sômhni chung tianga râlkâp thei dôrhai chu, 23Simeona irchihai murdi chu sîngringa sângkuak irzathum an ni. 24Gada panama irchihai chu an irhming tam dân angin kum sômhni chung tianga râl doi thei dôr chu, 25Gada irchihai chu sîngminli sângringa irzaruk le sômringa an ni.

26Juda panama irchihai chu an irhming tam dân angin kum sômhni chung tiangahai chu, 27râl doi thei dôra mi a chung tiang Juda irchihai chu sîngsari sângminli le irzaruk an ni. 28Isakara panama irchihai chu an itam dân angin kum sômhni chung tianga râl doi thei dôrhai chu, 29Isakara irchihai chu sîngringa sângminli irza minli an ni. 30Zebulun panama irchihai chu, an irhming tam dân angin kum sômhni chung tianga mi chu 31râl doi thei tena mihai chu an rêngin sîngringa sângsari le irzaminli an ni. 32Josefa panam laia mi Efraima irchia mi an tam dân angin kum sômhni chung tianga râl doi thei 33Efraima irchihai chu sîngminli irzaringa an ni. 34Manasea panama irchi an irhming tam dân angin kum sômhni chung tianga râlkâp thei 35Manasea irchihai chu an rêngin sîngthum sânghni irzahni an ni. 36Benjamina panama irchihai, an irhming fe dân angin kum sômhni chung tianga râl doi thei, 37Benjamina panamhai chu sîngthum le sângringa irzaminli an ni. 38Dan panama irchihai chu an irhming irziak dân angin kum sômhni chung tianga râl doi thei 39Dan irchihai chu sîngruk sânghni irzasari an ni. 40Asera panama irchihai chu an irhming irziak dân angin kum sômhni chung tianga râl doi thei 41Asera irchihai chu an rêngin sîngminli sângkhat le irzaringa an ni. 42Naftalia panama irchihai chu an irhming irziak lam angin kum sômhni chung tianga râl doi thei 43Naftalihai chu sîngringa sângthum irzaminli an ni.

44Hihai hi an ni, Mosia le Arona’n Israel nam pâfonghai sômhleihni an itephai thei chu an ni. 45Khanchu râl doi thei dôrhai chu Israel irchi, a panama tepin kum sômhni chung tianga itephai chu an ni. 46An rênga tep theia om dôr chu nuairuk sângthum irzaringa le sômringa an ni. 47Levi mihai chu panam danghai laia khan tep sa ni mahaia, 48Rengpa’n Mosia kuang khan, 49“Râl kâp thei hrang dôr pasal ni tephai tena khom Levihai chu ni itep sahai hrang ni ma; 50Levi irchihai chu inhriattirna Biakbuk le a neinun hmangruahai kha inenkoltirhai roh. A neinunhai kha irzônhai sianlân, donsuihai sian, a kôlvêla khan an puan inhai inzar ngai an ti. 51Khan, nin Biakbuk kha nin son hrang rikipa, Levia irchihai khan insiat an ta, nin inzar nôk hrang khomin Levia irchihai khan an inzar hen hrang a ni; mi dang hong irrol tumhai chu thatpaihai hrang an ni. 52Khanchu Israel mihaiin an omna hmun senga, a pa pâlin, an tam dân izirin riakbukhai chu siam an ti. 53Khannisian Levia irchihaiin chu Biakbuk vêla khan riakbuk irfûktir hrang a ni. Biakbuk kha enkol an ta, kha no’n chu mihaiin hong nâi an ta, Israelhai chunga ningmurna hong tungna lik a ti,” a tia. 54Khaang tak khan Israel mihai khan Rengpa’n Mosia kuanga a ihril pe lam ang takin an tho tâka.