Search form

NAMBAR 11

Tabera hmun

1Khanchu an dengtheinahai sikin mipuihaiin Rengpa inhriat hrangin an chiara, Rengpa’n an hriathai tena chu a ning an mura, mipuihai chunga mei a zuang tîra; an laia meichokin, an riakbuk hmor tiang chu a kâng tâka. 2Khanchu mipuihai khan Mosia an koia, Mosia kha Rengpa kuang a chongchaia, mei kha a thi nôk tâka. 3Rengpa mei kha an laia a chok sikin, kha hmun irhminga khan Tabera an ti tâka.

Mosia’n hruaitu sômsari an thanghai

4Khan, nam dang senkhat an laia omhai khan a sân hmê irzukna an hong nei tâka, khan Israel irchihai khom kha an chiar sa tâka. “Hmê fâk hrang hi nei inlân chu o! 5Aigupta rama khan a man boiin ei nuam dôr nga ei fâka, khabana fanghma hai, vâifanghma hai, purûn sel hai, purûn til hai le purûnngoi hai ei la’nhriat maia; 6khannisian atûn hin chu ei bu nêk ei anh fâk zar khom suak ta maka, fâk hrang dang lak ite om ta maka, a nî tina ei ifâk mana ti bana chu,” an tia.

7(Mana chu chîmu ru angin an lang dân chu lunghlu ang a nia, 8-9 Zâna riakbuk kôlhaia irdo leh an tâk suama, zîng khovâra chu mipuihaiin an hrûta bu nôina khan an nôi india, suma khom an suk ngaia, khanchu bêla an era, bai khomin an sin ngai, oliv hriak leh bai sin ang hin a om ngai. 10Khan mipuihai kha a in sûngkua kua’n, an puan in kotbâia an chap ti kha Mosia’n an hriata, khan Rengpa chu a sân a ning an mur pe tâka. 11Khan, Mosia khom kha a milunghoi pe ta maka, khanchu Rengpa kuang, “Itho sika mo ni sinthotu hi deng ni ni intheitir? Imo ni milunghoi loina ki chunga ni inei? Hi mipuihai mophurna hi keima chunga ni ibâng? 12Hi mipuihai hi ki nâihai mo an nia? An pi le puhai kuanga chonginkunga pêk ni inkungna rama hruai inlûthai hrangin, nâi neitu’n irhnu nêk lai a ipom angin ni ni inpomtir? 13Hi mipuihai ruk hrang dôr hi kho rengata mo hmê ki ihmu zoi hrang? ‘Kin fâk hrangin hmê ni pe ro,’ tiin an ni ichapkhum hi. 14Hihai hi ki bingin chu hruaihai thei no ning, keima ta hrangin an tak hrai tâk sikin. 15Hianga ni lo hrang a ni’n chu, nin renin lân, atûn atûn ni thatpai zel ro, deng nin theitir ta no ro,” a tia.

16Rengpa’n Mosia kuang, “Israelhai upa mipuihai upa le an hruaitu nia ni inhriat mi sômsari keima kuang hong hruaihaiin lân, irtongna Biakbuka nangma leh ngîrsuam hrangin hong hruaihai roh. 17Khanchu zuang chum ki ta, khataka khan nang zuang chongpui ki ti; khan nangma kuanga irtha kha an chunga sia ki ta, ni bingin pêl loiin mipuihai puakrik kha nang pêlpui an ti. 18Khanchu nangin mipuihai kuang, ‘Nangtûka hrang hin irthâr irthiang unglân, khanchu hmê fâk hrang chu man ngêt nin ti. Kin hmê fâk hrang tu’n mo a ni ipêk hrang? Aigupta rama khan a ihoi tie le te, tiin Rengpa inhriatin nin chapa, khasikin Rengpa’n hmê nangni pe a ta, fa ngêt nin ti. 19Sûn khat mani, sûn hni mani, sûn ringa mani, sûn sôm mani, sûn sôminhni mani vai ual khom ni no nia. 20Tha khat sûng chu, hnông raka inluak rakin fa nin ti, nin kuanga om Rengpa hnôla, itho hranga Aigupta rengata suak mo ei ini o, tia nin chap sikin,’ ti ro,” a tia.

21Khan, Mosia khan Rengpa kuang, “Hitaka hin mi nuairuk kir ôihaia, tha khat sûnga an hmê fâk hrang nangni pe ki ti, ni iti hi? 22Kêlbelra le sa danghai hi that pehai ngânin lân, an ikhop thei hrang ma ni? Tuipuia nga murdi chel pehaiin lân an iruk hrang ma ni?” a tia.

23Khanchu Rengpa’n Mosia kuang, “Ki’rchamneina hi a ihek thei hrang ma ni? ki iti hi a tung le tung loi inhre lat ta ni ti?,” a tia.

24Khanchu Mosia kha a suaka Rengpa thu chu mipuihai kha a hrilhaia; khanchu hruaitu sômsarihai a koibûmhaia; Biakbuk kôla khan an ngîrtirhaia. 25Khanchu Rengpa kha sûm laia a zuanga, a chongpuia, Mosia kuang irtha a lei ipêk senkhathai kha lâkin hruaitu sômsarihai kha a pêkhaia. Khanchu irtha kha an chunga a chum le zel khan, deipuhai angin thu an hrila, khannisian kha kha chu tho thei mai ta mahaia. 26Khanchu hruaitu sômsarihai laia mi inhni, Eldada le Medada chu Biakbuk sûnga khan an la oma, puan in tiang la fe mahai, kha khan irtha kha an chunga a zuang chum pehai nôka, anni khom deipuhai angin thu an hril tâka. 27Khan ruatharte inkhat hi intânin Eldada le Medada sintho kha Mosia an va hrila. 28Khanchu Nuna nâipa Josua, ruatharte a ni lai ata Mosia changpui ngaitu khan, Mosia kuang “Ka pu Mosia khaphai ta ro,” a tia.

29Khan Mosia’n a kuang, “Keima sika hin ni ihnarsâhai mo? Rengpa mi murdihai hi deipu ni vinghai sian, Rengpa’n an chunga irtha sem pehai ving sian ei ti lai hin,” a tia. 30Khanchu Mosia le Israel hruaitu sômsarihai kha riakbuka an kîr nôk tâka.

Rengpa’n mâmim an suahai

31Khanchu Rengpa’n phâivua an thotira, tuipui ata mamîm a hong sêm suakhaia, hnuai ata mûk hni irsângin an hong vuanga. Riakbuk le a kôlvêla khan hmun lian tak an dâp zuak tâka. 32Mipuihai khan sûn nitungin le zân khovârin sûn dang nôka sûn nitungin mamîm kha an irfuanghaia, a’rkhôm intômtak khomin Homer sôm chu an irkhôma; an riakbuk kôla khan an inchârhaia. 33Khanchu kha hmê kha an fâka, an fâk zoi mânin; mipuihai chunga Rengpa ning kha a zuan mur pea, mipuihai kha hripuiin a hremhai tâka. 34Kha hmun irhminga khan Kibroth Hattaavah an tia; kha hmuna khan hmê irzuka rôlsiahai kha an phûmhai sikin. 35Khanchu mipuihai chu, kha hmun ata kha Hazerot-a an fea, khataka khan omhmun an khuar tâka.