Search form

NAMBAR 10

Tangkarua bekulhai

1Khan Rengpa’n Mosia a chongpuia, 2“Tangkarua bekul inhni siamin lân, isuka sukin siam ro; mipui bukkhômna hrangin le riakbuk mâksanna hrangin ni ihmang ngai hrang a ni. 3Bekul inhnihai kha zoro sôt an tum hnungin mipui murdi chu ni kuang irtongna Biakbuk kotbâia an irbuk zit hrang a ni. 4Khannisian inkhat vai kha tum a ni’n chu, panam tina pâfonghai vai ni kuang hong irbuk an ti. 5Bekul kha chomkhat vai an tumin chu, nisua tianga omhai chu suak an ti. 6Khan bekul kha voihnina an tum nôka nî’n chu sim tianga omhai suak an ti. Riakbuk suaksanna hrangin chu bekulhai kha chomkhat dok tum ni a ti. 7Khannisian mipui murdi irbukna hrangin chu bekul kha zoro sôttak tum ni a ti. 8Bekulhai kha Arona nâipasal ochaihaiin tum ngai an ti. Kha kha nin ta hranga kumtuanga dân chu ni a ti. 9Nin rama nin râlhai doi hrang tika khom, hi bekulhai hi tum unglân, khanchu kei Rengpa nin Pathian hin nangni san ki ta, nin râlhai rengata nangni inzôk ki ti. 10Nin khonhoi nihai, nin Ferkân Kût zoro hai, nin tha thar lôm nihai le nin pum hâlirvôm le irngeina thilinhlan nin inhlan zoro tikhaia khom bekul chu nin itum hrang a ni. Khanchu keima’n nangni san ki ti; kei hi Rengpa nin Pathian chu ki ni.

Sinai ramchâr ata an suak

11Khanchu kum hnina, a tha hnina, sûn sôm inhnina khan sûm chu inhriattirna Biakbuk chung ata kha a’rthona. 12Khanchu Israel irchihai kha Sinai ramchâr ata kha an inzin suaka, Paran ramchâra khan sûm kha a’rngam tâka. 13Mosia hmanga Rengpa thupêk angin an suak nôk tâka. 14Juda pâlhai an pâl tam dâna izirin an suaka; an hruaitu chu Aminadaba nâipa Nasona a ni. 15Isakara panamhai hruaitu chu Zuara nâipa Nethanela a ni. 16Zebulun panamhai hruaitu chu Helona nâipa Eliaba a ni. 17Khanchu Biakbuk kha an seta, Gersona le Meraria namhaiin an irzôn suaka. 18Kha hnungin, Reubena panamhai chu an pâl tam dân angin an suaka; an hruaitu chu Sedeura nâipa Elizura a ni. 19Simeona panamhai hruaitu chu Zurisadaia nâipa Selumiela a ni. 20Gada panamhai hruaitu chu Deuela nâipa Eliasafa a ni.

21Khan, Levi panamhai laia Kohatha irchihaiin thil irthiang kha an irzôna, an suaka; riakbuk kha an va tung mân, Biakbuk kha inding zoi vingin a lei om tâka. 22Efraima panamhai chu an pâl tam dân angin an suaka, an hruaitu chu Amihuda nâipa Elisama a ni. 23Manasea panamhai hruaitu chu Pedazura nâipa Gamaliela a ni. 24Benjamina panamhai hruaitu chu Gideona nâipa Abidana a ni.

25Khan a hnungkhôn taka chu Dana panamhai chu an pâl tam dân izirin an suaka, an hruaitu chu Amisadaia nâipa Ahiezera a ni. 26Asera hai hruaitu chu Okrana nâipa Pagiela a ni. 27Naftalia hai hruaitu chu Enana nâipa Ahira a ni. 28Khaang kha a ni, Israel irchihai an pâl tam dân anga izirin an fe dân chu; khaang khan an suak tâka.

29Khanchu Mosia’n a kumeipa, Midian mi Jethroa nâipa Hobaba kuang, “Rengpa’n ram ni pe hrang a itihna tiang fe hrang kin nia, khataka khan Israelhai chu tuanintungtirhai hrangin chong an kunga; khasikin nangma khom kin kuang hong sa’nlân, ni chunga satakin om kin ti,” a tia.

30Khan Hobaba’n a kuang, “Nin kuang hong sa thei no ning, kin rama ki’rchihai kuang fe hrang ki ni sikin,” a tia.

31Khanchu Mosia’n a kuang, “Irngaihoi takin ni masan no ro, ramchâra omhmun kin ikhuarna hranghai chu nangin nin hriat uala, khasikin kin mit ni hong chang pe roh. 32Kin kuang ni honga niin chu, Rengpa satvurna kin idong murdi chu nang khomin dong sa ni ti,” a tia.

Mipuihai an irthon

33Khanchu Rengpa tâng irthiang Sinai ata sûn thum lama an fea; Rengpa Thuthung Bôm chu riakbuk an khuarna hrang hmun inchum zongin an matona a fe maia. 34Khan riakbuk an suaksan rikipa, Rengpa sûm chu sûna an chunga a om mai ngaia. 35 Khan Thuthung Bôm kha a suak hrang rikipa, Mosia’n, “O Rengpa thoiin lân, ni râlhai chu inhnotin lân, nang a hmumâktuhai chu ni makung ata rot ri sehai,” a ti ngaia. 36Khan a’rnghat rikipa, “O Rengpa Israel mipuihai laia hin zuang kîr nôk ta ro,” a ti ngai.